الموضوع: لما أحمد العربى يكتب تقرير عن صيانة الألف !!

بسم الله

أحب انقل اليكم حكاية تجربتى مع شركة الأمل فى صيانة الالف كيلو لعربيتى البى واى دى اف 3.

أولا أنا راضى عن تجربة الصيانة بنسبة 80 % و الحمد لله.

بالنسبة للمشوار فالحمد لله فهو مش بعيد خالص , أنا ساكن فى مصر الجديدة و مقر الصيانة فى طريق الشهيد (المخيم الدائم سابقا) و هو الطريق الواصل بين طريق النصر (مدينة نصر) بالقرب من أرض المعارض لحد مطلع الدائرى من القطامية , و المقر قريب جدا من نازلة الدائرى , و أعتقد أن موقعه استراتيجى لأنه يربط بين عدة مناطق سكنية مترامية الأطراف و سهل الوصول إليه من أكثر من طريق.

أول ما وصلت لاحظت أن بنزينة أويل ليبيا لازقه كتف فى كتف فى مقر مركز الصيانة , قلت أعدى على الماركت بتاعها أجيب تسالى و حاجات لزوم اللطعه و الانتظار ساعات , بس للأسف لقيت الماركت قافل و مابيفتحش غير على الساعة 12 كده , صباح الفل.

روحت على بوابة المركز لقيت أمن البوابة واقف بيسألنى جى تعمل صيانة الكام و كده , و لما قلتله أنا حاجز ميعاد , أتغير تماما فى كلامه , و لقيته إهتم كده , و يظهر أنهم بيعملوا أولويه للى حاجز عن اللى جى من غير حجز , فورانى أقف فين بالعربيه عشان يجى واحد يكتب ليا أمر التشغيل.

المهم وقفت , جالى واحد شاب "كده" (و خلى بالكم من كلمة "كده" ديه تحمل معانى مستخبيه) المهم , سألنى العربيه عامله كام كيلو ؟ 995 كم ( واخدين بالكوا عل دقه ألف إلا خمسه كيلو ) , طيب فيه حاجه بتشتكى منها ؟
اه ه ه ه ه ه ه ه ه ه ه ه ه ه ه ه ه ه ه ه ه ه ه ه ه فيييييييييييييييييييييييي ييييييييييييييييييه !!

أولا: عايز أشيك على مستوى زيت الفتيس , عايز الفتيس يبقى أنعم من كده ,,,,,,, أمين , أمين.

ثانيا : قفل الشنطه عايزه يقفل بسهوله أكتر من كده ,,,,,,, أمين , أمين.

ثالثا : باب السائق محتاج تظبيط عشان يقفل من أول مره لو بقفله بالراحه مابيصوجرش ,,,,,,, أمين , أمين.

رابعا : الدبرياج عايزه يعلى شويه , أصلو واطى واطى يعنى ,,,,,,, أمين , أمين.

خامسا: مسخن الزجاج الخلفى بتاع الشبوره عايز أتأكد انه شغال ,,,,,,, أمين , أمين.

سادسا : ورينى كده زرار نور الشبوره الخلفى بيشتغل ازاى , اصلى بدوس عليه مابنورش , طلع بقه ايه , انه لازم انور النور العالى الاول و بعدين ادوس على الشبوره عشان يشتغل , طب لو عايز الشبورة من غير النور العالى , بسيطه , شغل العالى , شغل الشبوره , اطفى العالى , الشبوره حيفضل منور و العالى مطفى , ,,,,,,, أمين , أمين.

سابعا : طيب حاجه غايظانى اوى , ايه هيا ؟ , كاوتش الأبواب يا بيه , يــــع يـــع ! منظر تقفيله يـــع X تيت X خخخخ = ايه بقه عارفين بيساوى ايه حاصل الضرب ده , ده حاصل ضرب أكبر من حاصل ضرب الأخوان X الألتراس , رد عليا الشاب "كده" ده رد غريب أوى , قالى أصل تفريغ الهواء , فكان لازم يبقى الكاوتش كده , عشان لما تفريغ الهواء , الكاوتش بيعدل نفسه و هو حيبقى تمام مع الوقت ,,, معرفش ليه حسيت من كلامه إن فيه حاجه حتتشفط من تفريغ الهوا معرفش الكاوتش هو اللى حيتشفط و لا دماغى هيا اللى حتتشفط و لا ايه , ما علينا , الموضوع ده شكله أكبر من شركة الأمل و كل اللى شغالين فيها , شفطو حاجه , قصدى فهمتو حاجه ؟؟ , و لا أنا.

ثامنا : فيه صوت تكتكه , بعد الركن و أثناء المشى بسمعه و انا على الأول , قالى ده ترييحات فل شكمان عادى ( كويس انو مقليش تفريغ هواء و شفط مركزى و كده ) قلتله لاء أنا عايز أكشف على قواعد الموتور لو سمحت , ,,,,,,, أمين , أمين , ( بس أمين مش مريحانى المرادى حسيتها بإبتسامة: خده على قد عقله ).

تاسعا : فيه تزييق بسمعه و انا نازل من العربيه ورا فل عجله ورا , يعنى بعد ما بركن و أشد الهاند بريك و أفتح الباب و أنا بنزل بقه , خدو بالكم من لحظة و أنا بنزل ديه , ال ايه , بسمع صوت تزييق من العجل ورا , فرد عليا و قالى ده عادى و فى كل العربيات عشان فرملة اليد بتبقى مشدوده ,,,, أهبل أنا ,, مركبتش عربيات قبل كده ,, عديتها بمزاجى.

جه واحد تانى خد العربيه و سبنى وحيدا فل الصحراء !!

طيب يا جماعه فين الإستراحه ؟؟ ,, شايف الباب اللى هناك ده , شايفه ؟ اه , روح و أطلع الإستراحه !

طلعت , لقيت فيه غرفتين , واحده لغير المدخنين و التانيه للمدخنين بين قوسين غرزة بلدى , و فيه زجاج بيطل على مكان الصيانة عشان تتفرج على عربيتك و هى بتتصان لامؤاخذه !!

دفعت 182 جنيه مصرى لا غير

الحمد لله , الفتيس بقه أنعم , الدبرياج علوه , قفل الشنطه اتظبط , باب السائق اتظبط , العفشه اتشدت , السحب بقى أحسن .

و أسيبكم مع الصور