الموضوع: سكودا أوكتافيا a5...سيارة تستحق الاحترام!

الأول نتكلم عن سبب الحروف A5 ديه: ده الPlatform المتوسط أو الشاسيه المتوسط اللي طارحته Volks Auto Group (VAG) و ده اللي بيضم السيارات الاتية: , GOLF 5, Seat Toledo, Altea, Leon, AUDI A3, AUDI TT, EOS, JETTA ..و ده معناه انو العربيات دي كلها بتحمل نفس قاعدة العجلات و العفشة والشاسيه و المواتير و معظم الأجزاء و التجهيزات الكهربائية من الكومبيوتر للتكييف الالكتروني....الخ

ملحوظة: أوكتافيا A4 بينطبق عليها نفس الكلام في اشتراكها بنفس الأشياء مع GOLF 4>>>> الى اخره......و بترجع أول قاعدة عجلات بهذا الرقم المسلسل (A1) الى GOLF 1 Rabbit و من ساعتها و هما ماشيين بنفس التسلسل....طولنا أوي في الحتة دي

هبتدى أتكلم عن كل حاجة في العربية و يارب منساش حاجة:

أولا: الشكل الخارجي:

السيارة من فئة الHatchback و دي معلومة يمكن ناس كتير ماتعرفهاش...و ده بيبان في طريقة فتح الشنطة (مش الحتة الصاج بس..لكن الازاز كمان معاها)


مقدمة أكثر من رائعة تتميز بالوقار و العزة بالنفس...يعني تحس أما تبصلها أنك بتبص علي واحد واثق و معتز بنفسه جدا
الرفارف الأمامية طالعة لفوق و واخدة المنطقة اللي فوق المصابيح كلها و دي ميزة أمانية في حالة الحوادث الأمامية



جانب السيارة يمثل حلقة الوصل بين المقدمة و الخلفية و ده يبان في الخط الممتد من المصابيح الأمامية للخلفية و هو أيضا معبر عن شخصية السيارة القوية
أما المؤخرة فتمتاز بالعرض و تحس انها عندها عضلات




وجود الجنوط بيفرق كتييير في شكل العربية و مظهرها و خصوصا الجنوط ال 16 و ما فوقها

الصاج قوي جدا جدا جدا فوق الوصف و قفلة الأبواب فعلا ماشوفتش زيها غير في
المرسيدس...بس فيها عيب ان لو الازاز مفتوح و قفلت الباب بيبقى صوتو عامل ذي ال 127 بتاعتي علشان الازاز بيبقي بيلوق جوة الباب.

ثانيا: داخل السيارة:



الحاجة اللي تلفت نظرك أول ماتقعد فيها هيا الخامات الممتازة اللي متصنع منها التابلوه و الأبواب و الكراسي و الارضيات

و التبلوه متصنع من مواد امنة في حالة لو واحد خبط فيها (Crash Friendly Moulds)....

عجلة القيادة حلوة جدا في مسكتها و خصوصا اللي فيها جلد طبيعي بتديك احساس بالفخامة و في نفس الوقت الرياضية...العدادات سهلة و واضحة و لونها أخضر و على فكرة بره الناس بيفضلوا لون عدادات السكودا أكتر من ال فولكس و الBMW عشان مريح للعين اثناء السفر باليل مسافات طويلة عكس البرتقالي و الأزرق المستفز بتاع Volks....

يوجد شاشة بين ال RPM و السرعة عبارة عن منيو بيتقلب من الزراير اللي في دراع المساحة أو من الدركسيون في الموديل Elegance الشاشة دي بتعرض: متوسط استهلاك البنزين في ال100كم و البنزين اللي فيها يمشيك أد اية و المسافة اللي مشتها من أول الرحلة و الوقت اللي قديته فيها و درجة الحرارة الخارجية.

يوجد بها مثبت سرعة و هو أكثر من رائع في المسافات الطويلة....و من خلال الازرار يمكنك زيادة و انقاص السرعة بدون استخدام الدواسات...و بيحس بالمطالع فاتلاقيه سقط الغيار لوحده و في المنازل بيعمل Engine Brake
ننتقل للدولاب الأوسط هنلاقي شاشة كبيرة بتاعت الكاسيت (مش في كل الموديلات) فيها CD MP3 جودته مش بطالة لكن مش أحسن حاجة و الراديو استقباله ذي الزفت و ده عيب Common في العربية على مستوى العالم...

