الموضوع: تجاربى مع العزل

السلام عليكم

هحكيلكم تجربتى مع موضوع عزل الكابينه لوجان 2010 عمله 40 الف كيلومتر .....

1. اول ما اشتريت العربيه ولمدة 5 اشهر ولا جه فى بالى قصة الحراره ولا حسيت بيها ..وابتديت اعرفها من الموقع هنا على نايل موتورز ومن ساعتها ابتدى الهسس كل شويه احط ايدى واحس بيها واتابعها ...فقلت لما اروح توكيل العبور هاركبها....
2. رحت توكيل العبور وطلبتها منهم واتركبت ولقيت القصه انها عباره عن لباده 30 سم فى 30 سم بيركبها بيوجه بيها السخونيه بعيده عن القدمين اتجاه التابلوه او اسفل الدركسيون انت وظروفك ....
3. ظهر بعد كده موضوع الارما فليكس وطلعت على السبتيه لاول مره فى حياتى وطلع ان الموضوع اساسا مش اختصاصهم هو محلات خراطيم العزل هناك واحد فيهم كان بيبيعه لكن اصل المحلات دى فى وسط البلد شارع الريحانى متخصصين فى التكيفات وخراطيم تغطية المواسير
4. بينا على الريحانى ورحت واشتريته وركبته زى ما جه هنا ...الفكره غطا الماسوره بس مش الفرق الرهيب برضه ..
5. برضه الهسس مش مريحنى وكان عندى فكره فى دماغى من فتره انى اعمل عزل لباد للعربيه زى ما عمل زميل هنا لان كل همى بصراحه هو اكبر عزل ممكن عشان التكييف يكون اعلى درجة كفاؤه....
6. وانا ماشى فى وسط البلد فى محمد فريد بعابدين لقيت محل لبيع اللباد والارضيات للسيارات وسالت على اغلى نوع لباد وانظفهم المتر ب 30 جنيه واشتريت 2 متر على قد صدر العربيه...
7. كان فى دماغى كمان اعزل الشنطه الخلفيه لانه مكنش عاجبنى قصة لما احط حاجه فى شنطة العربيه فاكهه مثلا او اى شىء بتوصل للكابينه غير انه لو تلاحظوا ان الفاصل بين الكنبه والشنطه هو ظهر الكنبه بس من غير عازل فطبعا افضل شىء ليها هو موكيت اسود محترم زى الموجود فى الشنطه والارضيه وده جبته من مصر الجديده ميدان الجامع شارع المنصوره اشهر شارع للارضيات والموكيت هناك بس معرفشى عندهم لباد هناك ولا لا..
8. وكمان كنت عايز اعمل ارضيه جلد للعربيه ترحينى من تنظيف الموجود جبت الحاجات وطلعت بيها على السروجى وفهمته انه يركب اللباد فى صدر العربيه ويغطى بيها المواسير من غير ما يشيل العزل الرئيسى المتركب ويغطيه بارضية الجلد وفكيت بالمره الكنبه وظبطت الموكيت على الجزء اللى فى ظهر الكنبه كله وتحتها بالظبط وركبت الكنبه بعديها
9. النتيجه ان موضوع الشنطه شكلا وموضوعا ناجح جدا وطبعا اللباد على الارما فليكس على ارضيه جلد فى صدر العربيه مش بس شال قصة السخونيه ده خفف كمان من صوت الموتور داخل الكابينه بنسبة 50 فى المائه على الاقل
10. نصيحتى بعد التجربه دى ....الموضوع مش ضخم اصلا ولولا انى بتابع هنا مكنشى جه فى بالى ....اللباد الثقيل فى صدر العربيه هو افضل وسيله لتقفل الموضوع ده نهائى ....فكرة الموكيت الاسود فعلا ممتازه وانصح بيها الجميع......موضوع المواسير لاحظت عموما وقت تشغيل التكييف بتروح السخونيه منها تماما وغالبا دى فى سيستم التبريد والتسخين فى العربيه فهو عموما لا يؤثر نهائيا على تكييف السياره وجربوا كده وانتم مشغلين التكييف هتلاقوا المواسير مش سخنه نهائى .....حسيت ان التكييف سرعته فى التبريد اسرع يمكن بسبب ان الكنبه كان صهد الشنطه بيسرب للكابينه فالموكيت قلل من الموضوع ده......تركيب ارضيه جلد موضوع جميل فعلا .....نصيحه اللى مش شايف لا سخونيه ولا غيره ميحطش فى دماغه وعلى ما هو مستريح وشكرا

المشاركة الأصلية كتبت بواسطة me_medoo

الف مبروك ياباشا
بس معليش هو يعني ايه صدر العربية
هل قصدك تحت التابلوة عند الدوسات. ولا من جوا المتور. الصاجة الي هيا بتفصل بين التابلوه والماتور بتغطيها بلباد ياريت التوضيح. بالذات لفت نظري عزل صوت المتور دي كيفتني .... قوي

تمام...المقصود بيه اسفل التابلوه بيشد اللباده لفوق على قد ما يقدر فبتكون مغطيه صدر العربيه من داخل الكابينه ....فوق اللباده الاصليه بتاعة الفابريقه ....