عسكرى الصراف الألى

**محمد يوسف** · 18-03-2013 10:16 AM

السلام عليكم ياأهلى وعشيرتى

فيه ظاهرة بقالها مدة مضايقانى بس زادت قوى فى الفترة الأخيرة وكنت عايز أخد رأيكم وأعرف هل بتتعرضوا لها انتم كمان وبتتصرفوا فيها ازاى

الحكاية ومافيها انى كل ما أصرف فلوس من أى ماكينة atm ألاقى عسكرى أو أمين الشرطة الموجود للحراسة عمال يلف حواليا وأول ما أخلص ألاقيه داخل عليا بصباح الفل ياباشا ونهارك أبيض ياباشا وربنا يزيدك ياباشا ويفضل يدينى فى باشويات كتير لغاية ماركب عربيتى... فى الأول كنت باطنش وبعدين فى مرة اديت العسكرى 5 جنيه لقيته بينده عسكرى تانى بعيد بيقول له تعالى صبح ع الباشا... وبقيت أغير مكن السحب بس الاسطمبة واحدة كل مرة وساعات أدى وساعات لأ وساعات مابيبقاش معايا فكة.. ومرة عسكرى رذل جدا فضل ورايا لغاية العربية قلت له أسف ما معاييش فكة لقيته بيقول لى ببجاحة يعنى ساحب كل الفلوس دى ومستخسر فينا كوباية الشاى ؟ أنا بصراحة اتصدمت وتنحت وماعرفتش ارد ..وسبحان الله المبلغ اللى كنت ساحبه كنت عامل حسابى حايكفى أسبوعين ماكملش 4 أيام واتصرف ماعرفش ازاى..العين وحشة فعلا

فمش عارف هل بتتعرضوا لكده انتم كمان ولا أنا لوحدى وبتتصرفوا ازاى؟
هو مش بخل والله بس حرام أدفع كل مرة 5 ولا 10 جنيه من غير لزمة
مستنى نصايحكم

**mfs3570** · 18-03-2013 10:28 AM

انا عن نفسي بديله وش خشب ..اول مايبدا يلف ويبتسم بقوله خير في حاجة .هوه بياخد في وشه ويمشي .....ثانيا انا الفلوس الللي بسحبها بحطها في جيبي اول ماتطلع من المكنه مبديش فرصه لحد انه يشوفه ولا العسكري ولا الحرامي حتي

**Ahmed_Rahem** · 18-03-2013 10:33 AM

المشاركة الأصلية كتبت بواسطة mfs3570

انا عن نفسي بديله وش خشب ..اول مايبدا يلف ويبتسم بقوله خير في حاجة .هوه بياخد في وشه ويمشي .....ثانيا انا الفلوس الللي بسحبها بحطها في جيبي اول ماتطلع من المكنه مبديش فرصه لحد انه يشوفه ولا العسكري ولا الحرامي حتي

دة صح والافضل كمان تجرب مكن المولات او المكن الى بيكون البنك حاطة فى غرفة لوحدة.

**ياسر مصطفي** · 18-03-2013 10:40 AM

لا حول ولا قوة الا بالله . ايه اللي جرالك يا بلد

**a_nbm** · 18-03-2013 10:45 AM

اعمل من بنها (مع كامل حبي واحترامي لأهل بنها حبايبي)

**lanos2004** · 18-03-2013 10:51 AM

انا معنديش فلوس فى البنك بحطها فى البيت
حد عاوز عنوانى

**محمد يوسف** · 18-03-2013 10:53 AM

المشاركة الأصلية كتبت بواسطة mfs3570

انا عن نفسي بديله وش خشب ..اول مايبدا يلف ويبتسم بقوله خير في حاجة .هوه بياخد في وشه ويمشي .....ثانيا انا الفلوس الللي بسحبها بحطها في جيبي اول ماتطلع من المكنه مبديش فرصه لحد انه يشوفه ولا العسكري ولا الحرامي حتي

باعمل كده ساعات..بس ربنا بيرزقنى بعساكر بجحة زى اللى كتبت عنه فوق..وطبعا باحط الفلوس فى جيبى على طول بس هما بيلفوا حواليك فبيشوفوا الفلوس وهى طالعة أو بيبصوا ع الشاشة..حاجة تقرف

**محمد يوسف** · 18-03-2013 10:55 AM

المشاركة الأصلية كتبت بواسطة ahmed_rahem

دة صح والافضل كمان تجرب مكن المولات او المكن الى بيكون البنك حاطة فى غرفة لوحدة.

لما باكون فى مول باسحب منه..لكن للأسف البنك بتاعى مالوش مكنة فى سنتر صرف

**محمد يوسف** · 18-03-2013 10:56 AM

المشاركة الأصلية كتبت بواسطة lanos2004

انا معنديش فلوس فى البنك بحطها فى البيت
حد عاوز عنوانى

ابعته نديه للعساكر دى...يمكن يحلوا عننا شوية :))

الموضوع: عسكرى الصراف الألى

LinkBack

أدوات الموضوع

عرض

-

-

المواضيع المتشابهه

ظابط احتياطى ولا عسكرى

بشرة خير (فوز مصر على ألمانيا ببطولة العالم لكرة القدم للإنسان الألى)

عسكرى المرور

الكلمات الدلالية لهذا الموضوع

المفضلات

المفضلات

ضوابط المشاركة