الموضوع: :: تيدا هاتشباك 2012 ::انطباعاتى عن السيارة - وصيانة فى اوتو ايجيبت - وسمكرة فى مودرن

السلام عليكم ورحمة الله وبركاته
أزيكم يا جماعة والله وحشنى جدا واسف جدا جدا على التاخير ظروف العمل سيئة
طبعا وعدتكم بالتقرير واسف على تاخير العربية يومين دول متربة من جوا ومن بره
فمقدرتش اصورها لاحسن لو حد شافها هيصرف نظر عنها
ان شاء الله هوديها كار كير واصورهالكم حتة حتة
ده اول تقرير ليا فى المنتدى ويارب يضيف جديد هقسم التقرير الى 3 اجزاء
وده بقى 3 فى واحد زى مبيقولو

1. انطباعى عن السيارة من مميزات وعيوب
2.صيانة ال 1000 كيلو فى أوتو ايجيبت ابو رواش
3.سمكرة و دهان العربية بعد عدة حوادث فى مودرن أبو رواش

للعلم معايا تيدا هاتشباك اعلى فئة فتحة سقف

اول حاجة انطباعى عن السيارة من حيث المميزات :
1. موتور السيارة ما شاء الله صوته ناعم وواطى واديه 8 من عشرة
2.عفشة بتاعت العربية جيدة جدا وناعمة مش بحس اووى بالمطبات واديها 7 من عشرة
3.استهلاك الوقود رائع جدا جدا واديه 9 من عشرة وهعمل عليه تقرير بالارقام قر يب
4.مقصورة العربية واسعة بمعنى الكلمة ومريحة واديها 9 من عشرة بشهادة واحد صحبى
طويل حوالى 192 سم وكان قاعد ورا وقالى اول مرة اقعد مستريح
5.تابلوه شكله فخم والازرار فى اماكن مريحة للسائق واديها 9 من عشرة
6.فتحات التكيف رائعة وتوزيع رائع للهواء جربته كان اقل شىء يوصف انه ممتاز
7.عزل العربية جميل اديه 7.5 من عشرة
8.دهان العربية عن خبرة فى حوادث غريبة اقل ما يوصف انه ممتاز جدا 9 من عشرة
9.كمبيوتر الرحلات مفيد جدا لمعرفة مسافات المقطوعة او استهلاك الوقود بالمسافات وياخد 9 من عشرة
10. كاسيت كويس بصراحة وسماعات ممتازة صوتها كويس ما شاء الله
نيجى بقىللعيوب اللى مضيقانى فى العربية :
1.فوج لايت مينفعش تنوره لوحده لازم تنور الواطى معاه ودى حاجة غاظتنى جدا جدا بسبب ان فيه ناس بضايقها الواطى وتفتكر انه عالى لان فوانيس بتاعتها كبيرة شوية فبيضيقونى وينورولى العالى
2.مفيش لمبة فى درج التابلوه معرفش ليه يعنى
3.مفيش اى الارم لما يبقى فيه باب مفتوح فقط لمبة بتنور وخلاص
4.موشر بس لدرجة حرارة مش ديجيتال علشان واحد لو حس ان عربية سخنت او داخلة على مرحلة سخونة يرحها شوية

اما بقى الحجات اللىناقصلها بجد
1. جنوط مقاس 16 تبقى حاجة كويسة
2.مثبت سرعة مع انو بينزل فى دول تانية بس مش عارف مش بينزل هنا ليه
3.عداد ديجيتال يبينلك فاضل استهلاك للبنزين


ثانيا صيانة ال 1000 كيلو

بعد مكملت الاف كيلو كنت محتار اعمل صيانة فين طبعا المنتدى قام بالواجب
ونصحونى انى اعملها فى اوتو ايجيبت ابو رواش بردو من مواضيع اللى هنا نصحو باستخدام
زيت ليكوى مولى اشتريته من شارع دمشق من شركة مصر لقطع غيار السيارات موزع معتمد
العربية بتاخد اربعة ونص لتر اشتريت 5 لتر عملت 295 جنيه


جت بقى مرحلة الذهاب للتوكيل
فعلا اتصلت بيهم وحجزت صيانة هناك
مكان شارع قبل داندى مول تقريبا بعد بنزينة امارات مصر
روحت هناك الساعة 8 ونصف
ودخلت 9
جيه مهندس الاستلام حوالى بعد 10 دقايق اسمه اسلام محترم جدا وخدوم بصراحة
وبيحب يسمعك تحس انه عايز يخدمك باى طريقة استلم العربية منى وشيك على كل حاجة
وقولتوا على ملاحظاتى اللى تتلخص فى الاتى

