الموضوع: تقرير شراء نيسان صنى الشكل الجديد

الف مبروك يا فندم لابن خالتك على العربيه. بالنسبه لحكايه الكاوتش هو ممكن يعمل الحركه الشهيرة و يبدل الاربع فرد مع بتاع محل الكاوتش و ياخد مكانهم بريدجستون جديد و يدفع فرق بس يعمل الحكايه دى و الكاوتش لسه زيرو علشان بتاع الكاوتش ياخدهم منه بسعر الزيرو فميدفعش فرق كبير

تسلم إيدك عالريفيو

مشكورررر
الف مبروك ليه
ربنا يبارك فيها ..

المشاركة الأصلية كتبت بواسطة blazer

السلام عليكم ورحمة الله وبركاتة

امبارح ابن خالتى اشترى الصنى الجديده وانا كنت معاه وهز بيشتريها

اشترياها من اوتو سمير ريان
اشترينا اللون الرمادى الغامق
بما انى ركبت الصنى القديمه كتير وسوقتها كتير فيارب تكون مقارنتى بين العربيتين حيادية


اولا العربيه شكلها جميل من بره وان كانت الكاوتشات تحسانها صغيره على العربيه شويه


العربيه عالية عن الارض بشكل كافى " حوالى 15 سم ارتفاع "

ماتورها 1500 والمفروض انهم عالجو مشكله استهلاك البنزين فى الصنى القديمة
العزل جيد جدا وافضل من القديمة
انوار العدادات ممتازه ولونها مريح للعين وممتعه بليل
الفرش شكله شيك
اكبر اختلاف ان العربيه بقت اطول بشكل كبييييييييير بدرجة انك لما ترجع كرسى السواق على الاخر
اللى وراك رجله بتبقى حره الحركه ومش مزنوقه خااالص
انما عرض الكنبه مزدش حاجه تقريبا

فيه فتحات " مروحه " خلفيه بتسحب الهوا من قدام ترميه ورا
فيها فوج لايت
abs
ebd
ba
2 air bags

كاوتش طاسات مقاس 15/185/65


اما العيوب اللى لاحظتها

درج التابلوه ديييق ومينفعش تشيل فيه حاجه
الكاسيت صوت سماعاته زباااااله وغير كدا الاريال بيركب فى السق وطوله حوالى متر وشكله زباااااله كانه توك توك
تقفيلها فيه عيوب بسيطه زى كاوتش الابواب نوعه مش عالى الجوده وكذلك الدهان فى اماكن الحامات مش متفنش بنضافه
جرايد السقف مهياش متثبته كويس ومتثبته بماده زى السليكون كدا لدرجة ان واحده اتفكت منهم
الكاوتش للاسف maxx نوع سىء


الحوض بتاع العربيه تقفيله معقول وان كانت القطع البلاستك ضعيفه ومش محمله

الشنطه وسعها معقول يعنى متعتبرش واسعه بس مش ديقه

العربيه لما سقناها صوتها هادى وان كان سير الكاتينة الجنزير له صوت بيبان وانت واقث لو ركزت

الفتيس بينقل بمنتى الهدوء والسلاسه وتسارع العربيه جيد جدااا

عداد الرحلات لذيذ وان كان مفيهوش غير عداد الرحلات واستهلاك البنزبن والمسافه اللى تقدر تقطعا بالموجود فى التانك
التكيف ادائه جيد جدا كعاده نيسان


المجمل العربيه صفقه ممتازه ورابحه بالنسبه لسعرها وانصح اى حد بيدور على عربيه عائليه واقتصادية وفيها عوامل امان انه يشتريها لانها فعلا افضل عربيه فى السعر دا

مبروك على العربيه

ومشكور على التقرير

ليا ملحوظه بلنسبه لطول العربيه .. العربيه قصرت عن القديمه ملميترات بسيطه ما طولتش ... واحساسك بلوسع ده سببه سحر هندسة السيارات

اما بلنسبه لملحوظتك بخصوص جودة البلاستيك فى الموتور والله العربيات كلها اغلبها بقت كده الهيونداى الاكسنت والريو والالنترا لما تفتح الكبوت وتبص على المكونات البلاستيك يوصلك نفس الاحساس

بس ليا سؤال هل سمير ريان لقيت عنده خليجى منها او سألته انه ممكن يوفرها؟؟

وايه الى استلمته مع العربيه؟؟؟

المشاركة الأصلية كتبت بواسطة land_cruiser

الف مبروك يا فندم لابن خالتك على العربيه. بالنسبه لحكايه الكاوتش هو ممكن يعمل الحركه الشهيرة و يبدل الاربع فرد مع بتاع محل الكاوتش و ياخد مكانهم بريدجستون جديد و يدفع فرق بس يعمل الحكايه دى و الكاوتش لسه زيرو علشان بتاع الكاوتش ياخدهم منه بسعر الزيرو فميدفعش فرق كبير

وممكن الكاوتش الى فى العربيه وهو زيرو يجيب كام تقريبا ؟؟؟

شكرا على التقرير
يا مسهل تقارير أصحاب العربية ابتدت تظهر
انا شفت العربية في اوتو سمير ريان , وعندهم سعر العربية ازيد ألفين علشان استلام فوري, ودا طبعا قبل الفصال