مواقف وطرائف .. السوزوكيه .. (متجدد)

**elkomyalto** · 26-03-2012 02:00 AM

بسم الله الرحمن الرحيم

فى هذا الموضوع ان شاء الله سوف نحكى عن المواقف والطرائف
التى رايناها مع سياراتنا سواء السوزوكى او غيرها
او التى رأيناها مع غيرنا بسياراتهم
وهذا من باب الفكاهه

فارجوا المشاركه

وتقبلوا تحياتى

**elkomyalto** · 26-03-2012 02:05 AM

اول المشاركات اسمحولى ابدأ بها ....

اليوم وانا ماشى فى شارع الليبينى ال كانت المقابله فيه

كان ماشى ورايا واحد راكب هيونداى سيراتو وعمال يشد عايز يعدى منى
طبعا انا علشان بمشى فى هذا الشارع كتير فعارف مطباته والنقر ال فيه
المهم ان كان هناك مطب قريب فعملت نفسى هشد معاه وطبعا هو بلع الطعم
واخد المطب وطار الغريب انه نزل يشكرنى .... ههههههههه

مش عارف ليه ؟؟؟
تفتكروا ليه ؟؟؟

**hamaza81** · 26-03-2012 11:09 AM

المشاركة الأصلية كتبت بواسطة elkomyalto

اول المشاركات اسمحولى ابدأ بها ....

اليوم وانا ماشى فى شارع الليبينى ال كانت المقابله فيه

كان ماشى ورايا واحد راكب هيونداى سيراتو وعمال يشد عايز يعدى منى
طبعا انا علشان بمشى فى هذا الشارع كتير فعارف مطباته والنقر ال فيه
المهم ان كان هناك مطب قريب فعملت نفسى هشد معاه وطبعا هو بلع الطعم
واخد المطب وطار الغريب انه نزل يشكرنى .... ههههههههه

مش عارف ليه ؟؟؟
تفتكروا ليه ؟؟؟

للأسف يا أخي دا مش موقف طريف ولا حاجة
بالعكس انت المفروض تحاول تحذره إن في حفرة أو حاجة زي كدة

أما الموقف الطريف فعلا أنا لما كنت لسة بتعلم
وكان معايا ريجاتا
عندي مدخل الشارق ضيق وبيشيل عربية واحدة بس
فأنا داخل الشارع لقيت ان في عربية جوة الشارع
رحت اديت مارشدير ورجعت لورا ودوست دبرياج ومستني بقى الباشمهندس يطلع من الشارع
ونسيت نفسي وما اديتش غيار
راح الشارع فضي وقال ايه يا أخويا عايز ألحق الشارع قبل ما يتقفل
وادوس بنزين يامعلم الاقي العربية راجعة لورا مش طالعة لقدام
بس ربنا ستر ومالقيتش حد ورايا
وقعدت اضحك على نفسي ضحك

**alking_2006** · 26-03-2012 11:58 AM

و انا ماشى فى مره بعد الثورة بحوالى شهرين فى القاهرة الجديدة و كان الشارع فااااااااااضى و مفيش عربية كدليل قدامى و انا ماشى ببص على شمالى لقيت فيه باص ماشى على الشمال بالرااااااااحة ببص قدامى لقيت مطب بعرض الطريق و طويل و عميييييق (اتارى الباص اللى على شمالى كان بياخد المطب بالراحة من على شمال الطريق) طبعا انا مكنش فيه وقت افرمل قمت دايس بنزين زيادة و العربية قفزت من فوق المطب قفزة تدخل موسوعة جنيس لدرجة ان ضلوعى وجعتنى

المشكلة مش ضلوعى

المشكلة انى بعد ما اخدت المطب ما وقفتش اشوف ايه اللى حصل فى العربية و كملت الطريق

و اللى حصل بعد كدا ان كبوت العربية اتفتح و انا ماشى على سرعة و قام قافل على الزجاج الأمامى و مبقتش شايف اى حاجة من الطريييييييييييييييييق

الحمد لله ربنا ستر و ركنت على جنب و النتيجة ان الكبوت و 2 جنط احتاجوا سمكرة علشان اتعوجوا

**Amr Axel** · 26-03-2012 08:26 PM

موضوع جامد يا باشا تسلم ايديك

لا زقزوقة ديه دايما ليها معايا مواقف كوميديا جدااااا يكفي ان كل شوية الاقي مسمار العجل يتعوج لوحده و طقم المسوجر بيتكسر لوحده ههههههههههه

اكتر حاجة بقي ان العربية ديه بغزالة يوم لما بكون فايق و تمام الاقي العربية بتجري معايا
يوم انزل مقريف و قرفان من عيشتي العربية الاقيها بتشد بالعافية و حالتها حالة ههههههههه

