محتاج اعرف الطريق لعنوان في مصر الجديدة

**h0pa** · 04-07-2012 01:49 AM

السلام عليكم
ايه الاخبار يارب تكونوا تمام
محتاج مساعدة لانى غريب عن القاهرة
عاوز اروح لعيادة دكتور في مصر الجديدة, هو قالي العنوان في شارع غريب كدة انا كتبته المساجة ( كتبتها من كلمة مساج --- وعارف انها مش مساحة ) , فياريت حد يصححلي اسم الشارع علشان ما ابقاش ماشي زي الاهتم كدة مش عارف اسم الشارع ايه علشان علي الاقل اعرف اسأل عليه!
قالي المهم العيادة في الشارع ده خلف (كوستا كافيه اللى قدام نادي هيليوبليس ) طبعا انا عملت ناصح و قولتله عاوز الرقم الارضي ( علشان اجيب العنوان بالظبط من علي الدليل و ادور انا براحتي بقي وما افضلش اقوله شارع ايه ؟ ايه و الكلام ده
فلما جبت رقم التليفون دورت و برضه ما لقيتش حاجة :)
المهم رقمه اهو يمكن حد يعرف يوصله ولا حاجة ( 24519128 )
هو ده عنوانه اللى كتبته في الورقة بخط ايدي
المهم دلوقتي انا مش عارف اروحله ازاى
انا طريقي دايما يا اما بانزل من الزقازيق علي زراعة
فدلوقتي اروح للعنوان ده منين من زراعة او من اى محطة مترو تانية ؟! .
ولو عرفنا نروح بالسلامة نبقي نرجع ازاى برضه لاقرب محطة مترو ؟
بس ياريت المساعدة سريعا يا رجالة علشان نحجز عنده و نروح بسرعة
الف شكر مقدما و عارف انى هالاقي منكوا المساعدة
تحياتي

**mohamed_selim** · 04-07-2012 11:04 AM

طبعا انا مش عارف اسم الشارع بس ممكن لو قلت اسم الدكتور اقدر اساعدك بس على العموم انت تكمل بالمترو لرمسيس و تغير لاتجاه المرج و تنزل سراى القبه و من هناك تاخد تاكسى لروكسى و تقوله عايز انزل عند كوستا اللى قدام نادى هليوبوليس (هى مسافه مش كبيره بس ما تتمشيش) و هناك دور على العنوان

**Ahmed_Ramadan** · 04-07-2012 11:13 AM

أنت جاى منين أصلا ؟؟!!

**mohamed_selim** · 04-07-2012 11:26 AM

هو مش موضح قوى بس شكله من الزقازيق و بيجى لحد مترو كلية الزراعه

**Ahmed_Ramadan** · 04-07-2012 02:45 PM

طيب عموما فى طريق أسرع بكتير ... اركب من الزقازيق موقف العاشر و من هناك إركب ميكروباص رمسيس صلاح سالم و انزل أول النق و بعدين تاكسى.

أو تاكسى من موقف العاشر و قوله عاوز أروح نادى هليوبولس اللى فى مصر الجديدة عند القصر الجمهورى أول ما توصل عند بوابة النادى (هتبقى على شمالك) الناحية التنية هتلاقى كوستا كوفى و ابقى أسأل هناك.

**firstknight_eg** · 04-07-2012 04:19 PM

علي فكرة الشاعر اسمه "مفازة" روح عند نادي هليوبوليس هتلاقي كوستا في وش الباب الرئيسي جنب بنك السي اي بي cib - هو الشارع اللي ورا كوستا، روح هناك بس واسأل

