رابطة متضرري صني 2013 الجديدة

**eidrabie** · 24-06-2013 04:10 PM

بسم الله الرحمن الرحيم

نظرا لما وجدته من خلا البحث علي المنتدي لكثرة المتضررين من عيوب نيسان صني 2013 الجديدة وانا منهم (مستلم العربية شهر 7 2012)وكانت بعض العيوب التي عانيت منها كالاتي
1- صوت الفرامل الخلفية(زي التريلة )
2-صوت الفراميل الامامية
3-ضعف في استجابة الفرامل بسرعة كبيرة مع الوقت
4-عيوب التقفيل الواضحة جدا (حلية الابواب خلعت التابلوه بلاستيك معاد تصنيعه ومش متقفل كويس بالمرة يعني يوجد اماكن فاضية في التقفيل )

للامانة ما تم في التوكيل كان الاتي
1-تركيب الصاجة الخلفية
2-تغيير تيل وطنابيير امامي

وكانت النتيجة
1-عودة الصوت الخلفي مرة اخري بعد 3 شهور
2-عودة صوت امامي جديد (تقريبا من المساعدين صوت نحرة او احتكاك كاوتش بحديد)

انا كلمت نيسان قالولي روح للتوكيل وبعدين هما هيقولوا ايه المشكله وبعدين ممكن تقدم شكوي

الصراحة انا عانيت عشان الحاجات اللي اتغيرت في الضمان قبل كده وكمان لسه في ناس عمالة تعاني فقولت نعمل حاجة نجمع بيها كل المشاكل ونكون مجموعة مؤثرة ونتقدم بالشكوي لحمايةالمستهلك علي الاقل نكون اخدنا بالاسباب وان شاء الله نقدر نصلح كل عيوب العريبة حتي لو الامر انهم يستدعوا الصني الجديدة للكشف عليها

**abou-yahia** · 24-06-2013 05:06 PM

حضرتك عندك 2 اوبشنز

تخليك مع التوكيل الي اصلاح كل العيوب وتستغل فتره الضمان خير استغلال

واذا قابلت منهم تباطوء او عدم استجابه عليك وعلي حمايه المستهلك علي طول

الاوبشن الاخر هوه التخلص منها ذي ما بيقولوا خساره قريبه احسن من مكسب بعييييييد

وده يرجع لحضرتك وتقييمك لدرجه تحملك لما سبق وذكرته

تحياتي

**hamaka** · 24-06-2013 06:28 PM

لازم تتجمعوا و تبقوا يد واحدة عشان تعرفوا تجيبوا حقكم ، العربية واضح انها فيها مشاكل كتير ، و توكيلها بالرغم من انه كويس بشهادة الجميع و بيعالج المشاكل ، الا ان عودة المشاكل نفسها مع بعض الناس بعد علاجها للأسف تنذر بان ملاك العربية هيتبهدلوا بعد الضمان ، فا لابد من حسم المشاكل الأن من خلال حماية المستهلك...

**مانويل مايكل** · 24-06-2013 07:07 PM

لازم كمان ملاك صنى شكل قديم 2013 المتضررين ينضموا ليكم
وانا اول واحد 1500 كيلو تسريب فريون وتسريب فى الريداتير . ومفيش ريداتير بقالى 10 ايام مستنى . ومشاكل كمان فى شحن العربية . رجاء خلوا الرابطة 2013 جديد وقديم

**bahaahssn** · 24-06-2013 10:37 PM

اكيد انا اول واحد معاك فى الموضوع ده كل اللى قولته عندى واكتر بكتيير

**Ahmed Amin** · 25-06-2013 12:42 AM

بالتوفيق يا جماعة, وممكن تتواصلو مع الناس اللي هنا في المنتدي اللي عملت شكاوي فردية في جهاز حماية المستهلك بالفعل, وتتجمعو مع بعض وتروحو في يوم عشان يبقي فيه أهتمام أكبر.
سواء للناس اللي هتشتكي جديد من العيب, أو للناس اللي بتتابع شكوتها..

وإن شاء الله لما تكون الشكاوي متجمعة الجهاز يلزم التوكيل بتغير الأجزاء اللي فيها عيوب صناعة, وأطلبو منه أنهم يدوكم ضمان جديد علي القطع اللي هتتركب عشان لو فيها نفس العيب تتعدل قبل ما يركبوها ويظهر نفس العيب تاني, وتفضلو تلفو حوالين نفسكم, وفترة الضمان تعدي..

وبرضة لو تراسلو شركة نيسان الأم في اليابان وتشرحو لها الموقف اللي عندنا هنا,

خصوصاً للناس اللي غيرت قطع والعيب رجع تاني بعدها علي طول,
أو الناس اللي التوكيل بيحاول يماطل معاها ويعطلها ويقولها القطع ناقصة.!! لحد ما ضمانها يعدي,
"مش فاهم أزاي تيل ناقص من التوكيل"

وتبعتو إيميلات للشركة فيها أرقام ال VIN وسبب المشكلة,
وتطلبو منهم أنو يتعمل لعربياتكم Recall زي العربيات اللي عملو ليها Recall في الهند وأوروبا ودول في أفريقيا,

نيسان تٌعلن عن إستدعاء صني 2013 بسبب عيب بالمكابح
http://www.nilemotors.net/Nile/359665-2013.html (نيسان تٌعلن عن إستدعاء صني 2013 بسبب عيب بالمكابح) (نيسان تٌعلن عن إستدعاء صني 2013 بسبب عيب بالمكابح)

لأن واضح إن هنا في مصر عاللي بيحصل دلوقتي من نيسان إيجيبت أنهم عايزين يكروتو الناس, وبيأخروكم لحد ما تخرجو من الضمان..!
http://www.nilemotors.net/Nile/364916-a.html

**Elkordy2000** · 25-06-2013 11:14 PM

انتو يا جماعة بتتكلموا علي الصني الصني ولا عربيه صيني , بصراحه الله يكون في عونكم وان شاء الله تتحل مشاكلكم وخصوصا ان التوكيل مشهود له بالكفاءه

**eidrabie** · 26-06-2013 03:13 PM

يجمان عة ياريت كل واحد عنده مشكله يضيفها لقائمة المشاكل عشان نجمع اكبر قدر من المشاكل العامة في العربية وان شاء الله هيكون في قائمة فيها اسماء الاعضاء كمان نكمل الاحصائيات كلها