الموضوع: علبة الدريكسيون الشقية للصني

بص ياباشا انا مش هقدر افيدك فى علبة دركسيون صنى لانى لا اعلم عنها شىء تماما لكن بتجربتى مع عربيتى السابقة وبالرغم من انى ليا علاقة بقطع غيار السيارات الفيات والكورى الى حد ما الا انى غيرت علبة الدركسيون كاملة فى عربيتى الشاهين وطبعا الناس جابولى احسن حاجة فى السوق وبالرغم من كل دة فضلت عربيتى تغير علبة دركسيون كل 6 شهور تقريبا لان كل الى فى السوق مضرووووووب فنصيحة اخوية انك تصلح العلبة لو ينفع افضل مليون مرة من علبة جديدة ...واعتقد ان اقرب حد ليك شارع دمشق فى ناس محترمة كتير تقدر تجيب منهم الى انت عايزة

بص يا باشا الاستيراد انتا وحظك وممكن تركبة ويطلع الاويسيلات مش كويسة واللي عندك طالما مش فيها بوش غير الاويسلات وركب (اما بقي لو قررت تشتري جديد فدة احسن طبعا )

ممكن تسأل فى الحرفيين بس زى الزملاء ما قالوا مش هتضمن الاستيراد .. حاول تصلح العلبة و شوف أدائها معاك .. لو فشلت أشترى جديد و ريح دماغك .
اللينك ده لو حابب تعرف أسعارها جديد أو مستعملة
http://www.nilemotors.net/Nile/205196-a.html

كل الشكر لاخوتي اعضاء المنتدي الكرام
ونزلت بعد الجمعة علي محلات قطع الغيار في الحي العاشر والسابع للاسف مالقيتشي طقم اويل سيل للعلبة ونصحني احد البائعين بالتوجة الي شارع دمشق بمصر الجديدة ونزلت شارع دمشق اسال لله ياسيادنا اويل سيل علبة دريكسيون صني ومالقيتش عند ولا حتي فاترينة صغيرة قلت ياواد ماتروح الحرفيين هتلاقي هناك كنوز والماظ زي مغارة علي بابا واسال براحتي وسيبك من زحمة الحرفيين يوم الجمعة ركبت العنقاء واصطحبت الخل الوفي ويلا بينا حد شاف اويل سيل علبة دريكسيون صني واضح اني باأسأل علي حجارة من كوكب بلوتو مش اويل سيل دة ابدا ..زاشي اللي يولك العالمية مايعرفههوش اشي اللي يقولك علي محل يطلع استيراد وهلم جرة اتفسحت لمدة 4 ساعات ثمينة من يوم اجازتي وللاسف بلا فائدة غير البهدلة واحساس داخلي اني باشحت قطعة غيار في منتهي الهبل
والاكادة اني مسالتش علي علب الاستيراد لقناعتي ان الاويلات سيل فيها بتكون نشفت من الركنة لمدة طويلة وبعدين بختك يابو بخيت بقي في الاخر شكلي هافك العلبة بالكامل واسأل علي الاويل سيل منفرد عند محلات متخصصة في الاويل سيل بالتوفيقية باكر بقي والسهرة النهاردة في فك العلبة وتعليم اكس الدريكسون علشان بلف توزيع الزيت ما يخلفش توقيتة مع الراك ونعيش بيقي في علبة الدريكسيون ويلللاااااا المهم كدة كدة هافك بس انك تفك وتنزل تجيب الحاجة وبعدين ترجع تركب تاني محبط جدا وبتبقي زي الفرخة الدايخة انما امر ربنا
مش عارف ابو حميد فين وافتكاساتة النيسانية سايبني كدة ماشي ياسيدي ربنا يباركلك
تحياتي للجميع وهاطلعكم علي الاخبار اول باول

المشاركة الأصلية كتبت بواسطة Ramy Rateb

ممكن تسأل فى الحرفيين بس زى الزملاء ما قالوا مش هتضمن الاستيراد .. حاول تصلح العلبة و شوف أدائها معاك .. لو فشلت أشترى جديد و ريح دماغك .
اللينك ده لو حابب تعرف أسعارها جديد أو مستعملة
http://www.nilemotors.net/Nile/205196-a.html