**h0pa** · 05-07-2012 12:04 AM

شكرا يا رجالة علي الردود ومتأسف علي التأخر في الرد
لسة والله داخل حالا من برة
فعلا نازل من الزقازيق
موضوع سراي القبة ده سمعت عنه و اتقالي
موضوع انزل موقف العاشر و انزل اركب ميكروباص و بعدها تاكسي ده لفة شوية و انا هايبقي معايا والدتي و مش عاوز انططها في المواصلات فبادور علي طريقة سهلة تبقي مناسبة ليها بعيدة عن التاكسيات لاني ممكن اخد تاكسي من اى مكان لاى مكان طبعا بس المشكلة في الاجرة لانى دايما اقل مشوار باعمله بيدخله في 25 جنيه و بيبقي مشوار ما يكملش 3 جنيه عندنا في الزقازيق مثلا
فعاوز اعرف طريقة سهلة و رخيصة و بنت ناس
موضوع انى انزل شارع مفازة ( متشكر جدا علي المعلومة دي بجد كدة حسيت انى بقيت فاهم الدكتور كان بيقول ايه امبارح .. الف شكر فعلا ) عند نادي هيليوبليس :( ,,, ماهو انا اساسا بادور ازاى اروح لنادي هليوبليس :)
اسم الدكتور هو د.مدحت ميشيل عبد المسيح , هو اخصائي و استشاري مسالك بولية و جراح مشهور في مستشفي كوبري القبة.
متشكر جدا يا رجالة افدوتني كتير و مبسوط جدا من روح التعاون اللى لقيتها منكوا
وشكلها كدة هاترسي علي موضوع سراي القبة لانى متعود علي الخط ده و دايما في كوبري القبة ( والله لسة راجع حالا من هناك ) بس دلوقتي انزل من المترو و اعدي الناحية التانية ؟ اللى في اليمين ( اللى في ناحيته مستشفي كوبري القبة مثلا؟) ولا اطلع من باب المحطة اول ما انزل من باب المترو ؟
والتاكسي لو هاخده من قدام المحطة لحد كوستا كافيه هاياخد كام فلوس ( لو التاكسي اللى مافيهوش العداد الاليكتروني . اللى هو التاكسي القديم ) علشان ما ادفعلوش اقل من العادي و يبصلي بصة وحشة وبعدين يسمعني كلام اوحش و علشان ما ادفعلوش فلوس اكتر من العادي و اسمع منه كلام اوحش :)
وتاني حاجة لو وصلت بالسلامة و خلصنا و حبيت ارجع تاني هارجع بنفس الطريقة ؟
اخد تاكسي من قدام كوستا و اقوله محطة سراي القبة ؟ وهاتبقي نفس الفلوس مش كدة برضه ؟
معلش ردي طويل لكن انتوا عارفين بقي الغريب اعمي و خصوصا لو رايح لدكتور
تحياتي لكل المنتدي
سلام

**mohamed_selim** · 05-07-2012 10:39 AM

بص يا باشا .... ممكن كوبرى القبه او سراى القبه (دى محطه و دى محطه)
كوبرى القبه الاحسن تخرج من ناحية القصر هتاخد تاكسى و هيلف يطلع كوبرى القبه و يرجع على الخليفه المأمون
لو سراى القبه المحطه ملهاش غير باب واحد

المشوار بتاع 5-7 بس لو انت عايز تكبر اديله 10

هتقوله عايز اروح عند كوستا اللى قدام بوابة نادى هليوبوليس و من هناك ربنا معاك

الرجوع زى المرواح تاكسى لاقرب محطة مترو (سراى القبه او كوبرى القبه او حمامات القبه) و نفس الفلوس و ممكن اقل حاجه بسيطه

**h0pa** · 05-07-2012 10:56 AM

متشكر جدا لمساعدتك
ردودك هاتفرق معايا كتير

**mohamed_selim** · 05-07-2012 01:29 PM

تيجى بالسلامه ان شاء الله

الموضوع: محتاج اعرف الطريق لعنوان في مصر الجديدة

LinkBack

أدوات الموضوع

عرض

-

-

-

-

-

-

المواضيع المتشابهه

محتاج اعرف الطريق للعنوان ده في اكتوبر ضروري جدا

ضرورى جدا محتاج حجات لعفشه الماروتى محتاج اعرف سعرها

الطريق الي دمنهور من مصر الجديدة ؟؟

عايز اعرف الطريق من طنطا إلى العريش

ازاى اعرف ابعاد عربيتى فى الطريق

الكلمات الدلالية لهذا الموضوع

المفضلات

المفضلات

ضوابط المشاركة