نيسان صني الشكل الجديد سمعتها بقت في الارض

**omar shaker** · 19-10-2013 04:32 PM

بسم الله الرحمن الرحيم

الحمد لله على كل حال انا معايا نيسان صني الشكل الجديد
عامل صيانات من 1000 ل 10000 كيلو في التوكيل
غيرت صاجه التيل في الضمان
راشش الاكصدامين في الضمان لوجود عيب في الدهان
بشتكي من وجود صوت في الفرامل
ومهندس التوكيل قالي انه هيتغير كمان 3 الاف كيلو على حسابي مش عارف اعمل ايه في النقطه دي؟

قولت انزل السوق عندنا اسأل عن قطع غيارها

1- دخلت اسأل عن تيل فرامل نيسان صني الشكل الجديد ههههههه اتلقيت وش الاراجل اتغير كاني قولتله
حاجه لله وصعبت على الراجل قالي انته ايه اللي خلاك تجيبها هههههه قعدت اضحك قولتله التيل بتاعها موجود قالي موجود بكام 550 جنيه الاصلي اللي موجود في التوكيل يعني لو سواء جبته من عنده او من التوكيل كمان هيبقى هوه هواه قالي بيعها واشتري دماغك بيقولي واحد صاحبه كان معاه لانسر واشتراها وباعها ب 98 الف عامله 30 الف كيلو ورجع اشترى لانسر تاني قولتله كفايه كده ياعم الحج سلام عليكم
2-محل تاني اساله عن القطع الغيار متوفرة ولا لأ قالي لسه حاجتها منزلتش وحاسس ان جوه قلبه يارب متنزل

سؤال ليه كده يعني نيسان اليبانيه عارفه المهزله اللي موجوده في عربيتها عندنا في مصر

وكمان فيه مصيبه تانيه بدأت اسمع صوته وننه كده لما اقفل كل الازاز وسألت احد الناس الكبار وبيفهمو في العربيات قالي ان دي البليه فعاوز حد يفهمني اتاكد ازاي؟

بس والله والله العربيه حلوة جدا وانا حببها ومريحاني بس كل اما افرمل اكرههه واكره صاحبي اللي شار عليا اجيبها
بس برجع اقول قدر الله ماشاء فعل واطمن نفسي واقول اكيد نيسان هيحلو المشكله دي وهتبقى من احلى العربيات اللي في السوق

وشكرا

**yaya_tearoy** · 19-10-2013 05:31 PM

الواحد مش عارف يقول ايه .. بس الله يكون فى عونك يمكن علشان الواحد لسه مشفش اى حاجه وحشه منها الحمد لله لحد دلوقتى

بس انا ان شاء الله رايح غدا اعمل صيانه 1000 لسه وربنا يستر معانا جميعا

كان ليه استفسار بسيط بخصوص رش الاكصدام ( يعنى ايه كان فيه عيب دهان )

وهل عند حضرتك علم بسمكره ودهان التوكيل علشان عندى حكه ف الباب الخلفى وعايز اردها على البارد ؟

**د.عماد صلاح** · 19-10-2013 05:53 PM

عايز اسال حضرتك سؤال ...وقبل ما اساله انا مش معايا العربيه عشان ماتقولش بدافع عنها....ازاي عربيه سيئه تنتشر الانتشار الهستيري ده

**J A G U A R** · 19-10-2013 07:13 PM

العربيه دى اكيد مقلب والله اعلم

**edodahab** · 19-10-2013 07:20 PM

العربية لا مقلب ولا حاجة
هى فى فعلا مشكلة فى التيل و اعتقد انهم حلوها و حتى او متحلتش و رسيت على كدة دة عيب بسيط قصاد مميزات تانية كتير و مفيش عربية كاملة و ادخل على باقى المنتديات و انت تلاقى العجب
اما بالنسبة للمبيعات حضرتك انزل و شوف العربية مكسرة الدنيا و المبيعات لا تتوقف و عليها طلب و حجوزات لشهور
انا لسة جايب العربية و فعلا بتتخطف من اى معرض

**raedegypt** · 19-10-2013 08:16 PM

ياعمى ايه تتوقع من عربيات هندى بتتجمع فى مصر ولا شكل ولا منظر وحجمها صغير .. تصميمها غير موفق ... الاميجراند الصينى الاروبى شكلها افخم واشيك منها

**abou-yahia** · 19-10-2013 08:25 PM

العربيه باعت علي حس فعلا الشكل القديم والتقييمات الغير الموضوعيه ليهم هما الاتنين
سواء عن عمد او قله خبره من اللي كانوا بيقيموا
ده رائي والله من غير تعصب
بصراحه العربيه ديه من وجهه نظري متسواش اكتر من 70 الي 80 الف
ولو كانت بالسعر ده كانت برضك حتكون قيمه مقابل سعر مش كويسه .

**saddam** · 19-10-2013 08:48 PM

صديقي المواطن
العربية معقولة وجيدة وليست سيئة وأكثر حليف لها في مصر هو الغلاء الخزعبلي للعربيات ريو وإلانترا وسيراتو وكوروللا وكل اﻷعطال دي حاجات بسيطة لا تعدو أن تكون توافه وباﻹمكان إصلاحها بأبسط البساطة أما عن الشكل فدي أذواق ودي سنة الحياة والتغيير والتجديد مطلوب وفقوا بقه في التصميم أو لم يوفقوا ده موضوع نسبي ولكن المهم يبادر ويتجرأ لتطوير الشكل ويتغير ومهما كانت نيسان القديمة محترمة ولكن لو فضلت تستمر سنة ولا سنتين كمان مش حتبيع عربيات بمستوى عربيات اﻷشكال الجديدة وحتخسر فئات كثيرة من الشراة وأولهم الشباب
وبالتوفيق وإلى اﻷمام ومن نصر إلى نصر
ودمتم للنضال