مقارنه بين الأوكتافيا والجيتا

**elbaz18** · 21-11-2012 12:07 AM

بسم الله الرحمن الرحيم
أرجو من اعضاء هذا القسم الجميل ان لا يبخلوا عنا بمعلوماتهم القيمه
انا محتار فى اتخاذ قرار الشراء بين عربيتين
1- اوكتافيا a5
2- جيتا
والاتنين هيكونو مثلاً موديل 2008 لانى بشترى مستعمل
لكن الاوكتافيا هتكون اوتوماتيك او استيبترونيك والجيتا لو جبتها هاجيبها مانيوال علشان سمعت ان فى مشاكل فى الفتيس الاوتوماتيك بتاعها وغير كده كمان علشان تكون فى حدود الامكانيات بتاعتى وبكده هيكون العربيتين بنفس السعر تقريباً
ايه رأيكم شاركونى الرأى احسن انا محتااااااار جدااااااا

**inspiron** · 21-11-2012 12:24 AM

شوف يا سيدي الفاضل..

في البداية خلينا متفقين إن الأوكتافيا والجيتا الأساسيات فيهم واحدة ( موتور-فتيس-تعليق-شاسيه)
فبطبيعة الحال فتيس الجيتا مفيهوش مشكلة وزيه زي الأوكتافيا..كل ما هنالك ( في العربيتين ) الفتيس لازم لازم لازم لازم تغير زيت الفتيس وفلتر زيت الفتيس كل 60000 كم كحد أقصي.بتكلفة حوالي 1300 جنيه تقريباً.واذا مواظبتش علي الموضوع ده..قول علي الفتيس السلاااااام..وكل واحد يتحمل نتيجة تكبير دماغه في الموضوع ده..

نيجي بقه للإختلافات الجوهرية بين العربيتين..

بما إننا في منتدي سكودا..هذكر النقط الخاصة اللي في صالح الأوكتافيا عن الجيتا :-

- Aerodynamic أفضل في الأوكتافيا وده بيخليها تحقق سرعة قصوي أعلي من الجيتا.
- سمك صاج أكبر من الجيتا..أكثر أماناً من الجيتا..تقدر تحكم علي النقطة دي بعينك..شوف العربيات الأوكتافيا في السمكرة بتطلع عاملة ازاي وشوف الجيتا بتطلع عاملة ازاي.هتلاقي الأوكتافيا زي الفابريقة..وده لأن الصاج بتاعها محمل جامد.
- شنطة الأوكتافيا ممكن تفرش وتنام فيها :).

دي أوجه الإختلاف فقط بين الأوكتافيا ( A5 ) والجيتا
لأن لو كان الكلام علي فانتازيا كان هيبقي فيها إختلافات كتير.

في النهاية العربيتين حلوين وجمال جداً ومحترمين ونفس الركوبة..وربنا يوفقك لما فيه الخير إن شاء الله

تحياتي

**inspiron** · 21-11-2012 02:04 AM

المشاركة الأصلية كتبت بواسطة Dr/ P.K.Sh

انا عندى جيتا 2008 الفتيس القديم جميلة جدا
لو هاتجيب جيتا هات 2008 او اقدم عشان دة الفتيس القديم لا يوجد بة مشاكل
الاتنين نفس الاساسيات بس الجيتا خامات احسن بكتير من الاوكتافيا عشان الجيتا عليها علامة فولكس فاجن ودى الاساس
الجيتا مصنعة لامريكا لكن الاوكتافيا مصنعة لشرق اوروبا الفقيرة
مش معنى كدة ان الاوكتافيا وحشة بس انا حبيت اوضح الفرق بينهم

!!!!!!!!!!!!!

**طارق _عبد السلام** · 21-11-2012 04:02 PM

المشاركة الأصلية كتبت بواسطة elbaz18

بسم الله الرحمن الرحيم
بجد انا مش عارف اشكركم إزاى يا جماعه على اهتمامكم وردودكم الجميله دى
لكن انا فى استفسار مهم جداااا جداااا دلوقتى انا سمعت من اكتر من حد ان الفتيس الاوتوماتيك (استبترونيك) بتاع العربيتين الاوكتافيا والجيتا فيه مشكله بعد فترة بيبوظ فيه حاجه اسمها (عقل فتيس) ودى بــ 15000 فى التوكيل والكلام ده سمعته من كذا شخص لأنى ماكنتش مصدق الرقم الرهيب ده
فمعنى كده انى افضل حل هو انى اتجه للمانيوال ولو اتجهت الاتجاه ده يبقه ماليش حل غير الجيتا لأن الاوكتافيا مافيش منها مانيوال من اول 2008
انا اسف طولت عليكم لكن انتم بقه اهل الخبره

المانيوال موجود لو عايز 2012 كمان
العربيه بينزل منها المانيوال عادى
وموضوع عقل الفتيس مشكله عدم تغيير الزيت وتنظيف الفلتر للفتيس بعد 60 الف كيلو
وتقريبا لدلوقت ماظهر مشكله فى فتيس الفانتازيا يعنى ماقابلت للان مشكله ان حد غير عقل او فتيس للفنتازيا
وبعدين هقول لحضرتك رأى فى المفاضله ولك حق الاختيار
حضرتك شوف انتشار الجيتا وتواجدها بالنسبه للاوكتافيا فى مصر
حضرتك الاوكتافيا اخذت ثقه ناس كتير وتقريبا العربيتين واحد بس المقارنه لصالح الاوكتافيا
ولولا تعدد الاذواق لبارت السلع
وربنا يوفقك للأصلح لك ان تختار بين عربيتين اوروبى ومحترمين والاثنين من شركه واحده يعنى ان شاء الله اختيارك موفق بس الكفه تميل للاوكتافيا من رأيى الشخصى ورأيك انت المهم