الموضوع: سؤال ﻷصحاب الخبرة للعربية الماروتى

المشاركة الأصلية كتبت بواسطة amr axel

العربية موديل كام و عاملة كام الف ؟؟
ايه اخر الصيانات اللي عملتها ... و و بتدور العربية الصبح او بعد مشوار ازاي ؟؟

الف شكرا ياباشا ياكبير على اهتمامك السريع بالموضوع
العربية موديل 2004 لسة شاريها من 6 شهور وعاملة حوالى 80000 كيلو وماعملتش صيانة قبل كدة على اساس الللى باعلى العربية قالى ماتصرفش عليه العربية حلوة

المشاركة الأصلية كتبت بواسطة max100x

حاجه من الاتنين
يا كهربا
يا كربراتير
و الاتنين بيحتاجوا ظبط

شكرا يامعلم اولا على اهنمامك بالموضوع
ثانيا/ انا كانت عندى مشكلة فى الكهربا كانت عالية لما كنت افصل العربية الاقيها بترج وبترعش جامد روحت بعد كدة قللت الكهربا قلت العملية دية شوية تفتكر ان غياب الدوران دة من الكهربا

المشاركة الأصلية كتبت بواسطة amr axel

طيب مبدأيا انت ارتكبت غلطة و احمد ربنا ان مفيش اي حاجة حصلت لحد دلوقتي و الغلطة ديه انك تسمع كلام اللي باعهالك و متعملش حاجة في العربية
فيه صيانات وقائية المفروض بتعملها للعربية عشان تبقي في السليم اولها سير الكاتينة و البلية لأنها حاجة مش متشافة و متعرفش غيرها اخر مرة امتي و يا تري النوعية اللي ركبها نضيفة و لا اي كلام
ويتبص ع سير الدينامو و حالته لو محتاج يتغير
تغيير زيت الفتيس و اوعي حد يقولك يتزود بس لو نقص معناه فيه تسريب عندك و ساعات بيبقي نصب فتغير الزيت و من جيركن متبرشم و يعبيه بالرداخ اوعي يعبيلك من الطرمبة البرتقالي لأن الزيت جواها غير معروف و شوفت بعض المحلات بتحط اي بواقي زيت في الجركان عندهم و العربية بتاخد زيت لزوجة 75w90 او 80w90 و بتاخد 2 لتر
و طبعا تغيير زيت الموتور مفروغ منه و فلتر الزيت مع كل تغييره و المناسب للموتور عندك زيت لزوجة 15w50 او 20w50 , ده تغييره كل 4500-5000 ك
غير فلتر البنزين و تبص ع فلتر الهوا لو محتاج يتغير تغيره
يتبص ع طقم الكهربا
تغييير باقي السوائل زيت الفرامل و ده بيتغير كل سنتين او 40 الف ك لنه بياخد شوائب و يفقد خواصه و بيأثر ع اداء الفرامل فالميكانيكي يفضي الدورة كلها و يعبي من الزيت الجديد و ينزل الجديد من كل عجلة لوحدها شعان ينضف الدورة و بعدين يملي من الزيت الجديد تاني اهم حاجة اوع تخلط كذا نوع ع بعض و الانواع اللي يفضل استخدامها بيندكس و لوكهيد و اس ال
مية الريداتير برده بتتغير كل سنتين او 40 الف تقريبا و افضل و اضمن انواع المية في السوق مية ريداتير موبيل و بالمناسبة متخليش حد يشيلك الترموستات و يقولك ملهاش لازمة

طبعا لو البطارية سايلة يتكشف عليها كل شهر او شهر و نص و تتزود و الا هتضرب لو نشفت اما لو جافة خلاص ممكن من وقت للتاني تقيس الشحن

تشوف حالة الكاوتش و الجنوط و ترصص لو بترعش منك و تظبط زوايا لو بتحدف و انت ماشي
و تربط عفشة

تنضف البوابة و الكربراتير و تزييت الاجزاء الخارجية فقط و ترجلش دواسة البنزين و الفرامل و بالمرة شحم عصاية الفتيس من تحت و ربطها و تربط اي مسامير في العربية

بس كده و شوف العربية بعد القصة دي :)

بخصوص اللي عندك بخصوص التدوير غياب دوارة ليه اسباب كتيير لكن في حالتك اعتقد ده بسبب الموبينة لأنها عادية مش الكتروني فمع الحرارة و لما تسخن اوي ممكن تخلي العربية تغيب في الدوارة او الموبينة تفصل
و لو فصلت منك فلازم تستني شوية عليها لحد ما تبرد او فوطة مندية و تحطها عليها و تشيلها

يااااا دة الموضوع كبير قوى ومش شراء عربية والسلام انا على العموم كتبت الحاجات دية فى ورقة وان شاء اللة ربنا يقدرنى واعملها وللمرة التانية انا بشكرك كتير قوى قوى على المعلومات الهامة دية وانا من اسكنرية لو محتاج اى حاجة من هنا قول واللة مش عزومة المرا كبية