اكتر المواقف اللي تنق بس تضحك او كما يقال شر البلية ما يضحك

كنت راكننها في وسط البلد رجعت لقيت حد طلع الاريال كله و كاسره و حاطط الجزء المكسور فوق السقف
عايز اقوله جاي ع نفسك كده ليه ههههههههههه

**elkomyalto** · 27-03-2012 10:50 PM

[youtube]JAO_O6yspNg[/youtube]

شوفتوا الكاوتش الاصلى
بيعمل ايه هههههههههه

**Lion_Heart** · 27-03-2012 11:07 PM

المشاركة الأصلية كتبت بواسطة elkomyalto

[youtube]JAO_O6yspNg[/youtube]

شوفتوا الكاوتش الاصلى
بيعمل ايه هههههههههه

عبقرى اللى عملها

**dr.hazem** · 29-03-2012 12:53 AM

خدو بقا الموقف ده طااااااااازة من الفرن
ههههههههههههههههههههه

وانا رايح التجنيد اول امبارح وعلى اول جوزيف تيتو من بعد ملف السندباد
لقيت كيا سيراتو حاطط الستيكر بتاع المنتدى قدامي

طبعا الحياه حلوة بقا رحت شادد وراه
نورتله افتكرني بشد معاه
وابتدت الحرب
هههههههههههههههههههههه
الساعه كانت 11 الصبح وزحمة شويه
رحت واخد اقصى اليمين وهوا خد اقصى الشمال وطرنا
غرزة يمني وغرزه شمال تقفل عليه ويقفل عليا وكل ده هوا مفهمش ان كل ده عشان الستيكر
ههههههههههههههههه
فتحت شباكي وشاورتله مخدش باله وافتكرني بكمل شد
جت في حته غرزتي قفلت وفتحت قدامه راح طار
المهم انا وراه جه في حته مزدحمة شويه رحت هوب ناطط قدامه
اديله فلاشرات يمين شمال غازات كلاكسات اشاور ولا الهوا
مش فباله

ههههههههههههههههههههههه

رحت قلت مبدهاش بقا انا اصلا مش مجنون اشد مع سيراتو يعني
ورحت كابس وابتديت شغل الزحمة
كنا احنا طلعنا كوبري الهايكستيب ونزلنا لقينا زحمة شديده وانا بقا قعدت اخرم اخرم
لغاية اما الطريق فتح شويه بعد منزل الدائري كان هوا محشور وسط الزحمة ورحت كابس تاني

المهم انا مش عارف فين التجنيد ده اصلا رحت شايف واحد عسكري واقف على جنب قلت بس اهو اديت انتظار وركنت جنبه
ازيك يادفعه
التجنيد فين قالي قدام عند اللوحه الحمرا يمين
ببص على شمال لقيته طالع بقا وفرحان فيا اني واقف
متشكرين يادفعه ورحت شارخ وراه
المهم انا امشي واقرب واقرب ببص هوب لقيت اللوحه الحمرا رحت ممدي الاشاره ومهدي وقلت يللا فرصه تانيه

شويه لقيته ركن قبلي وراح رايح يمين قلت بس ده نازلي
عروستي
ههههههههههههههههههههه

اتاريه داخل هو كمان التجنيد
دخلت ركنت وركن نزلتله عرفته بنفسي قالي تصدق انا مخدتش بالي من الستيكر انا من زمان قوي مدخلتش الموقع ومش فبالي
قولتله ياراجل حرام عليك بقا انت شايف ماروتي تفتكر انا ممكن اشد معاك؟؟
قالي ياعم ده السيراتو طلعت اي كلام
ههههههههههههههههه
المهم بدردش معاه بقا وركبنا الاوتوبيس بتاع الجهاز وداخلين جوه واذ افاجأ بصديقي طالع الاوتوبيس هو كمان
مش معقول ايه يا جدعان ده

المهم ارجع لعبد الرحمن صاحب السيراتو
طلع مستورد قطع غيار وعنده محل في التوفيقيه وبيجيب حاجات للماروتي

قلتله هجيب كذا فرد من العصابه واجيلكم زياره عالمحل
وقلتله على مشاكلنا مع القطع وقالي ان هوا رايح الهند قريب وممكن يجبلنا اللي احنا عايزينه وقالي انا مبجبش غير خامات كويسه

فقلت اما نبقى نشوف بقا

وافترقنا بسبب الورق جوه
الكلام ده كان اول امبارح

الحلو بقا كمان وانا مروح النهارده ببص في الباركنج شفت العربية بتاعته عرفتها من نظره
ههههههههههههههه

شايفين محاسن الصدف

سلامي