الموضوع: 301 من الحجز إلى الإستخدام..تقرير وافي 2

نظراً لمخالفة بعض الأعضاء و ردهم على الموضوع الأول قبل إتمامه
http://www.nilemotors.net/Nile/411464-301.html
أضطريت أعمل موضوع جديد لتقييم إستخدام البيجو 301
طبعا دي المرحلة الأهم و اللي معظم الأعضاء مستنينها لأنها هتأثر في قرار الشراء للي عايز يشتري و هترد على تساؤلات و تخوفات أي واحد مقبل على شراء العربية

بداية عشان تستمتع بالعربية اللي ربنا رزقك بيها مهما كانت
لازم تبقى موضوعي
متطلبش من فئة سعرية أكتر مما تحتمله
و لما تقارنها قارنها بمن في مستواها عشان متظلمهاش

خد بقى الكلام ده و طبقه على ال301 هتلاقيها عربية محترمة جداً جداً في فئتها السعرية و في نظري هي أفضل إختيار و عشان كده إشترتها

هبدأ بحول الله و قوته بالتذكرة بحديث النبي مرة تانية

قال النبي صلى الله عليه و سلم:
إذا رأى أحدكم من نفسه أو أخيه ما يعجبه فليدع له بالبركة، فإن العين حق

ثانياً:
هعرض صور العربية السابقة (بيجو 206)
عشان لما أنقل للناس ميزة أو عيب فال301 مقارنة بال206 الناس تفهم أنا أقصد ايه بالضبط

لو بأيدي كنت إحتفظت بيها
عربية محترمة و تستحق الإقتناء
بص على حالة الصالون بعد أكتر من 12 سنة إستخدام هتعرف ايه المقصود بجودة الخامات و التقفيل












المرحلة الخامسة الإستخدام

العربية أتخبطت قبل الترخيص و دي صورها بعد الخبطة







و ده رابط الموضوع
http://www.nilemotors.net/Nile/411081-301.html

باقي الصور في الموضوع كانت قبل الخبطة

نبدأ بالشكل الخارجي

أعتقد كل الناس شافتها سواء فالتوكيل أو فالمعارض أو حتى فالشارع و تقارير سابقة لبعض الزملاء
لكن ننقل بعض الصور للإفادة

متنسوش تقولوا بسم الله ما شاء الله و تدعوا بالبركة زي ما أتفقنا









المفتاح و الشنطة

المفتاح الأساسي شكله جميل جداً و أفضل من ال206 بكتييييييير
هستعير صورة مفتاح أخينا amrelsaqqa






المفتاح الإحتياطي شكله معقول و مش تخين زي ال206 رغم وجود chip الخاصة بالإيموبيلايزر

اللي يقولك عيب العربية إن المفتاحين مش ريموت
خلي يقولك على عربية في نفس الفئة السعرية و ليها مفتاحين ريموت
و إن وجد هيبقى إستثناء مش قاعدة

اللي أنا شايفه عيب فعلا هو عدم وجود طبلة للمفتاح الإحتياطي غير في باب السواق
يعني لو أنا بتحرك بالمفتاح الإحتياطي و ركنت بحيث باب السواق مزنوق فسور أو شجرة مش هقدر أنزل من الباب التاني و أقفل العربية
فال206 كان في طبلتين واحدة فباب السائق و التانية فباب الراكب الأمامي
طبعا مش كل الناس هتحس بالموضوع ده
لكن بالنسبة لي عشان أنا و زوجتي بنستخدم العربية بنحتاج المفتاحين باستمرار

الشنطة ملهاش طبلة خاصة بيها
لكنها بتفتح من الريموت أو الزرار اللي على شمال الطارة و تقفل مع السنتر



ملاحظة مهمة و هي إن فتحك للشنطة من الريموت بيفتح السنتر كله و بالتالي لازم تقفل العربية تاني من السنتر و لا تكتفي بقفل الشنطة يدوياً
أنا مخدتش بالي أول مرة و طلعت البيت و أنا سايب العربية مفتوحة..لولا ستر المولى عز و جل كنت ناسي حاجة فالعربية و رجعت أجيبها فخدت بالي من الموضوع ده
كمان في زرار إنارة للسنتر فالطابلوه ....لازم ينور أحمر فلاش عشان تعرف إن العربية مقفولة



