الموضوع: بوجيهات -كاتينه تقسيمه -قربة ردياتير

المشاركة الأصلية كتبت بواسطة elandlos

السلام عليكم ورحمة الله وبركاته
تقرير سريع عن شوية صيانات للفليشيا
.... تم تغيير كاتينة التقسيمه ..... ليه ؟؟؟؟
كان الموتور خشن جدا فى صوته نتيجة ترخيم الكاتينه وده بيأثر طبعا على انتظام دوران الموتور وعلى عزمه وعلى قدرته عموما اللى بالتالى بتترجم الى استهلاك بنزين وسخونه وضعف عزم الخ
سعر الكاتيه + الجوان + اويل سيل طمبورة الكرنك +جوان الكارتير اخذته فى السكه +ضبط تاكيهات
2000 جنيه +مصنعيه 100
النتيجه (نعومه فى صوت الموتور ملحوظه جدا وكمان تحسين الاداء والعربيه بقت هجامه )
.... البوجيهات ودى كانت مشكله
الاعراض : لخبطه جامده فى اول دواره فى الصباح +المناوره اثناء السير والهروب فى المواقف المختلفه زى الزفت متسعفكش ولاتعبرك + الضغط المفاجىء على دواسه البنزين يؤدى الى الميل الى توقف المحرك
السبب: فيه مابين مؤخرة البوجيهات ومسطرة لاشتعال (موتورانجكشن) مسافه بسيطه تشغل بسوسته .
هذه السوست كانت متآكله تماما ومصديه وفيه واحده تكاد تكون غير متواجده
ماتم : تغيير البوجيهات بنوع بوجيهات يابانى 65 جنيه 2 شمعه
النتيجه انتظام فى الدواره وعزم ممتاز واختفاء كل الاعراض
التكلفه : 100 جنيه بالمصنعيه
.... قربه المياه
مشروخه من اعلى وبيحصل بخر ونقصان للمياه لكن الحقيقه لم تكن لها تأثير فى سخونة العربيه تقريبا اللى كان شايل الليلية المروحه كتر خيرها
الاعراض : نقصان مياه كل يوم كوب مياه تقريبا طبعا مع الاخذ فى الاعتبار لايوجد تسريب مطلقا فى الدوره ولا فى الزيت لاقدر الله
التكلفه : قربه 45 جنيه تركى + 10 جنيه مصنعيه طبعا كان ممكن اركبها بنفسى كويس جدا ولكن فلندع بعضنا يرزق من بعض
بصراحه ياجماعه الميكانيكى اللى انا زبونه شاب ممتاز جدا ودقى وعيان بالوسواس لو بيربط حاجه وكلمته وانتبه لك وعاد الى الشغل بيعيد تانى على كل اللى ربطه من جديد وبيعد الخطوات اللى بيشتغلها واللى بيفكها علشان يرجع يتمم عليها فى نهاية الشغل زى المخزنجى .
خلاص كده اتمنى ان اكون قد افدت حد
ودمتم فى رعاة الله

بارك الله لك وفيك اخى الكريم على التقرير النافع باذن الله....*

ما فيش حاجة نقدر نتكلم فيها حضرتك خلصت ولخصت اليلة بإمتياز....

انما اللى انا مستغربة ال2000 جنية جبت بيهم ايه ؟؟؟؟؟؟؟؟؟؟؟

كلام جميل وممتاز وحاجة كويسة فعلا وأنتا رايح تعمل شغل عن اى حد وانتا عارف محتاج اية بالظبط

شكرا على التقرير ......... وياريت حضرتك تقولي الاويل سيل بتاع طمبورة الكرنك سهل يتغير منغير فك فى اجزاء الموتور ولا لاء

علشان عندي شك ان الزيت بينقص من المكان دة بعد ما نضفت جوان الكارتيرة وركبته ظهر تنشيع زيت

وشكرا

المشاركة الأصلية كتبت بواسطة elandlos

احمد بيه احلى صباح ومية ورد وفل عليك
كل شىء وارد هذه الايام بنبقى شريين قطعةالغيار وبنركب جديدة ونكتشف انها بايظه فخليك جاهز للنقطه دى
بالنسبة لتسريب الزيت سهل جدا اكتشافه وتحديده
نظف كويس المنطقه المشتبه فيها التسريب وتانى يوم ارفع العربيه كويس ومعاك كشاف متين او بلدوسه وافحص كويس خط سير التسييل وخاللى بالك ممكن التسييل من نقطه ولكن الزيت بيتحرك ليسقط على الارض فى مكان تانى خالص مفهوم طبعا
كمان خاللى بالك فيه صنايعيه بتركب وتقفل بالسيلكون بدون جوانات وده خطأ كبير ومش كل مره بيكون صح
تأكد ان وش التقسيمه متقفل كويس وبجوان وبالجملكه وانا حاسس ان الزيت منه لأنه بيغلب الصنايعى شويه ولو الصنايعى مستعجل يبقى هيجيب زيت منه.... تأكد ان الكرتير متقفل بجوان بالسيلكون ...تأكد ان الصنايعى نضيف فى شغله وبيدى الشغله وقتها ومصروفها
اما بالنسبه لطريقة التغير لأويل سيل الكرنك سهله جدا
رفع مقدمه السيارة على كفلتات -فك العجله اليمين -تسقيط الموتور من قاعدته من الجهه اليمنى -تسقيك سير الدينامو وطلمبةالمياه وخاللى بالك علشان ميحرقش على السير ويبوظ الطلمبه ...ترخيم السير فى حدود 1 سم تقريبا
اتمنى اكون اضفت لك حاجه

الف الف شكر يا باشا على شرحك المفصل ......... اللى سيبلي مفاصل رجليا

هههههههه معلش المرة دي ممكن استعين بالدكتور علشان شكلها هتكون مش سهلة زي اى حاجة انا بعملها ..... عموما انا زوت زيت وحرقت على مسمارين وش التاكيهات
والــ 4 مسامير اللى تحت البوجيهات وعندي امل الترشيح يخف شوية

تحياتي ليك ياكبير