الموضوع: ازاى تغير فلتر التكييف بنفسك(ابيزا-كوردوبا-بولو-جولف)

السلام عليكم ورحمة الله وبركاته

اكمنى اول مرة اشحن التكييف واول مرة اساسا عربيتى يبقى فيها تكييف فـ مكنتش اعرف اذا كان التكييف ضعيف او قوى بس اللى كنت متأكد منه ان كان فيه روائح غريبة بتطلع من الهوايات أول ما أشغل التكييف
فـ نويت والنية لله انى أغير فلتر التكييف بعد 15 سنة لأنه الفبريكة بتاع العربية ومتغيرش قبل كده لأنها كانت مفيهاش تكييف

روحت قولت للراجل بتاع قطع الغيار عايز فلتر تكييف ابيزا وهو نفس الكوردوبا ونفس البولو بس مش عارف زى الجولف ولا ايه لكن عموما طريقة التركيب واحدة فى الـ4 عربيات

كام يا عمو؟؟ 80 جنيه يا حبيبى



اول مرة اسمع عن النوع ده, جايز عشان مشتريتش فلتر تكييف قبل كده

طيب الخطوات ايه:
1- افتح الكبوت
2- شيل الكاوتشة اللى ماسكة الطوربيدو(قطعة البلاستيك اللى تحت المساحات)
متشيلش الكاوتشة كلها


3- شيل الطوربيدو
خلى بالك عشان ميتكسرش لأنه رقيق


يا سواد السواد يابا رشدى

4- هتلاقى كلبسين من قدام, هما دوول اللى ماسكين الفلتر
فكهم وطلع الفلتر بالأطار بتاعه





لو حبيت تنضف القاعدة بتاعت الفلتر خلى بالك اوعى ينزل تراب جوه عشان هتلاقيه عندك فى الصالون

5- هنشيل الفلتر من الأطار اللى كان بايت فيه, وننضف الأطار كويس



6- هناخد الفلتر الجديد ونعشقه فى الاطار
بس خلى بالك لأن الفلتر رقيق قوى وممكن يبوظ



7- هنبيت الأطار فى مكانه ونتأكد ان حواف الاطار متعشقة مع القاعدة عشان نمنع اى تسريب للأتربة ومتنساش تتأكد من الكليبسات



8- هنرجع تانى نركب الطوربيدو ونركب الكاوتشة ومتنساش تقفل الكابوت


تقييم الأداء بعد التركيب:
مبدأيا أنا بقالى فترة حاسس انى تعبان وهمدان وصدرى بيشخشخ وده كان بيحصل لما كنت اشغل التكييف وعرفت ان السبب طلع من البكتيريا اللى كانت متحوشة فى الفلتر وكمان هو اللى كان عامل الريحة
لما كنت احب اشغل التكييف كنت لازم اجيبه على 3 فى اول التشغيل لحد ما يبرد الجو شوية وبعدين انزل لـ 2 لأن لما كنت بجيبه على 1 مكنش فيه هوا اساسا بيطلع
لكن بعد ما ركبت الفلتر شغلت التكييف على 1 وطفيته تانى لأنى سقعت

والى اللقاء فى جريمة أخرى