احترس من نصابين الكاوتش

**engahmed29** · 19-02-2014 10:30 PM

احترس من محل الكاوتش النصاب الكبير قبل داندى مول مباشرة على اول طريق القاهرة / الاسكندرية الصحراوى قبل البوابة .
مكانه امامك و انت خارج من الجراج
، رحت له بفردة فيها مسمارين عملهم لحام داخلى و كله تمام ، بعد كدة قفل العجلة و نفخها و جاب ازازة مية بصابون و قعد يرش على الكاوتش ، فجاءة ظهر فيها اخرام كتير ، و انا كنت مسافر و محتاجها .
كل خرم حط فيه خابور و يرش تانى يظهر اخرام تانى لحد ما حط 25 خابور ربنا ينتقم منه .
و دفعت مبلغ محترم و مشيت ، بعد كدة اكتشفت ان دى طريقة نصب مشهورة
و بفكر اعمل محضر فى القسم ، بس مش عارف حيكون ليه فايدة ولا لاء

**ashrafwolf** · 19-02-2014 10:48 PM

يا ريت توضح اكتر ازاي بيتم النصب في الموضوع ده

**Ahmed Saad** · 19-02-2014 11:11 PM

معلش ياباشا النصب بيحصل عن طريق انه يخرم فرده الكاوتش ببتاع كده عامل زي المسمار وصاحب العربيه مش واخد باله انا مره حصلت معايا بس خدت بالي من اول خرم ابتدي يعمله بصراحه رحت ماسكه ضاربه علشان كانت فرده جديده وخليته يعملها لحام مكوه علي حسابه وحاسبته بس علي الخرم اللي كان فيها فبتوع الكاوتش دول اكبر نصابين بال\ات بتوع البنزينه والمحلات اللي علي الطريق وابقي ركز معاهم علشان دول نصابين ومتزعلش علي الفلوس اديك بتتعلم وان شاء الله متتكررش تاني

**firstknight_eg** · 19-02-2014 11:30 PM

25 خابور... ده كده الكاوتش ودع...انت لما كان قالك كده كنت ركبت داخلي لغاية ما تغيرها

**engahmed29** · 19-02-2014 11:41 PM

المشاركة الأصلية كتبت بواسطة ashrafwolf

يا ريت توضح اكتر ازاي بيتم النصب في الموضوع ده

النصب بيكون عن طريق نفخ العجلة بضغط هواء شديد ثم الرش بماء و صابون يؤدى الى ظهور فقاقيع هواء من عدة اماكن بالكاوتش غير مؤثرة اصلا تحت ضغط الهواء العادى

ثم يقوم بوضع خوابير مكان كل ظهور للفقاعات ، و الخابور ب 15 جنيه و ادفع يا معلم