اولا : الترصيص وقصته معايا
* انا كنت رايح بشتكى من موضوع الترصيص .. ودى كانت مشكلة كبيرة عندى
ومن هنا ياريت ناخد بالنا من الكلام اللى جى .. عشان مهم جدا
انا من فترة نزلت فى مطب كبير على كوبرى اكتوبر وكان فاصل فى الفواصل اللى على الكوبرى .. قطملى الجنوط اللى الاعضاء كانوا جبهولى هدية .. وطبعا نتيجة المطب ده حصلت خسائر كبيرة جدا زى جلب مقصات وجلب دونجل خلفى وجنوط سبور اتنين منهم اتقطموا
* المهم عملت المقصات وجبت جديد وجلب الدونجل سبتها لغاية دلوقتى .. ورجعت ركبت الجنوط الاصلية بتاعت العربية من تانى .. وركبتهم على الكاوتش اللى اشتريته للجنوط اللى اتقطمت ومقاس الكاوتش كان 205/55/15
المهم روحت التوكيل وركبت الجنوط القديمة الاصلية بتاعت العربية وفكيت الكاوتش الجديد لانه سليم واخدت ركنت الجنوط الجديدة لانها اتقطمت .. وعملوا ترصيص على جهاز هنتر امريكى فى التوكيل .. ولقتهم بيقولولى اعمل حسابك ان المرة الجاية تعمل حسابك فى جنوط سبور للتيدا جداد .. قولت ازاااى .. والجنوط دى الاصلية وكانت مركونة فى البيت شهرين .. وكانت سليمة ومفهاش حاجة .. المهم سكت ومشيت .. ولقيت فى غربلة .. رجعتلهم تانى فى مرة تانية واشتكيت من الغربلة ورصصوا .. وقالولى اعمل حسابك حتغير الكاوتش المرة الجاية لانه مش تمام .. وهنا لقيت تضارب فى الكلام .. مرة جنوط ومرة كاوتش ..
بس للامانة بعد ما قصتى انتهت .. وعملت الترصيص بره التوكيل ورجعت حكيت لهم عرفت ان العامل مكنش عارف يشتغل على الجهاز .. لان اللى عرفته من حكاية الترصيص دى ان خبرة العامل مهمة جدا
* المهم بصراحة انا قولت مبدهاش .. لما اكلم اخى وصديقى محمد يسرى عشان اجيب الكاوتش القديم لان شكل الكاوتش الجديد ده هو اللى فيه مشكلة على تخمينى
* فقالى تعالى ونكشف عليها يا احمد ونشرب الشاى مع بعض .. ويكون عرفنا الدنيا فيها ايه
وفعلا روحت وفكوا الكاوتش من العربية ..
وحطوا الكاوتش على جهاز هنتر امريكى ليزر حديث ..
* واللى عرفته من محمد ان ده تانى احدث جهاز نزل فى هنتر الامريكى .. والجهاز كله حساسات عشان تظبط العجلة .. ويتعمل الترصيص عليها بدقة متناهية
* وزى ما انتوا شايفين بيركبوا داخل العجلة كويل .. وكل فتحة فى اى جنط لها كويل مخصوص
* شوفته فى الصورة السابقة شكل الكويل .. ماسك بايده مقاسين مختلفين من الكويلات عشان بيشوف فيهم اى واحدة حتكون مناسبة فى الفتحة الدائرية اللى انتوا شايفينها فى الصورة
وظيفية الكويل ده عشان يزنق الكاوتش ويكون محكم ومفيش فيه اى زاوية ميل عشان فى حالة وجود اى زواية ميل ولو صغيرة بيحصل خلل فى الترصيص
* وموضوع تركيب الكويل المظبوط فى فتحة الجنط بيحكمه حاجتين .. خبرة العامل + التكنولوجيا اللى شغالة بيها جهاز الترصيص
* وبعد ما بيختار الكويل المناسب .. بياخد العجلة ويحطها على جهاز الترصيص ويضعها على جزء خلفه اسطوانة دائرية معدن شبه الطنبورة بالظبط .. عشان اكنه حاطط العجلة فى العربية بالظبط .. وده صورة الجزء الاسطوانى اللى شبه الطنبورة
وبعد كدا بيقفل على العجلة باحكام
ولو الجنط سبور بيكون ليه جلدة زى ما الصورة موضحة
عشان لما يقفل عليها متجرحش الجنوط الاسبور
* الصورة القادمة دى بتبين ان الكويل اللى العامل اختاره صح .. والمكنة بتاكد الكلام ده زى ما انتوا شافين فى الصورة
ولو كان فى غلط فى الكويل اللى اختاره العامل حتنور احمر
* وبعد كدا بيشغل الجهاز وبيقيس لوحده قطر الجنط ومقاسه وكام ريشة كمان عشان يظبط الترصيص صح عليه
* والصورة القادمة لجنط اخر غيرعربيتى .. والجهاز موضوح انه 17 وذاكر قطره ومقاساته .. وحتى رسمة الجنط كام ريشة زى ما انتوا شايفين
وكل ذلك موضح فى الصورة القادمة
والليزر بعد كدا بيحدد افضل مكان يتحط فيه الترصيص
ويفضل العامل يتابع القراءات لغاية ما يكتب ان كله تمام واوكيه
زى ما انتو شايفين فى الصور .. بيبتدى ياخد القراءات .. لغاية ما القراءات تكون على الناحتين اوكيه
:: بعض المعلومات اللى عرفتها وهامة عن الترصيص ::
* يفضل ترصص كل 10 الاف كيلو
* يوجد على الكاوتش بيكون فيه 2 نقطة .. واحدة حمراء وواحدة صفراء .. مفروض لما تلاقي النقطة دى تركب البلف ناحية اللون الاحمر ..
واذا كان الكاوتش مفهوش نقطة حمراء وفيه اصفر .. يبقا تركب البلف ناحية العلامة الصفراء
ولو مفيش اى نقطة على الكاوتش ولا احمر ولا اصفر .. يبقا ركب البلف فى اى مكان عادى
وحكاية النقطة دى وسرها .. عشان بيقولك ان مكان النقطة دى هى اخف وزن فى الكاوتش .. ومفروض تحط ناحيتها البلف لان البلف تقيل ويعوض العملية دى
عشان بتفيد فى تقليل نسبة الرصاص
* سر الترصيص الصح فى موضوع الكوين اللى شرحته .. مفروض قبل ما يشتغل العامل ويظبط على الجهاز مفروض انه يجرب العجلة ويلفها على الكوين ويشوفه مظبوط عليها ولالا ويتاكد انه الكوين اللى راكبه راكب صح ومقاس العجلة ..
وعلى فكرة الاوبشن ده مش موجود فى كل اجهزة الترصيص الموجودة فى مصر
المفضلات