الموضوع: سلسلة فنيات القيادة - الحلقة الخامسة

الحلقة الخامسة : أزاي تفرمل بشكل فعال

بسم الله الرحمن الرحيم
السلام عليكم ورحمة الله وبركاته

النهاردة ان شاء الله هنتكلم عن موضوع جديد في سلسلة فنيات القيادة

موضوع اليوم عن الفرامل، وهناقش فيه ان شاء الله ازاي تفرمل بشكل فعال

كتير مننا يبقي راكب مع حد ويبقي مثلا سرحان او بيبص من الشباك او او او المهم انه مش مركز مع الطريق
وفجأة يلاقي نفسه بيترمي لقدام او بمعني تاني انه بيحس بالفرامل - مش لازم تكون الفرملة جامدة عشان القائد تفاجأ بحاجة في الطريق
ولكن الفرامل ممكن تكون جامدة لقلة خبرة القائد

انا عارف انها احياناً بتحصل مع المحترفين في حالة لو ركب عربية جديدة عليه ومش واخد علي فراملها وطبعاً دة بيحصل معانا كلنا ومش هو دة اللي انا هتكلم فيه
انا كلامي النهاردة علي تقنية الفرامل في عربياتنا

بس قبل ما اتكلم عن ازاي تفرمل بشكل فعال، هنتعرف سوا علي أجراء مهم جداً قبل قرار الفرامل سواء فجائية او فرامل متخطط لها
قبل ما تفكر تدوس علي بدال الفرامل لازم الأول تبص في مراية الصالون
لازم تكشف الدنيا وراك فيها ايه وتعرف قبل ما تفرمل، في حد وراك وقريب منك ولا الدنيا تسمح بالفرامل
لأن احياناً الواحد بيفضل انه ياخد مطب علي سرعة عالية شوية اهون عليه من انه يدوس فرامل واللي وراه يخبط فيه
طب الكلام دة في حالة الفرامل المخطط لها Planned

واحيانا تانية هتلاقي ان من الأفضل انك تفرمل واللي وراك اعوذ بالله يخبط فيك اهون من انك تخبط في اللي قدامك - وقانا الله واياكم شر الطريق
وفي الحالة دي انت اللي هتقرر تخبط في اللي قدامك ولا تخبط في اللي وراك ودة بناء علي ايهما اقل ضرر - حفظنا الله واياكم

طب في حالة الفرامل الفجائية ؟؟؟
بردو نفس الحال - هتبص وراك للحظة وبعدها هتفرمل
بس المرادي الفرامل هتكون نبضات Pulses متتالية ورا بعض مع الأستمرار في النظر لمراية الصالون علي فترات متقاربة للتأكد من ان اللي وراك خد باله وهو كمان بيهدي وبيفرمل

ودلوقتي بعد المقدمة دي تعالوا بقي نتعرف سوا علي انواع الفرامل

1- الفرامل الفجائية Unexpected
ودي فرامل نتيجة حدث عارض غير متوقع علي الطريق

2- فرامل مخطط لها Planned
ودي فرامل انت بتدوسها وانت عارف انك عايز تقف او تهدي لكون مثلا مطب او وصلت للجهة اللي انت رايحها

3- فرامل جامدة Hard
ولكنها غير فجائية وفي نفس الوقت غير مخطط لها
ودي نتيجة انك شوفت مثلا مطب بس المسافة بتاعته قريبة وانت علي سرعة

4- فرملة المحرك Engine Brake
ودي فرملة انت مخطط لها وبتستخدم فيها المحرك عشان يساعد بجانب فرامل العربية الأساسية

5- فرملة البنزين Engine Brake
النوع دة بردو يعتبر تابع للنوع السابق وهو فرملة المحرك - بس بتقنية مختلفة هناقشها لاحقاً

بعد ما عرفنا انواع الفرامل تعالوا بقي نتكلم ازاي افرمل بشكل فعال وأمن ومن غير ما احسس اللي معايا في العربية اني فرملت فرامل جامدة
عشان تفرمل او تهدي العربية مش لازم تكون الفرامل فجائية قد ما لازم تكون الفرامل بقوة
يعني تدوس بقوة ولكن ماتخليش رجلك عنيفة aggressive علي الفرامل

طب ازاي هدوس بقوة ؟؟؟
الضغط بقوة علي بدال الفرامل هو انك تبقي بتضغط علي البدال وبتدوس عليه لتحت وعشان توصل للضغطة دي هتضطر ترفع كعب رجلك من علي ارضية الدواسة
يعني كل ما رجلك اترفعت اكتر عن ارضية العربية وبتضغط بمشط رجلك - كل ما كانت الفرامل اقوي وتأثيرها اقوي علي سرعة العربية وفي نفس الوقت مش هتحسس حد من اللي راكب معاك ان العربية بتتخطف او يترمي لقدام

وعشان تعرف تضغط بالشكل دة لازم تلتزم بحاجتين
1- تظبط الكرسي بحيث ان رجلك تكون طايلة الدواسات بشكل مريح وظهرك عدل
2- تكون ماسك الدريكسيون كويس - مش مجرد ساند الطارة بأيد واحدة

