الموضوع: القول الفاصل فى شريط الإير باج

الله ينور عليك

السلاام عليكم ورحمة الله

أولا احب اشكر الاستاذ محمد على الموضوع
انا بجد مكنتش اعرف ان في ناس كتير بتفكر تعمل حاجتها بنفسها، بجد فرحتوني لان أنا أصلاً غاوي من زمان وملقيتش حد من اصحابي كده.
المهم أنا حصل معايا الموضوع ده بعد ما اشتريت العربية بشهرين وبعدين صلحته بنفسي وبقاله حوالي سنة دلوقتي الحمد لله تمام
أنا قرأت الموضوع كاملا ولي بعض التعليقات أود مشاركتها معكم :
أولاً: سبب انقطاع الشريط (من وجهة نظري) ليس جودة الشريط ولا الاتربة، لكن تآكل العلبة البلاستيك التي تحتوي على الشريط.
لو رجعنا للصور اللي حطها الاستاذ محمد هتلاقو ان العلبة دي عبارة عن قطعتين واحدة ثابتة في عمود الدريكسيون والتانية بتلف جواها وطالع منها الفيش. وفي وسطهم قطعة بلاستيك بيضاء مستديرة اللي بيلف الشريط عليها (برضو موجودة في الصور)
معلش هقتبس الصورة باتعت الاستاذ محمد اذا سمحلي


القطعة البيضاء دي فيها سنون ترس من ناحية وهناك أيضاً سنون ترس في القطعة الثابتة، وبين الاسنان دي والاسنان دي هتلاقو ترس صغير.
المفروض القطعتين الثابتة والدوارة بينهم خلوص يسمح بالدوران وفي نفس الوقت يفضل محافظ على الترس الصغير انه ما يطلعش من مكانه
مع الاستخدام يتآكل البلاستيك ويتحرر الترس الصغير وهنا يتوقف القلب البلاستيك الأبيض عن الدوران ولا يقوم بلم الشريط فبتحصل الكعبلة ثم القطع
اللي مخليني باقول كده ان انا لحمته مرة وركبته ورجع كعبل بعدها بيوم فقلت لازم اعرف سبب الكعبلة.
وبعد الفحص وصلت للي بقول عليه. لو مسكت العلبة بتاع الشريط، المفروض الجزء الدوار ينفع يلف يمين أو شمال لكن مش المفروض انه يتحرك لو حاولت تشده للخارج أو تدفعه للداخل
يعني لو مسكت العلبة بايدك الشمال والقطعة الدوارة بايدك اليمين وحاولت تشدهم من بعض المفروض انهم ما يبعدوش عن بعض ولو لمللي واحد
علشان كده أنا جبت اسطوانة بتاع كمبيوتر CD وصغرتها بالمقص ولزقتها بالامير داخل العلبة لتعوض التآكل اللي حصل للعلبة، تقريباً في الارضية بتاع القطعة الدوارة اللي فيها الفيش على ما أتذكر.
وعلى فكرة البلاستيك بتاع اسطوانة الكمبيوتر ناعم جداً فاحتكاكه ناعم جداً
وبعدين لحمت الشريط تاني، أنا بألحم بنفسي على فكرة، وقفلت العلبة والحمد لله من يومها للنهاردة تمام

ثانياً: جودة الشريط أنا شايف انها ممتازة، لو فضل الميكانزم اللي بيلف الشريط ويلمه شغال، الشريط ده هيفضل يلف ويتفرد عشرات السنين. مش هيتقطع

أما موضوع انه يستحمل ولا لأ، فبما اني مهندس الكترونيات أحب اقول انه فعلاً زي ما قال أحد الاعضاء الكرام أن العبرة بالتيار اللي بيمشي في السلك هو اللي بيحدد المساحة العرضية له Cross-section area بس اللي أحب أضيفه أن السلك ممكن يستحمل يمشي تيار اكثر من الطبيعي بس لفترة زمنية قصيرة، والمثال الشهير على كده، هو مانع الصواعق فوق المباني حيث يجتذب البرق ،وهو عبارة عن جهد عالي جداً استطاع أن يمر في الهواء، ثم يمرره من خلال اسلاك الى الارض.في الوضع الطبيعي، هذه الاسلاك لا تتحمل كمية التيار التي تمرره الى الارض.
ولذلك الاسلاك في الشريط أكثر من كافية لنقل التيار الى الايرباج في حالة الحادثة لا قدر الله
ومثبت السرعة لن يتعدى استهلاكه كام مللي امبير معدود ولو لاحظتم، الكلاكس مش بيستخدم الشريط خالص.

