الموضوع: ظبط الكهرباااااا

السلام عليكم
انا معايا Ibiza 1994 1300cc
الحمد لله وبعد معاناه شديدة, قررت اروح أظبط الكهرباء عند واحد بيجيب من الاخر
انا كانت عندى العربية متبرجله كده وفى لخبطه فى الكهربا بمعنى انى لو ماشى فى امان الله
وفجأة واحده المروحة اشتغلت أو قلبت النور العالى, صوت الموتور يتغير, ولازم ازود سنه بنزبن عشان يتعدل تانى
قبل كده, كانت جت عليها فتره وتبطل خالص, بس ظبطتها اى كلام عند واحد نص كم زمان

المهم, روحت عند رشاد فى الحرفيين من اسبوع, ووصل الكومبيوتر وبيقولى افتح الكونتاكت وسيبه
وقعد يجرب حاجه كده, قالى الايدل عندك مش شغال, قلتله ايوا فعلا مش بيشتغل, ايه بقى الايدل ده ؟؟؟

المهم فك الاكياس البلاستيك اللى على الكنترولر. وبصله قوى كده, بصله جامد
وقالى ان الكنرولر ده مش بتاع العربية دى, ده بتاع جولف
الصراحة انا فرحت جدا جدا وكنت عايز اسقف من كتر ما انا متغاظ من صاحب العربية القديم

وصل كنترولر تانى بتاعها وجرب لقينا الايدل شغال, قالى بس كده, روح جربها كده 5 وارجعلى
طلعت بيها لقيتها بتسحب كويس, السرعه القصوى لكل غيار عادية, بس السحب اختلف ومافيش رجه او رعشة مع النور العالى او اى كهربا
رجعتله تانى وقالى ان الموتور بيطلع بخار مايه وان حالته كويسه, وان العربيه هاتوفر معايا بنزين جامد
وحوار البنزين ده فعلا حصل, العربيه اتلمت وبطلت تاكل بنزين اخيرا

المهم ان الحمد لله العربية اتظبطت كده, وكل شويه كده هاروح اظبط فيها كمان
الكنترولر بقى باعهولى ب 400 جنيه, اعتقد ان كده كتير شويه, خيرها فى غيرها بقى

المشاركة الأصلية كتبت بواسطة matrix012

الموتور ال 1300 الكربراتير الهاف انشجيكشن فى رشاش واحد من فوق بوابة الهوا بيبقى فى كنترول

كلام سليم 100% وبيبقى اسمها (single point injection) او باختصار SPI وده بيكون رشاش واحد على الكربراتير او البوابه
والكنترول بتاع نفس شكل وحجم كنترول الانجيكشن وراكب كمان فى نفس المكان
انا عربيتى 94 وكانت هاف انجيكشن و لما سقطت مكنه شيلت الكنترول القديم وركبت الكنترول اللى جاى مع المكنه