الموضوع: إستشاره بخصوص إضاءة الكشافات العالية بالليل

مبدئياً انا متأكد إننا كلنا بنعانى من نفس المشكلة, إيه افضل إضاءة لما بنسوق بالليل عشان نشوف من غير ما نعمى اللى جى فى المقابل و من غير ما نعمى اللى سايق قدامنا, و خصوصاً فى ظل إن تقريباً مافيش فوانيس إنارة شغالة, و الطرق من أسوء ما يمكن فى الحفر.

بالنسبه ليا انا بشغل (النور الواطى مع فوانيس الشبورة وبظبط بكرة الإضاءة على 2) و انا سايق بالليل عشان يدوب أشوف بالليل, و من وقت للتانى فى الملفات و الأماكن الجديده بشغل النور العالى لمدة ثانية واحده عشان أطمئن.

هل اللى انا بعمله ده صح؟ هل نوع الإضاءة (النور الواطى + فوانيس الشبورة) يسبب عمى للمقابل أو للسايق قدامى لما يبص فى المرايات الجانبية و الخلفية؟



من كام ساعة كانت خارج من المدينة اللى ساكن فيها, طريق مكسر و مطبات من غير لافتات, و عمدان النور معظمها مش شغال, فماشى على سرعة 30 لـ 40 لغاية ما أخرج على الطريق العمومى, المهم فى عربية ماشيه ورايه بالظبط و ضربه النور العالى, لكم ان تتخيلوا مدى المعاناة اللى انا كنت فيها وكل النور من المرايات عندى ضارب فى وشى و مش شايف حاجه حتى قدامى, للأسف و لأول مره فقدت أعصابى و دوست فرامل (طبعاً مش مرة واحده عشان الباشا اللى وارايا مايخبطش فى عربيتى).

فتحت إزاز العربية عشان لما يعدى من جنبى أقوله يوطى النور شويه, و فعلاً قولتله, أو بمعنى ادق قولتلها لإنها طلعت واحده اللى سايقه و معاها أولادها, و الغريبة إن بعد ما عدت و بدون أى إهتمام فضلت طول الطريق و بعد ماخرجت على الطريق العمومى سايبة النور العالى, بنوع من الامبالاة تماماً و بصورة خليتنى أكتب عن الموضوع ده هنا.

و هنا سؤالى, لما واحد يبقى سايق ورايا, إزاى الفت نظره إنه يطفى النور العالى؟

بالنسبة للجاى مقابل لما بفلشله بيفهم و يوطى النور, طيب بالنسبه للورايا, أعمل معاه إيه؟

ملاحظات:

أنا سايق بيجو 301 هاى لاين

بكرة مستوى الإضاءة: بتلاقيها جنب زرار تعديل المرايات.

انت بتسوق سواقه محترمه بس هي جاهله بالسواقه المحترمه
الحل زي ما قال عمرو السقا
بس لو فضلت ماشيه بنور عالي افتح نورك العالي و الزق فيها شويه علشان تفكرها باللي هي عملاه
اكشف طريقك بالعالي او اسهل بالفلاش ضغطه طويله لثواني
انا بمشي بنور واطي علي 1 و ساعات 0 لو طريق مفتوح و فوجات .. ده الصح الطريق ليك و لغيرك .. اسمح للي قدامك يشوف علشان لو هو لبس انت معرض تخبط فيه .. يعني بتأذي نفسك قبله
و ربنا يستر طريقنا