الموضوع: تغيير طلمبة مياه الفليشيا

المشاركة الأصلية كتبت بواسطة awaad8760

لسه مغيرها من شهر بس حصل حتة موقف اغرب من الوضع السياسي الحالى..

بعد ما شخصت ان الطرمبه القديمه بايزه عشان بتسرب ميه وفيها خشونه شديده وحتى قاعدة الموتور بتاعتها مهريه رحت اشتريت واحده تركى ب 180ج وجبت بالمره قاعدتين الموتور التانيين وسيور جديده وقلت للباشا الميكانيكى غير الحاجات دى وانا ورايا شغل وحاجيلك كمان اربع ساعات.


رحت استلمت العربيه لقيت العربيه دايره وفعلا الصوت هدى خالص بس لقيت الحراره مرتفعه شويه وبفتح غطا القربه ملقتش مياه رجعه من الخرطوم العلوى للقربه ولا حتى مع تزويد بنزين للموتور بحط ايدى على الردياتير لقيته دافى بس......رحت للاستاذ الدكتور قعد يلعب وشويه قالى الماسوره اللى تحت فيها خرم وعايزه تتغير قلتله ماشى عيش بس خلصنى وقلبى وعقلى طبعا بيقولولى فيه نصيبه وهو مش عارف يوصل لسببها.


للاسف برضه رحت شغل وسبتهاله رجعت لقيت نفس الوضع بعد تغيير الطرمبه .. فقولتله ايه الحل يا باشا قعد يحور ويقول حتتزبط بس اصبر عليها اصل الميه اصل الاملاح اصل الجو حر اصل الفيليشيا دى غبيه اصل وش السلندر.....وهكذا لحد ما زهقنى.


مشيت من عنده من عنده وعملت مشوارين جوه البلد والحراره عاليه سنه بس ماشيه وخلاص ..المهم اضطريت اسافر بيها ....وعينك ما تشوف الا النور بعد 10 كيلو لقيتها بتغلى وبتسقف وعداد الحراره على 95,,سبتها تهدى حبه وبعدين عوضت الميه اللى طلعت من غطا القربه اثناء الغليان وقلت الف وارجع تانى,,,برضه نفس المشكله ونفس الحل لما سايستها ورجعت بالسلامه الحمد لله وكلمت البرنس قاللى هاتهالى بكره.


تانى يوم قلت للفيليشيا يانا يانتى ,, وفتحت الكبوت وفكيت كوعة المياه ودورت الموتور عشن اشوف الطرمبه بنت الكلب دى بتنيل ايه...لقيت ان والموتور على السلانسيه فى مياه طالعه من الموتور بس لما ازود بنزين الميه تقل مش تزي بقيت حتجنن..المهم قفلت الكوعه وظبطت الميه ورحت اشتريت طرمبه صينى ب150 ج من دماغى ورحت للباشا ملقيتوش لسه صحى فناديت للصبى وقولتله تعالى فك الطرمبه القديمه وركب دى عشان دى احسن..قعد يقاوح ويحاول يكلم الاسطى بس معرفش ..المهم سمع الكلام وفك الطرمبه الللى راكبه..وكانت الصدمه !!!!!!!!!!!!!!!!!!!!!!!!!


لقيت ريشة الطرمبه متثبته مكانها بسيليكون وفيها حته صغيره قوى مكسوره...طلعت الجديده من كرتونتها زهلت من المفاجاة ريش الطرمبه اللى كانت راكبه مقلوبه..يا نهار احمر يعنى الطرمبه شغاله شفط مش طرد!!!!!!!!!!!!!!!!!!!!!!!!!!!!!!!!!!!!!!

وبعد تحريات طلع ان وهما بيركبوا الطرمبه كانوا رافعين الموتور على حتة خشبه واتزحزحت فراح الموتور واقع و خلع الريشه من الاكس بتاعها فمرضيوش يقولولى ولزقوها بسيليكون بس من هبلهم قلبوها..

المهم ركبت الصينى الجديدة والدنيا ظبطت تمام واحنا بنقفل البرنس جه وقعد يبص ويحفلط ولسه ما يعرفش ان الواد غير الطرمبه..(ما العربيه تمام اهيه يا دوكتور) قولتله مظبوط يا سعات البيه وقفلت الكبوت ومشيت.

يومين ضاعوا +بهدله على الطريق وكل ده ومرضيش يقوللى على اللى حصل..حاجه فوق الوصف

د/احمد عواد

هههههههههههه كل يوم يثبت ليا ان فعلا مصر ولادة بالباشوات الميكانيكيا ربنا يهدى الحال....*

غلى فكرة انتا ممكن تغير طلومبة المية بنفسك فى البيت هما يادوبك 3 مسامير 13 وتركب التانية مكانها....* يعنى الموضوع مش ذرة ولاتكنلوجيا//جاتهم نيلا معدومى الضمير....*

على فكرة موضوع السيلكون دا شائع ومنتشر حتلاى فى جوان وش السلندر بليطوه بالسيلكون لدرجة انهم من غبائهم بيقفلو ممرات المية والزيت اللى فى الوش وعلشان كدا الغربية بتولع على طول ودا سبب العفريت اللى متعارف عليه جوان وش السلندر والفليشيا بتسخن عندنا اخرهم يشحمو كارونة عربية كارو او حنطور ان وجد....

وياريت تتعلم من الحصل اتك تلذق للباشا وهو بيعمل اى شغل فى عربيتك اهو تراقب المواقف وتكتسب خبرات.... على الأقل تعرف طريقة الفك والتركيب....