الموضوع: عاوز خبرتكم معايا أكرمكم الله

السلام عليكم و رحمة الله و بركاته

أولا أحب أعرفكم بنفسى أنا أحمد من القاهرة و لسة متخرج يناير اللى فات ...

المهم بقا يا شباب أنا ان شاء الله هشترى أول عربية فى تاريخ حياتى و عاوزها أيام لا تنسى ان شاء الله و نفسى تتكرموا و تساعدونى كأنى ابن أو أخ ليكم و هتشروله أول عربية فى حياته أكرمكم الله

سريعا كده أنا أول لما فكرت أشترى عربية كانت هتبقى سكودا أوكتافيا أوتوماتيك أو سيفيك أو جيتا .. طبعا الوالد كان هيبيتنى فى الشارع

المهم بعد كده فكرت بعقل حبتين و بعد كده حبيت أجيب يا كورولا أو بيجو 308 sw أو فوكس ... طبعا بابا وافق و لكن الوالد المرة ده كان قلبها حنين حبتين

المهم وصلت لدلوقتى و الكل موافق على حاجة من اللى هقولكم عليه :

النترا 2012 .. الشكل تحفة و 130 حصان و استهلاك بنزين قليل 6 لتر لل100 كم .. سعر اعادة البيع حلو
المازدا 3 .. يابانى .. رياضية بحتة .. شكل بناتى !! بس معقول .. الصالون معقول .. سعر اعادة البيع لتحت
التيدا 2012 .. شكل تحفة و لو أنى مش متأكد انها نزلت مصر بالشكل الجديد و لا لأ .. يابانى .. مش عارف بقية المعلومات بس الناس بيشكروا فيها و لو ان كان فيه ناس بيتكلموا على نظام التعليق الخلفى (اللى برضه معرفش ايه هوة أساسا) .. سعر اعادة البيع لتحت تقريبا
ميجان 2012 .. فرنساوى .. شيك بس برضو بناتى !! مبتتباعش تقريبا سعرها النص بعد كده

ديه تقريبا كل معلومات عن ال4 اللى ف دماغى و دول أخر حاجة وصلت لأتفاق مع والدى و والدتى عليهم الله يكرمهما و يزيدهما و يبارك لهما ..

فيا ريت لو أخذ من وقتكم قليلا و تنصحونى بعربية منهم و يا ريت السبب برضه ...
و يا ريت تصحيح لمعلوماتى .. و برضوا لو تدلونى على مقارنة بين العربيات ال4 كاملة يعنى .. و لو فيه عربيات أفضل منهم فى نفس الرانج بتاع الأسعار ده .. يعنى من 120 ل 135 تقريبا

و جزاكم الله خيرا