طب كدة عرفنا ازاي افرمل بقوة او فرامل Hard من غير ما احسس اللي معايا في العربية بقوة الفرامل

تعالوا دلوقتي نعرف ازاي افرمل بالمحرك
فرامل المحرك Engine Brake دي بتعتمد علي انك تكون مدي العربية غيار اثناء الفرامل ودي بتساعد بشكل كويس علي الفرملة وفي نفس الوقت بتوفر استهلاك التيل والفرامل عموما وبتقصر مسافة التوقف
كمان انا ممكن اهدي بالعربية باستخدام الفرامل دي - بس المرادي هستخدم بدال البنزين Accelerator بدل بدال الفرامل
ودي عن طريق انك لو عايز تهدي علي الطريق هتشيل رجلك من علي دواسة البنزين - وترجع تدوس بلطف وتسيب وتدوس وتسيب بفاصل زمني قصير وليكن ثانية
مجرد بتدي نبضات Pulses بدواسة البنزين - وساعتها هتلاقي العربية بتهدي اكتر من لو انك رفعت رجلك من علي دواسة البنزين وسيبت العربية ماشية معشقة
والفرملة بتحصل بالشكل دة لأنك بتدوس دوسة خفيفة مابتزودش بيها سرعة بس اولا بتفهم الكونترول انك رفعت رجلك فبيوقف الأمداد بالوقود وثانياً بتحجم سرعة العربية بقد سرعة الغيار اللي متعشقة عليه

ومش هلاقي موضوع احسن من موضوع أخويا الدكتور مصطفي بيشرح الفرامل اللي من النوع دة واليكم لينك الموضوع للتعرف اكثر علي فرامل المحرك http://www.nilemotors.net/Nile/20573...post3873336969

طب تعالوا دلوقتي نعرف ازاي ادوس فرامل في المواقف المختلفة وفي كل الأحوال هبص في مراية الصالون قبل ما افرمل

وانا داخل مثلا علي مطب
اولا لازم نعرف انك لو فرملت جامد والعربية بتزحف بتكون المساعدين الأمامية عليها حمل كبير ومضغوطة للداخل
لو حضرتك دخلت علي المطب بالشكل دة - ممكن لا قدر الله تكسر فيها مساعد - وبالتالي لازم ادوس قدر المستطاع بقوة (زي ما قولنا من شوية) وياريت لو تسيب وتدوس فرامل تاني تحسباً انك تكسر او تبوظ ماستر الفرامل بتاع العجلات
وقبل المطب بلحظات ارفع رجلي من علي بدال الفرامل تماما واسيبها تيجي زي ما تيجي - وعلي كل الأحوال هتكون اهون من كسر مساعد

اتفاجأت بعربية واقفة قدامي والعربية اللي ورايا قريبة
هتدوس فرامل بقوة وهتسيب الفرامل - وهتدوس نبضات متتالية ولما تقف قبل العربية اللي قدامك هتسيب فرامل خالص تحسباً لا قدر الله ان لو اللي وراك ريح عليك يبقي مفيش مقاومة وعربيتك انت كمان تريح معاه - بس تخلي بالك لحسن تخبط انت في اللي قدامك

داخل علي ملف بسرعة
هتهدي قبل الملف بفرامل البنزين زي ما وضحنا قبل كدة وتفضل تفرمل بالبنزين حتي وانت في الملف واوعي تدوس فرامل جامد جوة الملف او تمور العربية في ملف

ملاحظات عامة

1- لو هتخفض سرعتك أكتر من النص يبقي لازم تشغل الفلاشر Park Flasher
2- احنا متفقين انك قبل ما تفرمل بتبص في مراية الصالون Rear Mirror - لو لقيت وراك عربية نقل او عربية انت حاسس ان فراملها اضعف منك (كأن تكون سيارة أقدم في الموديل) حاول تسيب مسافة بينك وبين اللي قدامك تلحق فيها نفسك لو لاحظت اقتاربه منك بشكل يدعو للقلق والأحسن ماتمشيش قدام عربية نقل من الأول تحت اي حال من الأحوال
3- بنفس المنطق السابق - ما تجريش ورا عربية بسرعة وتقلل المسافة بينك وبينها لو كانت عربية انت حاسس ان فراملها احسن من فرامل عربيتك - كأن تكون مثلا مرسيدس او بي ام اخر موديل وانت عربيتك موديل تسعينات او عربية فيها abs وانت فرامل عربيتك عادية
4- حاول دايما تسيب مسافة أمنه بينك وبين اللي قدامك
http://www.nilemotors.net/Nile/26349...post3874012575
5- تأكد دائما من سلامة انوار الفرامل الخلفية في السيارة والأفضل تركيب استوب خلفي أضافي 3rd brake light اذا لم يكن موجود


أتمني الشرح يكون بسيط وماكنش طولت عليكم
وربنا يستر طريقنا جميعاً
والله المستعان
،
،
أقرأ ايضاً
سلسلة فنيات القيادة - الحلقة الرابعة
سلسلة فنيات القيادة - الحلقة الثالثة
سلسلة فنيات القيادة - الحلقة الثانية
سلسلة فنيات القيادة - الحلقة الأولي