تقرير تغيير زيت فتيس الياريس

**Ahmod** · 16-06-2012 11:06 AM

السلام عليكم ورحمة الله وبركاته

تكملا لموضوع م / عاصم واللى نصح فيه ملاك تويوتا ياريس بضرورة فحص وتغيير زيت الفتيس "الاتوماتيك"

http://www.nilemotors.net/Nile/292852-a.html

طبعا للاسف في كل مراكز الخدمة وعند اغلبية الفتايية !! اقصد الميكانيكينة !

بينصح بتغيير الزيت عند 80.000 كيلو متر ! على الرغم ان المانويل " الكتالوج " بتاع العربية بيوصى بضرورة تغيير الزيت عند 40 الف كيلو متر او 48 شهر ايهما اقرب !

الباشمهندس عاصم نزل الزيت على 80 الف وبيقول نازل اسود وهباب !!

وانا كان بقالي مدة ناوي اغير الزيت نظرا لان كنت احيانا بحس بنتشة في النقلات على السرعات العالية + العربية كانت بتتاخر في ال Kick down !! الى غير انها كانت بتيجي عند سرعة 160 وتقف !!

فموضوع الباشمهندس عاصم شجعني وتوكلت على الله

اولا رحت اشتريت زيت الفتيس الاصلي <<< وانصح اي حد يخليه في الموضوع ويتشري الزيت بتاعها كفايا انه صنع في اليابان و Made By Toyota! ده سعره 250 جنيه 4 لتر !

اشتريته من عند العالمية " موزع قطع غيار معتمد في شارع دمشق " اعتقد برضوا الزيت هتلاقيه عند اي موزع قطع غيار تويوتا يعني مش شرط من شارع دمشق

بعد كدة اشتريت جوان ! لان طالما هنفك الفلتر وننضفه لازم جوان جديد

من هنا لهنا حوالت اجيب الجوان المصري ! نظرا لانه مش مستاهلة جوان اصلي ! بس ملقتش

فجبت الجوان الاصلي بتاعها وده سعره 50 جنيه

بعد كدة حاولت اركبه في اي بنزينة مارضوش !! في البنزينات بيقولو عشان تنضف الفلتر وتفك الكارتيرات لازم ميكانيكي !!

رحت لمركز صيانة جمب البيت عندي بتعامل معاه بقالي مدة

الصانيعي فك مصفة الزيت من تحت ! اول حبة نزلو من المصفى بصراحة كان الزيت مسود !!!

بعد كدة بدا بفك الكارتيرة والجوان

وهوووب راح مطلع الفلتر !! بس بصراحة حبة الزيت اللى نزلو مع الفلتر كان لونه طبيعي ويكاد يكون نفس لون الزيت اللى اتحط !!

لكن هي مش بتتقاس برضوا باللون وبس

نضفنا الفلتر بالبنزين وبعد كدة ركب يا معلم وركب الجوان وكله تمام

نزلنا العربية

والزيت بيتزود من مقياس زيت الفتيس حطينا ال 4 لتر كلهم بالتمام والكمال

للاسف كنت مصور صور اثناء التركيب وشكل الفلتر بس اتمسحت مني بالغلط

عموما بالنسبة للانطباع بعد التركيب :

احساس النقلات مافرقش كتير كذلك وكذلك تسارع العربية الفرق بسيط للاحسن طبعا

لكن النتشة اللى على السرعات العالية راحت كذلك التاخير في ال Kick down مابقاش موجود الحمد لله

وطبعا اهم حاجة ان الحمد لله مشكلة ال 160 اتحلت ودي صورة كدة على السريع ومعلش لانها مش موضحة اوي

ياريت فعلا الناس تاخد بالها من موضوع زيت الفتيس لان فيه ناس كتير للاسف بتركز فقط على زيت الماتور !!

انا شايف انه كواحد سواقته عادية وهادية ينزل الزيت على 60.000 هينزل معاه بدون مشاكل ان شاء الله ومش هيكون محتاج ينزله قبل كدة

اما لو واحد بيحرق كتير فممكن ينزله على 40 او 50 الف على حسب طبيعة سواقته وعلى حسب هو حاسس بمشاكل في النقلات او تقل فيها ولا لاء !!

اما بالنسبة لفلتر زيت الفتيس فهو بيتغير مع التغيرة التانية

وطبعا مش هوصيكم -- Highly recommended انك تحط زيت الفتيس بتاعها !! دون عن اي زيت تاني

**me_medoo** · 16-06-2012 04:38 PM

ََََََََََََ

أحمد باشا الف الف مبروك يا باشا
على تغير الزيت الفتيس وتقرير رائع ... وهيا شركة العالمية شركة محترمة ... وحاجتهم نضيفة ... بس انا أعتقد ياباشا أن الزيت ده صناعتوا أمراتي مش ياباني . هو لو ياباني يبقى في الجون ... بس عامةً كل زيت من زيوت تويوتا ممتاز .

ًًًًًًًًًً

أنا ناوي أنشاء الله أغير زيت المتور ومحتار في فلفين ولا كاستروا ولا لوكي مولي ... بس وحياتك بسم الله مشاء الله تويوتا تويوتا ... حتى لو حطينا فيها زيت عباد الشمس كريستال ولا زيت جنة أو عافية ولا حتى محطناش زيت خالص وحطينلها حتت زبدة أو معلقة سمنة هههههههه .
بسم الله مشاء الله ... تسلم أيدك ياباشا
وتقرير رائع . وربنا يباركلك فيها يارب ويكفيك ويحميك من شر الطريق .

@@@@@@@@