الموضوع: ..:: يوم الجمعة والمفاجات مع الكورولا 2014 ::..

بسم الله الرحمن الرحيم

كل عام وانتم بخير
ويارب سنة سعيدة على الجميع
والف مبروك لكل الى استلم والى لسة هيستلم مبروك مقدما
الوحش اليابانى

(( الكورولا 2014 ))



زى ما انا موعدكم معايا مع مفاجات يوم الجمعة مع كرولتى الجميلة

ودايما تسيبنى اعصابى بس يلة خير الحمد لله على اى حال


نبدا حكايتنا اليوم


النهاردة الجمعة ودى العطلة الى عندى فبقضية مع كرولتى الجميلة
اليوم يبدا بغسله جميلة وترويقة عليها ولكن الجمعة دى تختلف عن سابقتها
وقررت انى انا الى اغسلها واظبطها وكمان بينى وبينكم علشان انا كنت عامل لكرولتى مفاجاه
واصبح وامسى عليها بردة انا طول الاسبوع مشغول عنها فلازم يجى اليوم الى اخد بالى منها
(( ويارتنى ما خدت بالى ههههه ))


بدات فى غسيل السياره والتلميع وبدات تبرق كدة وانا بخاف منها لما بتبقى بتلمع

وبدات اطلعلها المفاجاه بتاعتها وهى اكسسوار كنت دايما بجيبه لكرورلتى السابقة 2009
ودة عبارة عن علامه شارك او طياره زى ما بيقولوا عليه فى محل الاكسسوار بيركب على سقف السيارة
بيدى شكل جميل للعربية ودى بينزل مع عربيات البى ام وبيرسم العربية
المهم انا جيبته وبيجى طبع فيلر اسود عادى بدون لون فباخدة لواحد بتاع بوهية ويرشه لون العربية
بس السنة دى ملقتش الى انا عايزة فى الحجم فدوخت لما جيبته وتم رشة وبدات تركيبه

المهم انا عارف انها حاجة هايفة بس على قد انها بسيطة بس حاجة بتفرحنى انا شخصيا لما اشوف السياره
بيها وانا من ببقى حالتى المزاجية حلو اوى لما بشوف العربية كويسة .. واذا باحد الزملاء معدى بسيارته وهى كورولا 2014 وكان مستلم تقريبا معاى وقف وقالى اية دة االعربية شكلها حلو اوى بالعلامة دى وطبعا
انا عارف ان صاحبنا العزيز عينة ماشاء الله تفلق الحجر لانه سره باتع معايا فى ذكريات كتير قبل كدة مع
سيارات تانية فرديت عليه قول ماشاء الله وانا ياعم هدية منى اجيبلك واحد وارشه رمادى لون العربية بتاعتك واركبهولك كمان بس قول ماشاء الله
قالى ياعم متقلقش اوى كدة انا بقول علامة الشارك دى مع الاريال الى فى جنبك راسمين العربية
فقولت فى عقل بالى دة انت داخل على طمع بقى شارك واريل قولته من عنية والمهم خلاص مشى

اجى يا سادة يا كرام على مطب رخم شوية وعارف ان العربية بتحك فية عديت المطب براحة والعربية عدت بسلام وامان الاقى عربية جنبى محملة خشب وفية حتة خشبة بارزة منها تحك الرفرف والاكصدام من ناحية اليمين فى منطقة التقاء الرفرف بالاكصدام ويبان حتة سمراء من لون الاكصدام يعنى البوية وقعت من علية
منظر يخليك تعيط وتقولى بركاتك يا دكتورنا العزيز يا الى عينك متحسدش

انا رفعتلكم صورة للسيارة بعد الغسيل وتركيب الاريل وعلامة الشارك بس قلبى مطوعنيش ارفع ليك صورة تجريح
البوية لان قلبى وجعنى من ساعه الموقف دة وبصراحة انا فى حيرة من امرييين ومحتاج مشورة منكم

* - فى تجريح ممكن يروح بالكمبوند والتلميع ودة فى الصاج بتاع الرفرف

* - وفى جزء سقطت منه البويه من على الاكصدام فى خط التقاء الرفرف بالاكصدام على اليمين



الامريين بقى الى عايز منكم نجمع الاراء والنصيحة "



1 - انا ممكن اعمل كموبند وتليمع على الجروح الى ممكن تروح والجزء الى سقط من البوية من الاكصدام دة ممكن احط علية حتة فسفور لون السيارة بحيث العربية متخدش بوهيه دلوقتى خصوصا انها لسة 400 كيلو بس واسيبها تغزى العين و خلاص


2 - لا اتوكل على الله وقلم بوهيا وترجع العربية زى الاول خصوصا انهم يدوب نقطتين الى سقطت منهم البوهيه تقريا 3سم ف 3سم واحدة والتانية 2*2 سم وخلاص




ودى الصورة قبل العين والحسد ..


وربنا يبعد عنكم يارب عربياتكم من العين والحسد ويبعدكم عن اصحاب العيون الجميلة