شكرا يارامي علي مشاركتك في محنتي لكن 4000 جنية في التوقيت دة وعندك عيال وبيت وووو وبعدين العلبة سليمة القصة اويلات سيل يمين وشمال وبارتين وخلص الفيلم وبعدين ازاي توكيل نيسان مافيهوش اويل سيل علبة دريكسون امال توكيل ازاي ولا ندبح الناس بعلب كاملة الله وحدة يعلم مصدرها وبلاخص اليومين دول وبعدين العلبة لما تبوظ تاني يبقي خالتك في العشة ولا طارت بصراحة التوكيلات برة بيبقي فيها كل شيئ لو عايز تجمع العربية من a :zهتلاقي لكن بلاد مصر ستان ابدا قسمتنا ونصيبنا بقي والله المستعان
طيب هاقولك علي حاجة في امريكا من سنة 86 بقي فية موضة جمع عربيتك بنقسك او kit car
وبقت فية شركات متخصصة بتعمل اسطنبات لموديلات شهيرة زي اللامبرجيني والفيراري والهمر وبعضها قديم زي الكوبرا والبوجاتي والموديلات الكلاسيك القديمة وبتشحنهالك للبيت ياما مجمعة دون الموتور والات نقل الحركة وانت تختار او متفصصة فتافيت وعيش انت في المونتاج بقي والدهان ودورات الفرامل وضفيرة الكهربا ...بتعمل العربية بنفسك وبتترخص كمان وكل حاجة موجودة والناس هناك بتعمل عربيات تحف بجد وبتبقي اشباة خطيرة لموديلات غالية بسعر لا يتعدي 13000 دولار لسيارة قد تكون قيمتها فوق ال200000 دولار بس كيت
مصر بالجمال بتاعنا دة فين علي الخريطة مع العلم ان فية كتير دلوقتي بيعملوا كل حاجة في عربيتهم بايدهم وبمهارة فائقة توفيرا لقرف الصنايعي وضمانا لحاجتهم وتوفيرا للوقت والمال
يامسهل سهل ييييياااااااااااربببببببب ب

ربنا يعينك .. ان شاء الله ربنا يسهل الأمور بكرة و تلاقى قطع الغيار .

اخوتي النيسانوية المحترمين اليوم تاني يوم عذاب ولف علي اويلسيل العلبة في التوفيقية ثم شامبليون ثم جميع محال الاويل سيل للبحث عن الويل سيل للعلبة بلا جدوي قلت ياواد اطلع علي الجيزة يمكن وبالمرة اشوف التوكيل في شارع المساحة وماكدبتش خبر رحت وركنت العربية بعد ما طلع عيني علي مكان فاضي بلاجدوي ورحت التوكيل ولسة باقولة علي الاويل سيل لقيتة بيقلي يحنن مافيش غير علبة كاملة وتدفع 5000 جنية وتيجي بعد 10 ايام ومعاك ربنا بقي
جالي احباط والظاهر لا مفر من شراء العلبة كاملة لان مشكلة الاويل سيل انة فيو طبقة داخلية تفلون علشان التأكل وتخفف الضغط علي شفة السيل لزيادة الاحكام وكمان علشان تدي عمر تشغيل طويل
المهم استقريت علي شرا علبة استيراد مؤقتا ورجعت البارات الداخيلية والخارجية للعلبة كنت اشتريتهم وانا بالف النهاردة من التوفيقية ب450 وقلت تكمل بالاويلسيل وتبقي العلبة كأنها جديدة
وطبعا المشوار دة بعد مارجعت مدينة نصر الضهر لاني اة بالمناسبة نسيت اقولكم العربية الكروما اتكلبشت في شارع المساحة ودخت علي مالقيت الونش جنب تمثال النهضة بيشرب الباشا عصير وانا باتعصر عرق من الحر والقرف
ورجعت علي البيت طهقان وقرفان ونزلت تاني العصر التوفيقية ارجع اللي اشتريتة
وحابقي احكيلكم علي الباقي