طبعا الوكيل لازم يحط بصمته المصرية في العربية و شايل منها 4 سمعات ورا لأن هيا أصلا بتنزل ستاندارد ب 8 سمعات بره و الكاسيت فيه ميزه انك ممكن تظبطه يعلي الصوت اوتوماتيك كل ما السرعة تزيد عشان صوت الهوا و كدة

التكيف ClimaTronic 2 Zones مكون من 6 سرعات و امكانية ظبط كل جانب ب درجة حرارة مختلفة و فيه مخرج للكراسي الي ورا...و كفائة التكيف أكثر من رائعة و فيه حساس بيشوف الشمس في انهي جانب من السيارة و يزود التبريد شوية فيه

http://www.briskoda.net/gallery/show...original=1&c=8

المخدع اللي فالنص فيه ميزة لذيذة انك ممكن تظبط ارتفاعه و تجيبه ورا و قدام براحتك.. ده غير انه ممكن تخليه يحفظ اي حاجة ساقعة جوه و فيه كمان وصلة AUX بالداخل

فيها عيب Common و هو صوت تسريب هوا من الازاز ورا السواق و ده بيتحل بره بتغيير كاوتش الازاز بس في مصر لو قلت كده ممكن يحرمني من ركوب العربية اساسا

عيب تاني هو صعوبة الرؤية الخلفية عشان الشنطة عالية قوي

نتكلم عن وسع المنطقة الخلفية هنلاقي ان عيب ال A4 الأساسي تمت ازالته تماما و المنطقة الخلفية أصبحت واسعة جداااااا بس مفيش مخدع في النص غير في الElegance



أما الشنطة الخلفية فحدث ولاحرج .....ايه يا جماعة الوسع الغبي ده؟؟؟ مش ممكن يكون فيه كدة....عارفين ان مساحة الشنطة هيا بالظبط مساحة ال S-class الجديدة؟؟؟ 560 ليتر بالتمام و الكمال...ده كمان من غير منطوي الكراسي اللي ممكن تتني 3\1 أو 3\2 منها ...و اللي مساعد كمان في وسع الشنطه هوه بقها الكبيييييير عشان الازاز كمان بيتفتح

[img][img=http://img259.imageshack.us/img259/8829/004wd9 .th.jpg][/img]

ثالثا: المحرك:

1.6L.
102 HP/5600
148 NM/3800

أول ماتفتح الكبوت قلبك ينشرح بالمنظر ...مافيش أي سلوك أو خراطيم باينة و كله متداري ...غطاء بلاستيك شيك للموتور و حتي البطارية محطوطة في علبة بلاستيك متغطية...

و فيه ميزه جميلة بردو ان كل شيئ تحت الكبوت معزول تماما عن الماء حتى الغطاء بتاع الECU مرسوم عليه انه Water Proof يعني مفيش خوف من الغسيل خالص و ده عن تجربة.

حسيت بالانبساط أما بصيت علي بعض أجزاء الموتور و لاقيت علامة VW و AUDI و Seat عليهم...مع العلم ان قطع غيار هذا المحرك هيه نفسها بتاعت GOLF 4 و أوكتافيا A4 و دي موجودة بكثرة في مناطق كتير

نيجي للأداء هنلاقي انه مش موتور رياضى أو عنبف خالص...يعني ماتنتظرش منه الشد و الجري و الحرق و ده بيرجع ان الفتيس 6 غيارات فا روح كل نقلة قصير و كمان تقل العربية علي الموتور ده ....صوته هادي جدا تحت ال 4000 RPM لكن بيعلي بعد كده

نسب التخفيض بتاعة الفتيس أكثر من رائعة لو كنت من محبي السرعة لان سرعة 120 بتكون علي 2700 RPM و 175 كانت علي 4100 RPM و متسمعلوش صوت خالص ايا كانت السرعة

الفتيس ستيبترونيك جميل و مفيد في بعض الأوقات زي منطقة الملفات بتاعة العين السخنة عشان بتبقى محتاج استجابة أعلي و كمان عشان استجابة دواسة البنزين بطيئة نظرا انها اليكترونية مش بسلك
استهلاك البنزين ممتاز التانك 55 لتر بيعمل بالظبط 720-740 كيلو يعني الصفيحة بتعمل حوالي 280-300 كيلو
احنا روحنا الغردقة و كان متوسط السرعة 150 و محملة 4 ركاب بالشنط اخدت بالظبط 70 لتر في ال 1000 كيلو

خلاصة المحرك: أداء غير رياضي لكنه هاديء و اقتصادي و مناسب لغير محبي الشد و الحرق...

