الموضوع: رسالة من مشروع عريس بيحب العربيات لعروسة المستقبل-مقال ساخر

كتب احمد نوح :Ahmad Nouh

September 30


بما ان كل الناس اليومين دول مصممة تسألني هتجوز امتى ، فأنا قررت اكتب شوية حاجات ناوي ابقى وريها لأي واحدة هتقدملها فى المستقبل علشان تبقى فاهمة هى مقبلة على ايه ، والقايمة دي اعتقد تمشي على اى واحد بيحب العربيات ..

عزيزتي شريكة العمر :

متزعليش لما ابنك يعرف أهمية سير الكاتينة قبل ما يعرف أهمية حزام البنطلون

متستغربيش لو لهفتك شبشب كروز موجه وأنتي معدية قدام التلفزيون أثناء ما بتفرج على اى سبا...ق فورميلا 1

كون أن السمكري يعرف عني اكتر منك مش معناه أبدا أنى هتجوز بنته ، وده لا يعني بالضرورة أنى حاولت ومنفعش .. منه لله اللي كان السبب

أنى أروح الجيزة فى 5 ساعات علشان أجيب زيت معين للعربية مش معناه أبدا أنى هقدر أجي معاكي ساعتين فرح صاحبتك ، هسيب شغلي بقا ونفضى لإصحابك !

نطاق مسؤولياتك فى البيت يمتد إلى العربية ، بمعني انك لما تركبي معايا وتلاقي العربية كلها ورق وأكياس يا تتبرعي مشكورة بجمعهم أو تعايشي مع الوضع وأنا مع الوقت هبتدي ملاقيش مكان اركب فيه وهلمهم

أنا ممكن أعلمك السواقة علشان ارتاح من مشاويرك ، بس جو مجموعات التقوية اللى هعملها لإخواتك واصحابك ده لو مش بفلوس ، او ليكي أصحاب لبنانيات .. يبقى فكك

لما انزل متضايق وارزعلك باب الشقة ، بابي وأنا حر فيه ، إنما تنزلي من العربية وترزعي الباب .. همثل بيكي مشهد " الأرض لو عطشانة " بتاع محمود المليجي

متزعليش من أن ابني غالبا هيقول بيب بيب قبل ما يقول بابا ، وعن عن قبل عمو ، وبريمبو قبل أمبو

أنا علاقتي بولاد خالتك وعمتك إني بعاملهم كويس علشان خاطرك وخاطر لسان عمتك ، ما دون ذلك لا عايز اعرف جوزها شغال فين ولا بيعمل إيه ولا اقدر أكلمك عن المرة اللى قفشته فيها عربيته عطلانة فى نفق الأزهر ومعاه ناريمان صاحبتكم ... وشوفت ... لا بس حلو نفس الأزهر ، ما شاء الله إضاءة وتهوية روعة ... وبيختصر وقت ابن لذينا .. والله زى ما بقولك .. عطلان ؟ .. مين اللى عطل ؟!

لو خلفتيلي عيل بيجيله " دوار حركة " ومبيحبش يركب العربيات ، مش عايزه .. رجعيه مطرح ما جبتيه

متزعليش لما تلاقي ابنك العيال بتتخانق مين أقوى مازنجر ولا جرندايزر ، وهو جايلك يقولك انه محتاج نقطتين زيت أكل علشان بيعمل حاجة فى موتور عربيته اللى بريموت !

لما يكون النور قاطع وأنتي مولعة شمعة وأقولك ألفاروميو ، ميجلكيش بقا مرض الودان وتقوليلي يعنى أنا جوليت ؟!

بقولك الفاروميو ، بفكر أبيع اللانسر وأجيب الفاروميو ، جوليت إيه ! ، قومي شغليلنا سورة البقرة ، ولمي شعرك ده ... وبترجعي تقولي أنت بقيت تنام فى النور ليه من ساعة ما أتجوزنا !

لما اطلعلك بالقميص عليه تراب وزيت مش عايز بقا مصمصة والله يرحم أيام الخطوبة والشغل ده ، أنا طول عمري أصلا مزيت ، الدور والباقي على ثيم الهالوين بتاع الشيف شربيني اللى انتى عايشة فيه من يوم ما اتجوزنا بالمريلة اللى لغاية النهاردة مش عارف اللى عليها ده صلصة طماطم ولا بقايا عيال صغيرة !

متستغربيش لما تلاقيني قاعد فى الاوضة عمال أقول ايوة بقا ، يا بنت اللذينا ، ورينا كمان ، هو ده الشغل ... ومن ثم تفتحي الباب تلاقيني بتفرج على عربية عمالة تجري فى مطار مهجور ووراها سحابة دخان ابيض !

لا مش قاعد بلعب وسايبك ، ركزي معايا .. أنا بلعب ايه ؟ .. ايوة عربيات .. وأنا بشتغل ايه ؟ .. كويس انك فاكره .. أنا قاعد بلعب علشان هكتب مقالة عن اللعبة .. طبق فشار بقا وسيبيني أشوف حالي الله يكرمك

انهي واحدة بقا فاطمة ؟ ، اه اللى نزلت من الـ X5 ، واللى بتحبه ؟ .. يا شيخة الواد بتاع الـ S-Class ده ؟ .. يعنى سايبه أبو شعر اللى راكب بنتلي ده وماشية مع بتاع الـ S-Class ؟ .. انتى بتصدقي المسلسلات التركي دي ؟

انك تبقى مش مؤمنة بيا دي جريمة لا تغتفر ، قولتلك اربطي الحزام واسكتي .. وحياة امه منا سايبه من هنا لمطلع الدائري ... ده لطش المراية بقولك !

أنا معنديش اى مشكلة انك تعملي عش أفيال جنب السفرة ، أو تعلقي الكنب فى السقف كتجديد ، أو تعملي الأرضيات قزاز وتحتها أطقم الصيني بتاعتك فى مية والسمك بيعوم حواليها

لكن تقوليلي مينفعش أحط بلوك الموتور الـ V8 ده فى أوضة المكتب بتاعتي ؟! ، مش أنا يا هانم !

اليوم اللى همضي لأبوكي فيه على قايمة بالعفش ، همضيه على قايمة بكرسي لانسر بومة قدام يمين ، وفردتين كومهو 14 بوصة يمين ، وباب أمامي رمادي يمين حالة الفابريكا

اه مضمنش فى يوم اسيبك ارجع الاقيكي خدتي الكرسي والباب وسبتيلي العربية طفطف !

متخافيش على ابنك وهو تحت العربية مش هيجراله حاجة ، هو هيحل طبة الزيت ويطلع علطول .. لا العربية مش هتنزل عليه ولا حاجة .. لا مش هيحصله زي ابن صاحبتك متخافيش .. صاحبتك أصلا جوزها معفن وجاب كوريك رخيص .. ايوة ده صيني برده بس صيني نضيف !

لما تكوني معايا وتشمي ريحة شياط فى العربية واقولك متخافيش يبقى متخافيش .. انا واثق بنسبة 60% انه بلاستيك ماسك فى الشكمان .. 60% قليل ؟! .. انتى تعرفي انك لو مبطلتيش تعصبيني وانا سايق نسبة وصولنا للبيت سالمين أصلا أقل