الموضوع: Byd F3 توكل على الله

انا اشتريت العربية دى يا جماعة موديل GLi وبقالها معايا حوالى شهر.

العربية ناعمة جدا امكانيتها تحفة الشنطة واسعة جدا وشكلها جميل بالنسبة للفيرنا والإسبرانزا (هذا رأيى)

وقارن الفيرنا بإمكاناتها بالإضافة إنها تجميع مصرى برضو زى الإسبرانزا
البى واى دى سيارة مستوردة والموتور قوى واستاجبته سريعة هذا بالإضافة ان الفيرنا كورى والسبرانزا صينى والشاهين تركى يعنى ما أنيل من سيدى إلا سيتى (مثل مصرى)

البيى واى دى واسعة من جوه فعلا (من الخلف قبل الأمام) بشهادة كل من يراها حتى المعارضين بقوة (توكيلات اخرى بدون ذكر اسماء)

وهى العربية الوحيدة الصينى المرشحة لدخول السوق الأروبية (أنظر إختبار التصادم)

ايضا شركة بى واى دى شركة كبيرة (يعتمد عليها) هى الشركة رقم إثنين فى صناعة البطاريات على مستوى العالم سنة 2003 وبعد هذا بدأت فى صناعة السيارات وتنوى (هذا ما يقولون وأنا اتمناه) ان يصبحوا من اكبر الشركات فى العالم فى تلك الصناعة (والصين قادرة).

انا ما بقولش انها احسن عربية ولكن أقدر اقول بثقة أنها احسن عربية فى فئتها وهى تحقق معادلة القيمة مقابل المال Value for money


انا قريت الكتالوج كله بتعها اللى عايز اي معلومة منه انا مستعد اساعد.

الحاجة الوحيدة اللى مش فاهمها فيه ان الكتالوج بيقول ان المراية الداخلية فيها بوصلة والوكيل بيقول ان دية مقياس درجة الحرارة بس بالصينى والكتالوج ايضا بيقول ان الجزء ده فىه ثلاثة لغات عربى وانجليزى وروسى بس واضح ان اللغة صينى.

هذه المعلومات جمعتها ودرستها قبل الشراء والعربية صفقة رابحة بإذن الله.

العربية سحبها جميل جدا انا لسه جاى من الإسماعيلية وده اول مشوار طويا نسبيا اجرب فيه العربية والجرى بتاعها واشوف اخبارها إيه.

انا طبعا ما بحاولش أقرص على الموتور إلا بعد ال 2000 كم زى ما الكتالوج بيقول بس العربية مغرية وبتسحب بسهولة وبسرعة. اقصى سرعة ما رديتش ازود عنها كانت حوالى 130 كم وال آر بى إم ما زادش عن 3000 زى ما هو مستحب للسيارات الزيرو فى اول 2000 كم .التكييف كان شغال ومعايا اربعة اشخاص والعربية عايزة تجرى والموتور مستريح.

ما شاء الله العربية صفقة ممتازة حتى الآن.