رابعا: الأمان:

كما ذكرت سابقا الصاج الخارجي و الاكصدمات قوية جدا و بتتحمل التريحات و الخبطات البسيطة بشكل كبير و ده عن تجارب كثيرة...

http://www.briskoda.net/gallery/show...original=1&c=8

جسم السيارة كما هو الاتجاه حديثا تدمير من الخارج و حماية للداخل... في التوكيل شوفت حوادث بشعة من الأمام و الخلف و انقلاب و العربية من جوه كانت محمية تماما
السيارة ادت كويس جدا في اختبارات EURO NCAP و جابت 4 نجوم




ثبات فوق الوصف و متحس باي حاجة مهما كانت سرعتك يعني ال 175 كانت عاملة ذى ال 50 في ال 127 بتعتي :lol: :lol: :lol:

فرامل قوية ABS معززه ب EBD و ASR و MSR و فيه ESP بس في الElegance بس..

ده طبعا غير ال 4 Airbags و Pretension Seatbeltsو ال Elegance فيها 8 Airbags

فيها TPM(Tire Pressure Monitor) بيراقب مستوى الضغط في الأطارات و ينبهك اذا كان فيه نقص فى الهوا.

التوكيل:

مبدائيا وقت ماروحنا المعرض في المقطم أنا زهلت من حسن الأستقبال و الترحاب... مسوؤل المبيعات في قمة الذوق و الأدب و الاحترام...مدير المعرض بنفسه كلمنا وحنا بنرخص بيشوفنا عايزين حاجة...و كلمنا بعدها بفترة يطمن على الوالد و على العربية.

مركز الخدمة يعيبه ان هو الوحيد بتاع التوكيل و ديق جدا مش متحمل الزيادة الرهيبة في اعداد السيارات...سمعنا عن مركز جديد هيتفتح على الداائري....المعاملة هناك كويسة واللي بتقوللوهم عليه في العربية بيعملوه بس أسعار المصنعيات غالية شوية ...و قطع الغيار أسعرها معقولة...مش عارف الناس بتقول كلام غريب عن التوكيل ليه.

المنافسين:

احتيجات والدي كانت عربية عائلية كبيرة و تناسب منصبه كمدير Executive Car يعني و كان قدمنا الاتتي:

OPEL Vectra : سيارة فخمة بس يعبها ديق المساحة الخلفية و الشنطة اللي أد بتاعة اللانسر و المانيوال و كبيره على الفاضي من بره

VW JETTA : من جوه كنزه و الشنطه تقريبا هيه هيه مع اختلاف الباب بتاعهاو كمان سعرها العالي و شكلها مكنش عاجبنا و التوكيل الفاشل

Toyota Avensis : سيارة جديره بالاحترام لكن بالنسبة لنا عيوبها كانت شكل المنطقة الخلفية و المانيوال

Octavia A5 : اكتر عربية ريحتنا من ناحية الشكل و الكماليات و السعر و الاعتمادية و كنا في أوروبا التاكسيات كتير اوي منها كان بيبقى ال A5 و ال Avensis فا ده ريحنا أكتر

خليجي ولا توكيل؟؟؟؟:

لكن هناك فروق بين الاتنين أولهم العفشة في المصري السيارة اعلي حوالي 2-3 سم و ده حلو جدا للطرق بتاعتنا و عمرنا ما حكنا في أي مطب...بس الخليجي هتلاقي قصاده نعومة و ثبات أكتر بس مش الفرق الفظيع يعني...

حاجة كمان موجودة في المصري و هي التصفيح أسفل المحرك ...من تحت ماتقدارش تشوف الموتور من التصفيح.

التوكيل ما بيقبلش اي عربيات خليجي لكن فيه أكتر من مركز خدمة ليهم من ضمنهم كارتك...
احنا حبنا نريح دمغنا و اشترينا من التوكيل علطول

و علفكره مسوؤل المبيعات كان قال ان العربيات ال Elegance سعر اعادة البيع بتاعها بيبقي قليل عشان الأوبشنز اللي فيها بتبقى رفاهية زياده عن اللزوم و مش مطلوبة اوي..

-----------------------------------------------------------
انا طولت أويييييييييييي مش عارف كده ليه...يارب أكون أفدتكم و أكون وضحت حاجات متعلقة بالعربية أكتر...