الموضوع: قولولى هو الجنان يوصل لكدة ؟

النهاردة من شوية ماشية فى شارع الفردوس وقبل التقاطع مع صلاح سالم كدة الاقى ورايا تاكسى ابيض فى اسود بيعمل حركات غريبة شوية يعنى شمال فى يمين بطريقة تدل على جنان السائق المهم ماخدتش فى بالى طالما ورايا
قرصت شوية الحق الاشارة قبل ما العسكرى يقفل وفعلا عديت واللى بعدى وقفو
جيت بقى عند الشارع بتاع ترب الغفير اللى باخده عشان اطلع اتوستراد والاقى السواق ده جى زى الصاروخ من ورايا وعدى من شمالى وجه قدامى وقام معرض العربية ونازل يقولى ايه اللى انتى بتعمليه فى الشارع ده ؟
طبعا افتكرته على طول وقلتله انا عملت ايه ؟
قالى انتى كسرتى علية بالعربية يابنت ال .......
قلتله نعم ؟
قاللى مشكلتك انت ولية ......وقعد يخبط على البربريز والكبوت
قلتله اجرى يالة من هنا ... تبقى امك بدون انفعال ومش عارفة لسانى طاوعنى ازاى اقول كدة
جنبى ميكروباص بيساله هى الست عملت ايه قام قايله كسرت المرايا
مش عارفة ازاة اكسر المرايا وهو وارايا وماجاش جنبى اصلا
المهم ابص على المرايات يمكن انا مجنونة وعملت كدة فى لحظة غيبوبة الاقى المرايات سليمة ومفيهاش اى حاجة
وبعدها قام واخد بعضه وماشى
طلعنا على الاتوستراد لقيته بيزنق علية ومش عايز يعدينى قمت قارصة قام لامم نفسه على طول وماشفتوش بعد كدة
ده اسمه ايه وعمل كدة ليه ومعايا ولادى التلاتة وهو ده اللى خلانى رديت عليه لما شتم . ماحبتش ولادى يشوفو ان واحد ممكن يتبلى على امهم وهى تسكت وتبقى مغلوبة على امرها وخصوصا انى مش مغلوبة على امرى اصلا
لما حكيت لجوزى قالى تلاقيه كان عايز يقلبك فى عشرين جنيه والا حاجة
انا اتكلمت كتير والموضوع لسة طازة بس حبيت اعرف رايكو ايه فى حاجة زى كدة

يفضل للبنات والسيدات ان يكون معاها اسبراي او اي حاجة لحماية نفسها وممتلاكاتها .

والافضل دائما ماتقفيش للاشكال دي نهائي .
واسفين لحضرتك علي الي صدر منة لانة مش راجل اساسا .