محتاج حميير ضرورى

**dr_mohamed16** · 25-07-2012 02:11 PM

كل سنة و انتم طيبين
انا ان شاء الله مسافر و محتاج اربع حمير عشان ارفع عليهم العربية
انا محتاجهم بسرعه .. كانت عايز اعرف دول بيتجابو منين ولا بيتعملو عمولة ؟؟؟ من الاسكندرية
و كمان كنت عايز اعرف تكنيك رفع العربية على الحمير .. هلى هايحتاج كوريك تمساح كبير ولا ممكن بالكوريك العادى بتاعها ؟؟؟

**jackson_75** · 26-07-2012 02:28 AM

كل عام وحضرتك بخير .. من أسم الموضوع أنا أفتكرت أنك عاوز حمير لحم ودم فكنت هاقولك أطلع على سوق الحمير ,هههههههههههه(((-:
لكن بما أن الحمير المقصودة فى الموضوع غير الحمير اللى فى دماغى فعليك وعلى أقرب حداد .. ورمضان كريم

**MohammedAladel** · 26-07-2012 02:37 AM

يعنى من قلة الأسامى هو إيه المقصود بالحمير دى ؟

**MASERATI** · 26-07-2012 03:01 AM

السلام عليكم و رحمة الله و بركاته

اللى أنا أعرفه, أن اسمهم تحاميل, بس مش المهم الاسم, المهم, أنك تسافر و ترجع بالسلامة.

أنا اللى أعرفه, أنهم بييجوا من عند أى حداد و لازم يكون حداد أمين عشان يعمل اللحامات كويس و ماتقطمش من وزن العربية و لازم القاعدة تكون عريضة عشان ماتميلش على جمبها !!!!!!! .

**ahmed_mido1889** · 26-07-2012 03:15 AM

من شارع الجمهوريه في القاهره

اسمهم كفريتات

شوف الانواع والحجم

لازم ترفع بكوريك تمساح علشان تعرف تركبهم

وضروري ترفع العربيه بطريقه صحيحه

تحط شحم ابيض او فازلين علي جسم العربيه من بره

تحط زيت تخزين في الموتور وتملاه بيه علي الاخرعلشان الجوانات متنشفش

تشيل ال 4 فرد كاوتش وتحط اكياس علي الطنابير

تفصل كابلات البطاريه البطاريه

**amrelsaqqa** · 26-07-2012 03:49 AM

خليك في الخشب يا باشا بلاش حديد

الخشب افضل وارخص وعازل للبرومة

اعتقد ممكن تروح منشر خشب وتجيب منه زي ما انت عايز

هات اللى ورا قصيرين واللى قدام طوال ومهم الاطوال تبقى متساوية لكل جوز و السطح افقى و مستوى تماما من فوق ومن تحت

وطبعا بخصوص نصائح رفع العربية اضافة لللى الاعضاء قالوه تخلى بالك وانت بترفع انك تحط الخشب تحت الشاسيه مش تحت العفشة ( مش تحت المقصات مثلا ! ) لان طبعا ده غلط وممكن العربية تقع او العفشة تبوظ وطبعا مش محتاج اقولك ما ترفعش من عند الدواسات مثلا :D

وترفع عادى كل عجلة لوحدها وتحط الخشب وتنزل ببطء شديد وتتأكد بعد ما ترفع العربية بالكامل ان مفيش جزء مائل او معرض للانزلاق ...

البطارية لو سايلة افصلها وفضيها خالص واغسلها بمية وكربناتو لحد ما الوسط الحمضى يتعادل تماما واقلبها وسيبها تصفى كل المية وبكدة ممكن تعيد ملأها وشحنها بعد فترة طويلة بدون ما تبوظ او تحتاج تتغير

ومية الردياتير احتياطى تفضيها تماما حتى لو خضرا عشان ما تعملش صدأ في الموتور من جوة

بعد ما تنزل العربية ان شاء الله اول حاجة تعملها تحط المية عشان ما تنساش وتشحن البطارية وتركبها
طبعا هتغير زيت وبوجيهات على الاقل حتى لو كانوا جداد قبل الرفع
تراجع على كل شيء في العربية خصوصا الفرامل واي حاجة فيها كاوتش وجوانات ..

المكان يكون امن وقليل الرطوبة قدر الامكان ومحصن ضد الفئران وما شابه ..

وتروح وترجع بالسلامة يا باشا :)

**dr_mohamed16** · 26-07-2012 04:43 AM

المشاركة الأصلية كتبت بواسطة jackson_75

كل عام وحضرتك بخير .. من أسم الموضوع أنا أفتكرت أنك عاوز حمير لحم ودم فكنت هاقولك أطلع على سوق الحمير ,هههههههههههه(((-:
لكن بما أن الحمير المقصودة فى الموضوع غير الحمير اللى فى دماغى فعليك وعلى أقرب حداد .. ورمضان كريم

يا ريت .. كان اسهل :)

**dr_mohamed16** · 26-07-2012 04:45 AM

المشاركة الأصلية كتبت بواسطة mohammedaladel

يعنى من قلة الأسامى هو إيه المقصود بالحمير دى ؟

والله مانا اللى مسميهم يا سيد محمد :)
هم اسمهم كده

**dr_mohamed16** · 26-07-2012 04:46 AM

الف الف شكر على النصائح الغالية ديه
انا فعلا موضوع انى اسيب العربية سنه ده عاملى هسهس فى دماغى و مخوفنى
و انا فعلا ناوى اعملهم خشب اعتقد افضل
بس اسمحولى اطمع فى شوية اسأله كمان
بالنسبة لماء الريداتير ده يتفضى ازاى ؟؟؟
البطاريه جافة : هل لما اشيلها بيبقى ليها طريقة تخزين او شحن ؟؟ و لا اشيلها و اسيبها فى البيت و خلاص ؟
بالنسبه لزيت الموتور انا لسه مغيره فى صيتانة ال 10000 و انا دلوقتى عامل 11000 .. فا اعتقد ممكن اسيبه ؟

**jackson_75** · 26-07-2012 05:13 AM

بقول لحضرتك أيه .. لو عربيتك لوجان وتحب تبيع وتريح دماغك راسلنى على الخاص بس شرط الحالة .

الموضوع: محتاج حميير ضرورى

LinkBack

أدوات الموضوع

عرض

محتاج حميير ضرورى - انشر الموضوع فى :

-

-

-

-

-

المواضيع المتشابهه

محتاج مساعده ضرورى

محتاج رائيكم ضرورى

محتاج مشورتكم ضرورى

ضرورى جدا محتاج حجات لعفشه الماروتى محتاج اعرف سعرها

محتاج رد ضرورى

الكلمات الدلالية لهذا الموضوع

المفضلات

المفضلات

ضوابط المشاركة