تقرير صيانة 10000 فى التوكيل فرع اسيوط

**wassim_nasser** · 03-01-2013 01:15 AM

مساء الخير على جميع اعضاء منتدانا الكرام .. يارب تكونوا بخير وفى احسن صحة ..

يوم الاحد اللى فات رحت فرع التوكيل فى اسيوط عشان صيانة ال 10000 .. و تظبيط بعض الحاجات فى العربية .. و كنت ناوى اركب عمود الاتزان بس للاسف فوجئت ان فية بعض مستلزمات التركيب ماوصلتش من الفرع الرئيسى فى القاهرة .. لكن ان شاء الله اركبة فى اقرب وقت وارفع تقرير بالموضوع .. خصوصا انى لما اتناقشت مع المهندس المسئول أكدلى انة مهم جدا جدا لسلامة و اتزان العربية (دة رأية الشخصى) ..

المكان:

مبدأيا فرع التوكيل فى اسيوط اتعمل عشان يخدم منطقة سوهاج و اسيوط و المنياو الوادى الجديد .. نظرا لصعوبة السفر للقاهرة لعمل الصيانات الدورية ..

لو انت جاى من سوهاج على الطريق الزراعى هاتدخل اسيوط عادى جدا من النفق و تكمل على طول و تعدى المرور و الكورنيش و نفق الزهراء ومن بعدة الكمين اللى هايطلعك على الطريق الزراعى المؤدى لمنفلوط .. اول ماتوصل لتقاطع الشرطة العسكرية (هاتلاقى مكتب الشرطة العسكرية على شمالك) و متفرع من جنبة الطريق اللى يوديك للمطار .. خد الطريق دة بالظبط 400 متر هاتلاقى التوكيل على يمينك و قصادة بوابة المنطقة العسكرية الجنوبية .. و خد بالك عشان اليافطة صغيرة و التوكيل تحت الارض

اما لو انت جاى من المنيا .. فا قبل اسيوط ب 3 كم هاتلاقى مكتب الشرطة العسكرية على يمينك .. ادخل الطريق اليمين و امشى 400 متر هاتلاقى التوكيل

المكان نفسة صغير و تحت الارض .. لكن رينو التزمت بالمعايير الاساسية .. مهندسين و فنيين على درجة عالية من الكفاءة .. اجهزة متطورة و قطع غيار متوفرة .. صالة انتظار مكيفة مع المشروب و تليفزيون لو حبيت تتابع اى حاجة لحين انتهاء الصيانة .. المهندس و الفنيين كانوا متعاونين جدا و بيجاوبوا على كل الاسئلة .. و احيانا كان الفنى بييجى صالة الانتظار يندهلى عشان يفهمنى اى حاجة كنت باوصية عليها

صيانة ال 10000

الصيانة شملت اختبار كهربا العربية ( التكييف - الازاز الكهربا - الكاسيت - الاضاءة - الاشارات و الكلاكس - دراع المساحات) .. و فحص السوائل ( زيت الفرامل - التبريد - زيت الباور ) .. تغيير زيت توتال كوارتز 10000 .. تغيير فلتر زيت .. تنضيف ايدل بوابة الهوا .. فحص شامل للعفشة ( كبالن - مقصات - مساعدين - ربط المصفحة اللى تحت كويس ) .. بس زودت حاجتين كانوا مدايقنى و هما ضعف الفرامل و مشكلة عوامة البنزين انها كانت بتدينى شرطتين ناقصين حتى مع تفويل التانك ( العيب دة حصل فى الطريق و انا رايح التوكيل) ..

أداء العربية بعد الصيانة

كما لكم ان تتوقعوا السحب طبعا اتحسن جدا .. و صوت الموتور بقى اهدا .. و اكتر حاجة عجبتنى رجلاش الفرامل لانها بقيت كويسة جدا و بتجمع بسرعة بحيث بقيت اقدر اتحكم فى العربية فى المطبات .. كذلك فولت التنك و ادانى جميع الشرط .. و هنا لازم نتوجة بالشكر للباشمهندس ماركو المسئول عن التوكيل لانة كان بيسمع شكوتك باهتمام و بسعة صدر و بيتابع كل عربية بنفسة و بينبه الفنيين لاى مشكلة .. وطبعا شكرا رينو

الفاتورة

250 جنية .......................... زيت المحرك
45 جنية .......................... فلتر زيت
3 جنية .......................... وردة (ماعرفش اتربطت فين بالظبط)
134.5 جنية ...................... مصنعبة الصيانة
43.5 جنية ......................... 10% ضريبة مبيعات
5.75 جنية ......................... خصم خاص (برضة ماعرفش بتاع اية)
----------

470 جنية الاجمالى

**wassim_nasser** · 03-01-2013 01:27 AM

ورشة الصيانة

Uploaded with ImageShack.us

لوجى اثناء رجلاش الفرامل

**wassim_nasser** · 03-01-2013 08:32 AM

المشاركة الأصلية كتبت بواسطة shoma

تقرير ممتاز وعقبال تقرير عمود الاتزان
ملحوظة ليه مغيرتش فلتر الهواء ولا تم تنظيفه؟

هو طلع فلتر الهوا نضفه و ركبه تانى

**wassim_nasser** · 03-01-2013 08:35 AM

المشاركة الأصلية كتبت بواسطة s o p h o s

الف مبروك الصيانة يا باشا
عقبال ال 200 الف ان شاء الله ..

الله يبارك فيك يا باشا .. وانا باتفرج علي العربية جه شاب لطيف وقف جنبي وقعد يسألنى عن رأيى في التوكيل و في العربية واتضح انه من تويوتا ايجيبت وجاي يعمل استطلاع رأي و يجمع معلومات عشان تويوتا ناوية تعمل مركز صيانة ف اسيوط عشان يخدم قطاع الصعيد

**wassim_nasser** · 03-01-2013 10:30 AM

والله يا باشا انا سمعت قصة مركز الصيانة المعتمد بتاع الكوثر ده من مدير المبيعات فرع سوهاج .. وخد بالك انه مركز معتمد مش التوكيل نفسه .. بس مش مقتنع بالموضوع بصراحة لأن بعض المراكز المعتمدة ف القاهرة بتخرف فما بالك بالصعيد ؟ انا شايف ان التوكيل أضمن