الموضوع: رسالة من مشروع عريس بيحب العربيات لعروسة المستقبل-مقال ساخر

المشاركة الأصلية كتبت بواسطة Donzi

رسالة الى عزيزي عريس المستقبل من بنت – على غير العادة - بتحب العربيات

بما ان معظم الشباب واقعين في غرام عربياتهم وفاكرين انها هاتبقى عدوة مراته الاولى و احتمال الاخيرة احب اقولك مش لوحدك يا برنس عشان في بنات بتحب العربيات زيها زيك و يمكن اكتر و لو قدرت تستحمل الكام الحاجة الجايين دول يبقى ممكن البنت السوبر دي ترضى بيك


لما تبقى معاها في العربية ولا قدر الله العربية تاخد مطب ولا تتهبد في نقرة و تلاقيها بتطبب عالعربية و تقولها انا اسفة حقك عليا مكنش قصدي والله مخدش بالي و الدمعة هاتفر من عنيها ... متستغربش اوي كدا و تبصلها اوي و تقولها يا سلام يا سلام دا انتي مبتعمليش كدا معايا !!! لانك هاتلاقي رد ميعجبكش خالص: دي عربيتي حبيبتي شايلاني و مريحاني و صايناني من البهدلة و عمرها ما قصرت معايا ولا قالتلي مش فاضيالك ولا سابتني اتبهدل في مواصلات ولا .... ولا ..... ولا .....

لما تقولك انا نازلة اعمل شوبينج اوعى تفتكرها رايحة سيتي ستارز ولا مول العرب تجيب شوية هدوم وشنط و اكسسوارات نونو ابسلوتلي .... دي تقصد انها نازلة التوفيقية او شارع دمشق تجيب اكسسوارات اه بس للعربية حضرتك مش ليها

لما تبقوا بتتمشوا مع بعض في اي مول و عينك تقع على فستان تحفة و تقولها هايبقى يجنن عليكي يا حياتي ما تشتريه و تلاقيها بتقولك انت اتجننت مش عارف اني عاوزة اغير فرش العربية و اعمل ديزاين جديد و خياطة دبل وجلد و شغلانة و انت عارف جينز كار هايخلص عالميزانية يبقى اكيد العربية اولى .... خليك كوووول ولا اي اندهاشة

لما تبقى داخل في تلات اربع جمعيات عشان تخلص اقساط عش الزوجية اللي انت اتدبست فيه يا غلبان عشان يجمعك بفتاة احلامك و مفلس ياعيني و حالتك حاااالة وتلاقيها بتقولك ما تجيب كام الف كدا سلف عشان عاوزة اعدل العربية و اسقط مكنة .... او عى تتنرفز دي الحب الحب و الشوق الشوق بردك :)

لما تبقى زهقان ومخنوق من الشغل و سنينوا و مديرك مطلع عينك وعين اللي جابوك و ماصدقت تاخد اجازة و عاوز تغير جو مع المدام بقى و تروق شوية و تلاقيها بتقولك مينفعش نسافر طبعا انت نسيت ايفنت الدريفت اللي في الويك اند ولا ايييييييييييه ؟؟

و لو سمعتها بتتكلم في التليفون و بتقول ( اووووف الواد دا جاااامد جدا يخربيته يعني انا مشفتش احلى ولا اجمد من كدا بصراحة ) اوعى تفتكرها بتتكلم على عيل احمر في اصفر من الافلام الاجنبي ولا المسلسلات التركي ابداااااااااااااااااااا دي تقصد اللي الحريف اللي كسب الاوتو كروس و كسر الرقم القياسي ابن اللذينة

لو حصل ولقيتها داخلة عليك البيت قالبة وشها و عفاريت الدنيا بتتنطط قدامها اوعى تفتكر ان حد عاكسها مثلا ولا سمعها كلمة مش عاجباها في الحالة دي الرد سهل و بسيط ومعروف باللي في رجلها علطول لكن للاسف هايكون السبب ان موتوسيكل ولا توكتوك ابن تيييييييييييييييييييييت حكلها العربية و جري

اما العيال بقى لما يجوا ان شاء الله هاتلاقيهم دخلوا مدرسة السواقة علطول بدل المدرسة العادية و الفسحة هي هي مش هايتعبوك خالص هاتبقى دايما الملاهي لعبة العربية و السباق :)

بالنسبة للناحية الثقافية للاولاد مش عاوزاك تقلق خالص لانك هاتلاقي البيت مليان كتب و مجلات بس مش ميكي و بطوط والحاجات الفكسانة دي لالالالالالالالا هاتلاقي مجلة عربيات و كتاب كيف تحافظ على موتور سيارتك و مبادىء الميكانيكا و.... و.....و......

لو لقيتها قاعدة في البيت حزينة ودمعتها على خدها اوعى تفتكر انها هاتقولك ماما وحشتني و عاوزة اروحلها وحركات البنات دي لأ خااااالص على فكرة هي بس مفتقدة عربيتها عشان في الصيانة بقالها اسبوع :( ولسة كمان اسبوع :"""(

تفكر حضرتك بقى يوم تكون عربيتك عطلانة ولا في الصيانة ولا فيها اللي فيها انك تقولها هاخد عربيتك طالع الساحل ولا السخنة يومين مع صحابي يعني العربية هاتبات بعيد عنها ................................ تبقى لعبت في عداد عمرك و نقرا عليك الفاتحة مقدما ... كان راجل طيب والله اجدعان

موضوع النيو لوك بقى و تروح للكوافير و تعملك قصة جديدة ولا لون جديد ايشي احمر ماهوجني ولا اسود كستنائي ولا اشقر دهبي انســــــــــــــــــــــ ـــــــــــــــــــــــــ ـــــــــــــى الكلام دا نوهاااااااائي هي هاتلاقي وقت بعد الميكانيكي و السمكري و العفشجي و ظبط الزوايا وترصيص العجل و الغسيل و الشمع و التلميع !!!! اما انت امرك عجيب والله

اظن عيشة ولا احلى من كدا ولا ايه

يبقى ليها اهتمامات بكل حاجه تبع العربيات و تعشقها زيى اه تتفرج على فورميلا ون او موتو جى بى عز الطلب تعرف اهميه سير الكتينه قبل طبخه جديده هو ده المطلوب لكن عربيه ايه الى هتظبطها هو انا اصلا هخليها تسوق هتودينا فى داهيه و فلوس الناس هتضيع وبعدين تقولى سورى مشفتش المطب