الموضوع: تغيير زيت رينو ميجان

السلام عليكم

من شوية والدى جاب زيت شل ألترا 5w40 .... الزيت القديم خلصان ... قلت أغيره بنفسى لأول مرة الجو ليل وعتمة بس بابا عنده مشوار ضرورى وأنا هغير يعنى هغير

رفعت العربية من على اليمين بالكوريك اللى فك دراعى وأنا برفع بيه وبعدين شديت فرامل اليد طبعا الأرض لازم تكون مستوية عشان الكوريك ميقعش .... عشان أتأكد برفع الأول من غير ما أشد فرامل اليد لو العربية وقعت من على الكوريك يبقى الأرض مش مستوية لو موقعتش يبقى نشد فرامل اليد

لو عندى خشب كنت رفعتها عليه لكن مكتوب عليا الشقى من صغرى
نزلت تحت العربية فيه 5 مسامير ينفع يتفكوا بفتاح 10 عادى أو بمفتاح ألانكيه الاتنين يمشى

3 مسامير منهم من قدام رابطين الأكسدام والمصفحة نفسها فى جسم العربية بنفكهم ومسمارين من ورا شوية

بعد ما نفك المسامير ديا المصفحة هتفضل ماسكة فى جسم العربية أضغط عليها بإيدك لفوق وسيب هتلاقيها زى المرجيحة بتتمرجح كدا بتروح وتيجى

أضغط عليها لفوق وشدها عليك لبرا ناحية الأكصدام هتطلع وتقع

كرتيرة الزيت موجودة على اليمين يا جماعة يمين العربية يعنى الفانوس اليمين هى ألومونيوم ليها طبة واحدة من تحت

ومن هنا يبدأ العناء الطبة دى ليها مفتاح مخصص زى الألانكيه كدا طبعا اتنقطت واتخنقت .... نزلت الكوريك ورحت قوام لبتاع زيت عندنا فى مطاى ....بدأت أتكلم معاه ... ياباشا أنا فاهم كل حاجة مش هتعدل عليا ... كل شوية أتكلم معاه يتخنق منى أكتر ..الراجل مش عايز يسمع لى كلمة عامل فيها فكيك قوى .... المهم بعد ما شديت أنا وهو بعد ما فك الطبة قال لى خد عربيتك وامشى .... المهم شديت معاه جامد وفى الآخر حايلته حسبى الله ونعم الوكيل هههههه ......

همسك فلتر الزيت كدا وبشاور له على شفة الفلتر .... فهم إنى عايز أقول حاجة ... رد وقال عارف ياباشا راح خد الفلتر وجرى حط على الشفة بتاعته زيت من بتاع الديزل الله يخرب بيته ... بصراحة سكتت .......كل دا عشان حتة مفتاح مكنش معايا اتبهدلت

جينا للمصفحة : والله نزلت معاه تحت قال لى هعرف أركبها المهم ركبها وادانى مسمار قال لى خد ياباش ملهوش مكان ....
حرام عليك يا عم .........



خلينا فى الفلتر يا جماعة كلنا عارفين مكانه فوق من على اليمين برضه (أى يمين يعنى الفانوس اليمين ) من فوق فى الموتور ... بيتفك عكس اتجاه عقارب الساعة ويتركب مع اتجاه عقارب الساعة

ليه مفتاح طبعا ........ اللى شفته مع الراجل دا حتة حديد مركب فيها جنزيل عجلة ... سألته ... قال لى يا باشا المفتاح الأصلى دا موجود بحرى بس !!!!! .... والله عامل المفتاح دا عمولة وياريته نافع مع بتوع المنيا
أديته 10 جنيه وخلعت من عنده جابلى أنهيار عصبى والله
المصفحة يا جماعة ليها مشبكين حديد من قدام من الحتة اللى بيركب فيها ال 3 مسامير اللى من ناحية الأكصدام ..... المشبكين دول ليهم خرمين مدورين زى الجنيه الحديد كدا بس أوسع شوية مفيش غيرهم موجودين برضه فى الناحية اللى فيها الأكصدام
بنشبكها فيهم تعبتنى قوى للعلم عشان كان بالليل وبابا كان مستعجل وأنا بحب أعمل الشغل دا برواقة
نربط المسامير كويس

الجركن الشل الألترا دا 4 لتر بس أعمل إيه جبت شوية زيت قديم وحطيته بتاع 300 مللى مثلا يلا بقى ياكش تولع كفاية العذاب اللى أنا شفته

كل دا بسبب مفتاح مكنش معايا

ورانى نص ساعة جهنم الحمراء ... من الصنايعية النص لبة .... دا غير الكلام اللى اأخدته منه : إنت بتعمل ليه بنفسك أمال أنا أعمل أيه دا أكل عيشى ياباشا دا رزقى دا مش عارف إيه ....... قلت له يا باشا أصل فيه صنايعية بوظتلى فى العربية قبل كدا .... ضحك وقال لى جملة قريبة من صنايعى الكاوتش ... دى شغلة عيلتنا كلها وضحك هههههه

العربية ممكن نديها بالفلتر 4.5 لتر هيبقى كويس ... بس الكتالوج بيقول 4.8
الفلتر نركبه بإيدنا الأول وبعدين نشد عليه بالمفتاح يا تشتريه يا إما تروح عند صنايعى محترم وتقف عليه
الطبة بتتفك بمفتاح زى الألانكيه كدا هتلاقيه عند أى حد بتاع زيت
طبعا قبل ما نغير زيت ندور العربية ونسيبها تسخن ونطفيها ونسيبها بتاع 10 دقايق ربع ساعة كدا ونبتدى نشتغل
نسيب الزيت أما يتصفى براحته خالص
تكون العربية على أرض مستوية

سؤال يا جماعة أنا لما بزود زيت للعربية طبعا بينزل فى المصفحة هل بيعدى فى الأول على الفلتر ؟؟ يعنى مثلا لو وقع ذرات تراب حبة رملة حبيبات دقيقة بتعدى على عمو الفلتر الأول ولا الموتور بيطحنها جوا ؟

بجد يا جماعة أناحاجتى مش هآمن ليها لحد من الصنايعية الجهل حاجة صعبة جدا