الموضوع: رينو ميجان --- لماذا رينو ميجان؟

انا هاحاول اشرح ازاى فكرت فى الرينو ميجان عشان لو حد يحب يشوف تطور التفكير معايا كان ازاى


- من اول مره شفت الميجان من 3 سنين قلت ايه ده انا نفسى فى العربيه ديه
- المعرض عمللى حاله قرف من العربيه و الميكانيكيه اللى اعرفهم
- الميكانيكيه و المعارض اتفقوا على الكرولا الاول و بعدين الانسر و بعدين الالنترا لو مضطر
- ماعجنيش سعر الكرولا بالنسبه للامكانيات حسيت ان هيه ماتساويش
- ماعجبنيش ات الانسر بيغلو تمنها و عربيه جديده نازله و يوزدوا فى القديم و العربيه مش باين ليها صاحب و ميت الف شكل و موديل و فوانيس مدوره و فوانيس مش عارف احمر و ابيض و اسبورت و عتب حسيت ان هيه سوق من غير صاحب
- الالنترا عربيه شكلها حلو واسعه و المتور كويس بس اقرا و اسمع عن غبور ولا حرج يجيب شلل و الناس اللى بتشكى ان العربيه بتفصل كهربا مع الموبيل حاجه تجيب اكتئاب
- انا كنت عايز عربيه بفتحه سقف الانسر سعرها معقول قبل الهبل بتاع الزياده و الالنترا كان الفرق مستفذ جدا

بعد التفكير قلت مش شارى حاجه حسيت بزهق

البحث
من كام شهر قلت لازم بقى اغير العربيه
فكرت و قلت اجيب عربيه عامله كيلومتر قليل عشان محسش ان السعر اضحك عليا فيه لان العربيه زيرو الناس مبالغه قوى فى السعر و بحس انها مش مستهلاه
- فكرت طبعا فى الكرولا لقيت ان 1300 موديل 2006 ممكن تعمل 93 الف و طبعا مافهاش كماليات غير ازاز كهربا و تكييف
- طبعا فكرت كمان فى الانسر 1600 فى نفس الرينج بس انا حبيت فخامه الكرولا عن الانسر الانسر بتدينى الاحساس بتاع السويفت ايام منزلت و كل الناس كانت ركباها بطريقه مستفزه تحس انهم بيوزعوهها ببلاش
- و فعلا كنت بدور على الكرولا و بسوق بتاعه صحابى و خلاص ناوى بجد و خصوصا بابا عنده محل يابانى و كورى
- دخلت عندكو هنا و قريت كتير كتير عن الكرولا و الانسر
- لقيت كاتبين عن الرينو قلت اشوف الناس الغلبانه اللى اتدبست فى العربيه كل ما اقرا كياده كل ما ووجه نظرى تتغير ايه ده دول مبسوطين
و كمان مبسوطين من التوكيل!! دول بيبعتوا لفرنسا و بيردو عليهم!!!! فيه رقم تكلموا و بيجو بجد!!
ايه ده دول ناس محترمه!! و المشاكل اللى فى العربيه هايفه
- انبسط لما سفت سعر اعاده البع واقع قلت ديه عربيتى و لقيت ناس بتتكلم فى سبعينات و تمانينات
- ابتديت ادور على عربيه ميجان كامله فى حدود 95 الف
-كل لما حد يعرف انى بدور على ميجان يقولى كلام زى اللى قريته ديه الفرامل فيها مشاكل اسأل ايه هيه المشاكل ماوصلش لاجابه اسمع مثلا العربيه الكومبيوتر بيبوظ

- لما ابتديت ادور لقيت الاسعار مش زى ما السيت بيقول لان اللى عنده عربيه حالتها حلوه و مش تعباه بيبقى ماسك فى سعره و سايف ان هى تستاهل
والقرفان من العربيه هو اللى ينزل معاك و يهاود و كده و ساعسات تشوف العربيه متبهدله و مش عارف تمسك منين بس تحس ان هيه متهانه
و فيه اللى مش بيودى صيانه و بيبيع على ال 60 الف و كل ده فارق فى السعر

- انا جبت عربيه ب 89 الف و انا عارف ان هيا تسوى 120 الف مستريح و هى مستعمله و ماليش دعوه بسعر السوق ده احساسى و انا راكبها و لما تتقارن تتقارن ب السيفيك الجديده و الكرولا الجديده و الانسر الجديده و الوكتافيا مش بالانسر القديمه و الكرولا القديمه

- الكرولا انت بتركب عربيه مش حاسس ان تمنها فيها و الانسر الجديده المفروض بتتقارن بالالنترا و الاتنين يبقو فى نفس الرينج مش السعر المبالغ ده الوحيده اللى فعلا تمنها فيها كانت السيفيك بس المطبات مشكله كبيره

- انا مش بقارن عربيات و اقول ديه حلوه و ديه وحشه انا بحلل الانسب ليه كان ايه


- الميجان ماشاءالله عليها انا مش مصدق الثبات و الفرامل و التكنولوجيا و عزل الصوت والسحب انا شايفه ممتاز

- الفرامل بتفرمل زى مانت عايز بالظبت
- التوكيل فى غايه التعاون
- العربيه واسعه و القاعده جميله جوه بس المارشدير مش بتشوف حاجه خالص و ترجع بالراحه لسه ماتعودتش بفكر فى الباركينج سينسور
- مرايه الصالون بحس انى مش باشوف حد جاى من ورى عشان المجال من الزجاج الخلفى ضيق جدا
- الانوار ممتازه و التابلوه يحسسك انك مبسوط
- العربيه ممتعه فى السواقه تحسسك بالرفاهيه جدا و كمان لما تجرى تحس برضه ان فيه شد كويس مش كاتيانه يعنى على حجمها الكبير نسبيا
- الشنطه بحر كبيييييييييره قوى
- لما تفتح الكبود تتبسط قوى من المنظر اللى جوه شكل الموتور جميل و متقفل كويس
- كان نفسى فى النور الابيض اللى فى 2007 فى التابلوه
- كارت التشغيل اختراع فى منتهى الجمال بتدوس على ال ستارت و تسمع صوت حلاوه :)
- العربيه بتكلبش فى الارض ملف على 140 من غير ماتحس باى مشكله

بجد الحمدلله ان الواحد ربنا هداه انه يجب العربيه ديه
و ياريت اكون افدت اللى بيدور على واحده و لو فيه اسئله انا ممكن اجاوب

فيه نصيحه
لما تنوى تشترى ماتدورش على اللى بيبيع رخيص و ماتفكرش السوق هيغلى ولا يرخص فكر ان انت عايز العربيه دلوقتى

فرحات باشا
ايوه انا ركبت الفرش الجلد فوق الفرش الاصلى عشان العيال كانو بيبهدلوه و اللبان والمصاصه ومش ينفع تعمل كنترول على الموضوع ده و خصوصا فيه بيبى جديد جاى

الاير باجس الراجل قاللى مافيش فرش هيوقف الاير باجز هما هيفرقعو الفرش لو فتحوا

لما كنت هناك الراجل كان بيركب نفس الفرش لل سيفيك الجديده و ل ال اوكتافيا
بس اغلى عشان انا اعرف واحد شغال هناك من ايام الطفوله

ركبته و بالتفصيل اللى تعمل ب 500 جنيه بس مش مقتنع بيه 100% عشان الاصلى احلى اكتر بكتيير
بس مافيش حل تانى و يكون رخيص

التقسيمه اللى ورا مش بطاله بس لازم تفتح سوسته لو حبيت تستخدم المخدع اللى فى النص