1.وجود زنة فى فتحة السقف فى مطبات والنقر
2.وجود زنة فى التابلوه برده فى المطبات والنقر
3. ميدالية وقعت فى فتحة جنب اولاعة فى الكونسول
4.العربية ساعات كانت بتكهرب وكنت خايف تكون من الميدالية ملمسة مع جسم العربية

أستلم المهندس العربية وادانى شنطة شيك من هناك احط فيها متعلاقاتى




وحط كيس على الدركسيون و دواسات ورق و كيس على الكراسى
وادانى كوبونات مجانية عبارة عن 2 مشروب مع باتيه




قالى استريح هناك وادانى كوبون فيه رقم العربية الوقت تقريبا هتستلم العربية على 11 الا ربع
قولتولو ماشى

الاستراحة بتاعت العملاء ممتازة بصراحة مكان نضيف جدا جدا عن اتنين ريسيبشن فى واحد كل ريسيبشن فيه تفزيون LCD ده غير تلفزيون فيه معلومات عن السيارات اللى دخلت
التوكيل تتصين نوعها ونوع صيانة و مراحل الصيانة و غسيل العربية ووقت دخول العربية واستلامها حاجة نضيفة جدا غير انك
بتشوف العربية لان بينك وبين الورشة ازاز وبشهادة زميلى اللى جى معايا
معاه لانسر و قعد يزم فى توكيل بتاعه ويوقولى مينفعش اجى اصين هنا
وصادفت واحنا قعدين فيه خبراء يابانين دخلو الورشة وناس مسئولين من نيسان معاهم
يشيكو على الورشة والاجهزة اللى جوا وده ان يدل ان شركة نيسان شركة محترمة جدا
وبصراحة كنت مستريح نفسيا ومطمن
جيه بقى مهندس اسلام على 11 الا ربع قالى احنا اسفين هناخر شوية علشان مشكلة الزنة اللى فى التابلوه
المهندس هيبص عليها تانى وهيعمل تست قولوتلو مفيش مشكلة قالى ربع ساعة كده
و خلاص المهم استنيت وجيه وقالى تعالى يا فندم جرب العربية روحت ركبت العربية مع مهندس
مصطفى راجل كويس بصراحة وطلعنا نجربها كده سمعت الزنة تانى قالى لا مفيش ده كان الدركسيون فيه تزييق وعملناه قولتو والله دركسيون مش كان فيه حاجة قولتو طيب اقفل الازاز
وشوف كده فعلا راح سمعها وقالى طاب خلاص اه فعلا
قالى روح طيب فى الاستراحة هنشوفلك الموضوع
قعدت ومهندس اسلام جالى وقالى طيب معلش حضرتك هناخر شوية قولتول عادى مفيش مشكلة
المهم اقعدت نصف ساعة كده راح جيه المهندس اسلام قالى بص يا فندم احنا مضطرين نفك التابلوه علشان نعرف المشكلة لان الفنى والمهندس مش عارف يحدد المشكله قولتوا ازاى يعنى افك تابلوه عربية لسه مكملة 1000 كيلو راح طمنى وقالى متخفش و بصراحة مكانش قدامى غير كده
لان الموضوع زنة والتزييق ده مقرف قولتوا اتكل على الله هوا قالى احنا مش هنفكوا كولو مرة واحدة
هنفك حتة حتة علشان نوصل للمشكلة بص قالى خلى بال حضرتك احنا بنسبة 50 % ممكن نوصل للحل و ممكن لا تشرفنا بكرة فايه رايك قولتوا لا اعملها النهاردة علشان انا مش هقدر اجى وكده
كده انا جيت و خلاص قالى ماشى اقعدت من ساعة 12 وربع مستنى لقيت العربية واقفة محدش لمسها روحت قولتلو ايه يا بشمهندس ليه العربية محدش راح يشوفها قالى ده وقت البريك قولتوا ماشى
المهم استنيت وشوية لقيت الفنين راحو واخدو العربية لورشة تانية غير اللى بيتعمل فيها الصيانة
و قعدت مستنى مستنى مستنى لحد مفقدت الامل
وكل شوية اروح اساله يقولى لسه بنجرب اصبر شوية
المهم قولتوا هوا مفيش حد جيه اشتكى من مشكلة دى قبل كده قالللى لاسف لا يا فندم
عرفت ان النحس ليه اصحابه
روحت اقعدت شوية فى الرسيبشن لانى حسيت ان المهندس اتخنق منى من كتر الاسئلة والزن

