الموضوع: لقد فعلها وحش الرينو...أهم موضوع لإظهار أسم المتصل فى بلوتوث الفلوانس فيس ليفت

طبعاً المحترم Sofiman كان أول واحد أشتكى أن بلوتوث الفلوانس بينزل فيه الأسماء اللى فى التليفون تمام و لكن وقت الأتصال أو أستقبال مكالمة بيظهر رقم دون أسم و طبعاً دى حاجة بايخة جداً....و أنا وعدته بالأهتمام و وعد الحر دين عليه.....

لما أستلمت العربية من يومين و وصلت التليفون....ظهرت معايا نفس المشكلة و لكنها كانت غريبة حبتين....و دى ملاحظاتى
-بعض الأسماء بتظهر و بعدها لأ و بتظهر كأرقام مع أنها متخزنة أسماء.....
-الموضوع ملهوش علاقة بطول الأسم لأن ظهرت عندى أسماء طويلة جداً و ملت الشاشة كلها؟؟!!!

رحت التوكيل أنهارده و للأسف لقيتهم فى الموضوع ده بالذات بطة بلدى.....أنظف من الصينى بعد غسيله....

المهم و بما أن العبد لله ليه فى المواضيع دى جامد و بما أن لا يأس مع الحياة و لا حياة مع اليأس و لازم نفهم المشكلة علشان نحلها.....
ضربت كباية الشاى المتينة و قعدت أقلب فى الأرقام اللى أتصلت بى النهارده و اللى بعضها ظهر أسماء و بعضها ظهر أرقام و أشوف أيه ممكن يعمل الconflict ده.....
-فى الأول قلت يمكن فيه كذا رقم متخزن تحت نفس الأسم زى Mobile و Home و ده هيلخبط التليفون و لكن للعجب لقيت متصل ظاهرلى كأسم مع أن متخزن تحتيه رقمين أرضى و موبايل.....

و بعدين خطرت فى بالى فكرة...أمتى التليفون بهيس و بيطلع رقم بدل أسم مع أننا مخزنين الأسم؟
الأجابة: لما نخزن رقم واحد تحت أسمين مختلفين....فى هذه الحالة التليفون بيهيس و بيظهر الرقم دون الأسم....
فقلت نطبق الفكرة دى بس بأسلوب أخر......
فى البداية أنا تليفونى سامسونج S3 و نازل عليه سوفت وير Jelly Bean أخر إصدار
لو كلنا قلبنا فى ال contacts بتوعنا هنلاقى الأتى:
مثلا لو مخزن أسم Ahmed Adham
هتلاقى Ahmed Adham و تحتيه التليفونات
و هتلاقى Ahmed Adham و تحتيه gmail
و هتلاقى Ahmed Adham و تحتيه hotmail
و هتلاقى Ahmed Adham و تحتيه account ال Whatsapp
و هكذا......
و كل دول لنفس الشخص و لكنهم منفصلين...يعنى لو عملت search فى موبايلك عن Ahmed Adham هيظهرلك 4 مرات

كل المطلوب من سعتك أنك تظبط موبايلك الأول: قولى إزاى؟؟ أقولك أنا بأه إزاى....
عن طريق أنك تقف على Ahmed Adham اللى متخزن تحتيه التليفون و تدوس على options و تختار join contacts و تربط الأربعة Ahmed Adham تحت حقل واحد فقط أو contact واحد فقط.....
بحيث لما تعمل search فى موبايلك عن Ahmed Adham يظهرلك مرة واحدة فقط و تحتيه كل شىء

و هكذا بالنسبة لباقى الأسماء......

ثم تنزل يا وحش على الجميلة الفلوانس و تختار Update من قائمة التليفون اللى فى الكاسيت.....و بعدين تعمل أحلى أتصال و يظهرلك أحلى أسم و تدعيلى أحلى دعوة.....

تمت التجربة بنجاح ساحق.....
متنساش أن سعة التخزين لكاسيت الفلوانس هى 500 أسم فقط.....
و الشىء الجميل أنك لو مخزن رقمين تحت نفس الأسم...رقم Mobile و التانى Work مثلا...عند أستقبال المكالمة بيظهرلك أسم المتصل و من أنه رقم Mobile و لا Work
أحبيبتى أفلوانس......

أنتظرونى فى موضوع أخر لتفعيل خاصية ال OK من بكرة الدريكسيون بس بعد لما أرجع من السفر أن شاء الله...متنسوش تدعولى....