وفي النهاية أحب أشكر كل اللي ساهموا في الموضوع ده وأولهم صاحب المجهود الكبير الاستاذ محمد
تحياتي

السلام عليكم

أنا لما حصلت عندي المشكلة دي، الحمد لله كان القطع من عند الفيشة، ولم يكن عندي أي أجزاء مكسورة.
وقطعة لسان الشريط دي في رأيي مش هتتكسر غير لما الشريط يتكعبل وهشرح ليه بقول كده
لسان الشريط بيحدد اتجاه خروج الشريط، ولما الدريكسيون بيلف بيبتدي الشريط يلف فوق اللسان ده، ولما يلف في الاتجاه الآخر، بيبدأ يفك من على القلب الداخلي ده ويقوم القلب الابيض الخارجي بلمه ولما يوصل الدريكسيون لآخره، ما بيكونش الشريط عكس اتجاهه فوق اللسان لان المفروض انه ما بيكنش اتفك للآخر
معلش بصو معايا على الرسمة دي هي مش واضحة اوي بس هحاول اوضح


مستحيل الشريط بيكون بيعكس اتجاهه فوق اللسان، ما فيش شريط في الدنية هيستحمل كده ساعة واحدة. ولو عاوز تصدق اكتر، بعد ما تصلح الشريط ان شاء الله، لف الجزء الدوار ناحية اليمين لحد ما تحس أنه وصل للآخر، وبعدين فك العلبة وشوف الاتجاه بتاع الشريط وبعدين ركبها ولف ناحية الشمال وبرضو شوف اتجاه الشريط.
الملخص ان في الوضع الطبيعي، الشريط دايما يلف على القلب الداخلي و يقوم القلب الخارجي بلمه لما يعكس القلب الداخلي اتجاهه
وهنا احب اسالكم سؤال: ايه اللي يحصل لما القلب الداخلي يعكس اتجاهه ولا يقوم القلب الخارجي بلم الشريط؟
بيتهيألي الاجابة هي اللي في الصورة
وأيه الشيء الوحيد اللي ممكن يمنع القلب الخارجي من الدوران عشان يلم الشريط؟

هرجع للترس الصغير، صحيح ممكن يبان ان شكله ثابت في مكانه، بس ده طول ما هو في الوضع الافقي لكن العلبة بتكون في وضع رأسي. تخيل كده حاجه محطوطة على تربيزة وحاجه هتتحط على حائط.
وبعدين اللي مأكدلي الفكرة اني قمت فعلاً بالتجربة

أما موضوع اللحام ده، والله يا باشا مش عارف اقولك ايه، كل اللي اقدر اقوله انها ممارسة بس فكرة اللحام عند الناس بتوع الموبيل فكرة كويسة خصوصا ان الاسلاك بتاع الشريط رفيعة وجنب بعضها

وارجو التوفيق للكل
تحياتي

معلش نسيت اقول حاجة
انا لما اتكلمت عن جودة الكابل كنت حابب بس اضيف معلومة عامة عن الاسلاك الكهربية وكلامي المفروض انه بيأكد ان الكابل بتاع الطابعة فكرة صحيحة وانه ان شاء الله هيشتغل صح بس لو لقينا واحد بنفس الطول او اطول شوية زي الاستاذ محمد ما قال وبنفس عدد الاطراف او اكثر
وعلى فكرة الكابل ده اسمه FFC أو Flexible Flat Cable

ده لينك لصفحة بيبيع كابل FFC طوله 60cm وفيه 16 طرف
Sumitomo-G AMW 2896 80C Cable FFC-16P-600MM

وده لينك لمصنع بيعمل حسب الطلب والمواصفات، مش عارف ممكن يعمل لمستخدم عادي ولا لأ بس ممكن نبعت نسأله
FFC - Flat Flexible Cable Assemblies by Hansoft

تحياتي