وجت الساعة 4 وجالى بقى الاحباط و اضايقت وعرفت انى خلاص هاخدها كده
شوية و 4 ونص وقالى المهندس اسلام تعالى كده جرب حضرتك العربية روحت ركبت مع المهندس
مصطفى وجربنا العربية وفعلا الصوت اختفى وقالى ان مكان تحت الدركسيون هوا اللى كان فيه المشكلة فكناه وربطناه كويس اتحلت قولتوا طيب بالنسبة لفتحة السقف قاللى دى حاجة بسيطة
استنانا حضرتك واحنا هنعمهالك و هنغسل العربية وتستلمها
المهم دخلت وانا فرحان بصراحة واستنيت لحد الساعة 5 وربع كده ولقيت العربية جت
واتغسلت وقالى ان الفتحة تمام وبصراحة الموظفين كانو ماشيين و اخدت كلامو ثقة غير انى زهقت من كتر الاقعدة
استلمت العربية وروحت بقى ليا بقى ملاحظات على اوتو ايجيبت

1. خدمة العملاء ممتازة و القائمين على الخدمة ناس محترمة جدا
2.مكان مريح لاستقبال العملاء
3.مكان الورشة والتجهيزات والالات حديثة

بصراحة كنت راضى جدا وناوى كل صيانة اروح هناك و كان نفسى موضوع فتحة السقف ده يتحل
لانى فوجئت ان الصوت لسه موجود + ان فيه وساخة لقيتها فى فرش بتاع فتحة السقف من جوا
واضايقت بصراحة لاكن غير كده كلو تمام

نيجى بقى لثالثا ومرحلة السمكرة والدهان فى مودرن ابو رواش

العربية كانت حكت مع لورى رفرف يمين من قدام + رفرف يمين من ورا والاكصدام كانو عايزين يتعدلوا واللى زاد وغطى سبحان الله انا كنت رايح اعمل دول واركب السينسور
وانا واقف فى اشارة جيه موتسكل ووقف جنبى واحنا ماشيين عربية زنقت عليه وهوا موصر
انه يمشى بينا راح وقع على باب اليمين من قدام ومن ورا
وطبعا الحمد لله البابين اتخرشموا حاجة بسيطة بس باينة ورخمة
واتخانقت معاه ومعرفتش اخد من وشه حاجة
طبعا روحت وانا قرفان ويافرحة متمت ودخلت كده التوكيل على 8 استنيت لحد 8 ونص
وادانى بره فى البوابة كارت رقم العميل ودخلت ناحية استراحة نيسان
استنيت وسئلت خدمة العملاء عن موضوع السمكرة قالولى استاذ احمد سعيد مسئول عنها
قالى هوا هيجى كمان شوية انا كنت قلقان وعايز اعرف بابين دول ايه نظامهم وبكام
روحت دخلت الورشة وسئلت عليه
لاقيتو وقولتو راح قالى الحمد لله ومتقلقش استنانى وانا هجيلك
فعلا جيه وبص على موضوع الرفر قالى والباب والاكصدام اللى ورا قالى بص
سمكرة هتبقى 400 وموضوع الرفرف الى ورا مع الاكصدام ب 150 قولتول ده هيفك ويركب وبس وانا سئلت عليه فى اوتو ايجيبت قالى 80 جنيه وقاللى احنا شغلنا غيرهم
وقاللى دهان ب 900
ده بعد الخصم لان الاول قالى كولو 1750 غير ضريبة المبيعات المهم كنت فى حيرة اعملها تبع التامين ولا على حسابى مع العلم انى لسه مكملش على استلام العربية 3 اسابيع
هوا اقترح انى اعملها على حسابى والراجل انا صعبت عليه لانى لسه شارى العربية
فعملى خصم كولو 1500 + 150 ضريبة
المهم قولت الحمد لله رب العالمين على كل حال وانا مروح كنت شايل هم
ازاى هرجع وازاى هاى تانى بصراحة لقيت عندهم ميكروباص بتاع العملاء بيودي لحد ميدان لبنان وانت جى بردوا فيه نفس الميكروباص بتتصل وهما بيبعتهولك وبصراحة احترمتهم قوى لاهتمامه براحة العميل
وقالى اعلى اخر الاسبوع وتعالى
كنت مسلمها السبت قالى تعالى الخميس
اتصلت بيه الاربع وقالى العربية خلصت بس فى الجودة علشان فيه شوية ملاحظات
وان عربيتك لسه جديدة قولتوا ايه الاخبار قالى تعالى بكرة على 2 كده

