الموضوع: [تقرير] تغيير تيل الفرامل في الياريس بالتيل الاصلي

السلام عليكم ورحمة الله وبركاته

بعد 5 سنين خدمة في الفرامل ! قررت اني اشيل التيل وارحمه من العذاب واحط تيل جديد

فعلا كتر خيره 5 سنين خدمة شاقة وماقلاش لاء

انا من الناس اللى مش بتعترف الا بقطع الغيار الاصلية وطالما هركب حاجة في العربية ياما اركبها بنفس جودة اللى كانت موجودة يا اما اسيب القطعة القديمة

نزلت سالت على تيل الفرامل عند فرع موزع تويوتا البرجسي في شارع مراد قالي ب 380 جنيه التيل الامامي بس تعالى كمان يومين

قلت مافيش مشكلة اروح اجيبه من الموزع اللى موجود في ظهر نادي الترسانة برضوا تويوتا

رحت هناك وسالت قالي 427 جنيه ! قلتله نعم ؟ ؟ لسه سال عليه قالي 380 جنيه ! راح رد قالي كل موزع ليه اسعاره

قلتله ازاي مش ده تويوتا وجمبه اجانس تويوتا والتاني نفس الكلام يعني الاتنين اصلي ؟ قالي ماعنديش خلفية !

المهم قلت استنى يومين وفعلا استنيت يومين ورحت لتويوتا البرجسي تاني جالك التيل

اه بكام ب 390 جنيه ! ليه ياعم ؟ غلي

طب هاته

اشتريت التيل وطلعت على ميكانيكي معرفة قلتله يركبهولي

طبعا مش عايز اقول ان التيل اللى طلع من العربية يكاد يكون في ربع حجم التيل الجديد ! !

مش هقدر احكم على الاداء لان لسه محتاجة فترة بس علما التيل يطبع على الطنابير

لكن عموما حسيت ان دواسة الفرامل ارتفعت عن الاول وبقت اتقل من الاول

واللى عجبني في الموضوع ان التيل القديم (اللى هو جاي مع العربية مغيرتوش من ساعت ماجبتها) نفس الجديد بالملي ! نفس الارقام اللى مكتوبة ونفس علامة تويوتا محفورة على التيل فده برضوا بيخلي الواحد يطمن انك حطيت للعربية قطعة غيار بنفس الجودة اللى كانت جاية بيها من اليابان !

اسيبكم مع شوية صور للتيل الجديد والقديم









الفرق واضح مابين حجم التيل القديم والجديد ! !

ودي شوية اسعار قطع غيار الياريس سالت عليها بالمرة (طبعا قطع غيار كلها اصلية من الموزع المعتمد)

سير الدينمو : 195 جنيه
فلتر بنزين : 475 جنيه
بوجيهات : 65 جنيه
طنابير امامي : 1350 جنيه
تيل امامي : 390 جنيه
تيل خلفي : 170 جنيه