جيه الخميس وروحت واتصلت بيهم وبعتولى ميكروباص ميدان لبنان فى الميعاد بالظبت بصراحة
ووصلت دخلت الاستقبال واديت ورقة المعاينة للمهندس اخدها وقالى استنى شوية
قعد مستنى نصف ساعة ومفيش جديد روحت اتسسلت للورشة كان استاذ احمد لما اتصلت بيه
قالى روح لواحد اسمه استاذ لواء
سالت عليه لقيته ولقيت العربية واقفة محدش جيه عندها ولقيت استاذ لواء كلمته
قالى كولو تمام وبص كده عليها فعلا ولا اكن فيه حاجة وشوية لقيت موظف الاستقبال لسه البيه جى
طبعا اتضايقت جدا لسه فاكر المهم انا من عادتى احب اقعد افلى كده فى الحاجة
ببص على رفرف اللى قدام كده بايدى لقيته بيتحرك فبقولى ايه ده بيقولى فايه ايه ببيبص بيقولى اه معلش يا فندم ده مش مربوط راح جاب الفنى وربطوا ببص ورا على الاكصدام والرفر لقيت الاكصدام مش راكب صح طالع لبرا سنة وقولتولو ايه ده قالى هى كده قولتلو بص كده الناحية التانية راح بص قالى معلش يا فندم وراح جاب الفنى فك الاكصدام وقعد يضغط عليه لجوه وركبه
ببص على الاكصدام لقيت فى اثر خدوش ليه قولتو واه ده كمان قالى معلش نادى الفنى وعملها بكمبوند بصراحة بيقولى ادارة جودة ومش عارف ايه انا مرارتى اتفقعت

المهم كنت قايلهم على موضوع فتحة السقف وفعلا عملوها قالى الكوتشة اللى فى المجرى
مكنتش راكبة صح وشحملى المجرى وفعلا الصوت انتهى بس لقيت زنة التابلوه والتزييق رجع تانى
طبعا اتخنقت وده اكتشفتوا وهوا بيعمل تست لل فتحة السقف طبعا بعد المهازل اللى شفتها هناك
والفنين وبيسوقوا عربيات العملاء بسرعة و غير انهم جرحولى التابلوه و استخدمو الكاسيت
بتاعى تقريبا كان البهوات بيسمعوا عليه حاجة و هما شغالين قولت فى نفسى اخدها كده
وكفايه و ابقى اشوف موضوع ده فى اوتو ايجيبت افضل

تقييمى بقى لمودرن
1.معاملة العملاء سىء بصراحة وباردين كده
2.مفيش اهتمام بالعربية و بيبهدولها
3.فينيش سىء جدا جدا يعنى مش ربطو الرفرف قال ايه نسى و الاكصدام راكب مش كويس
4. سمكرة ودهان كويسين جدا جدا اكن مفيش اى حاجة حصلت
5.موضوع الميكروباص اللى بيودى العملاء رايح جاى ببلاش ده ممتاز
6.استاذ احمد سعيد مسئول السمكرو واستاذ لواء محترمين جدا وخدومين
7.مفيش يافتة كبيرة او اى حاجة لو انت رايحلهم فى الطريق ودى حاجة غريبة انا تهت
لولا اتصلت وقالولى على الطريق مع انه توكيل كبير

معلش يا جماعة طولت عليكم
لسه بعانى حاليا من تزييق فى التابلوه وفتحة السقف رجعت تانى تعمل صوت مع المطبات
فلو حد يعرف ايه المشكلة دى او واجهته نفس المشكلة يقولى
وفى النهاية
كنت بصراحة عايز اوجه كل الشكر للكل الثقائمين على المنتدى ده
ومنهم الاستاذ احمد مصطفى الراجل بصراحة قرفته تليفونات و اسئلة وباله طويل

و الدكتور يوسف Y2Y1500
و العضو zangry بصراحة هما اللى ساعدونى فى اختيار الزيت 1000 للفتيس
والعضوAhmazong حبيبى دوشته بردو اسئلة


وتحية لتوكيل اوتو ايجيبت فعلا حاجة كويسة ان فيه حاجة زى كده بمصروانصح اى حد يروح هناك

وشكر خاص ل مهندس اسلام ومصطفى

واستاذ احمد سعيد واستاذ لواء