عدم وجود طبلة واضح فالصورة




هتلاحظ كمان أن المرايات الجانبية بتتضم لفوق (زي السبورتاج و ال508)
حركات يعني
عاطية شكل جميل للعربية و هى مضمومة
لما تيجي تضمها متتعافاش عليها لكن أرفعها لفوق برفق و أنت بتضمها هتلاقيها إتحركت معاك بسهولة

الشنطة واسعة جداً و تكفي أغراض عائلة كبيرة بسهولة و دي من أكبر المميزات اللي شجعتني على شراء العربية
إضافة لإمكانية طي الكنبة الخلفية لزيادة مساحة التخزين

الطابلوه
شيك جداً في فئته عملي و يوجد به إنحنائة بسيطة ناحية الشمال عشان يواجه السائق
الإنحنائة دي موجودة بصورة أكبر فال3008 و الفلوانس

أنوار الطابلوه جيدة لكن في أفضل منها في فئتها (الrb و الريو مثلاً)
دي صور الطابلوه







درج الطابلوه
واسع و غويط و فيه مكان مخصوص للهاند بوك
لا ينقصه غير إضاءة داخلية لأنه فعلا بالليل يصعب الوصول للأغراض بداخله بسهولة



الصالون
خاماته جيدة جداً و يعطيك إحساس بالرحابة
تقدر ترجع بالكراسي الأمامية للآخر زي سواقين التاكسي من غير اللي وراك ميضايق (و هي تتميز عن جميع السيارات في فئتها بالموضوع ده)
3 أفراد يقعدوا ورا مرتاحين جداً لكن للأسف لا يوجد أي مساحة تخزين بالمقاعد الخلفية

الكراسي مريحة و تمكنك من القيادة لفترة طويلة بدون عناء
يوجد أماكن تخزين بالأبواب الأمامية
و يوجد مكان لوضع الموبايل في البيزلاين (مكان شاشة المونوكروم للهايلاين)
عصا الفتيس شكلها جيد و خاماتها جيدة جداً
مكان زراير الزجاج غريبة شوية بالنسبة للبعض لكن بالنسبة لي كانت نفس الأماكن في ال206 و عشان كده أنا متعود عليها
في زراير ورا الهاند بريك لتمكين الراكب في المقصورة الخلفية من فتح الزجاج الخلفي و يمكن إلغاء عمل هذه الأزرار من الطابلوه

ينقص الصالون لمبة خلفية (و دي مهمة في نظري نظراً لإتساع المقصورة)
زر الإنتظار بعيد نسبيا عن السائق



العزل داخل المقصورة
عزل الصوت مرضي جدا و رغم إرتفاع صوت الموتور لكن الجالس بالكابينة ميحسش بكده (نظرا لوجود ربع عزل للموتور من ناحية الكابينة)
عزل التراب مش جيد بصورة كافية و لو ركنت في مكان ملئ بالأتربة هتلاقي الصالون و الطابلوة عليهم تراب بشكل ملحوظ

التكييف
مقدرش أقيم التكييف بصورة كاملة دلوقت عشان الجو لسه مححرش لكن مبدئياً أنا بشغل التكييف و بيبرد بشكل كافي رغم إني مشغل المروحة على أقل سرعة و مقلل التبريد من البكرة

يعيب التكييف عدم وجود فتحات بالمقصورة الخلفية لتوزيع التبريد بشكل أفضل (موجود بالصني)

الكلاكس
عالي و ملفت و في نفس الوقت مش مزعج للموجودين بالكابينة

الأنوار
جيدة و يمكن التحكم في إرتفاع المصابيح الأمامية طبقا للحمولة عن طريق بكرة شمال الطارة (بجانب زر فتح الشنطة)

الكاسيت
أنا مش بشغل غير قرآن أو دروس
بالنسبة لي الكاسيت كويس و السماعات صوتها نقي كفاية
لكن وجود سماعتين فقط بالبيزلاين بيأثر على توزيع الصوت في المقصورة (عشان اللي ورا يسمع كويس الصوت هيعتبر عالي للسائق و الراكب الأمامي)
ال206 كان فيها 4 سماعات بالأبواب و توزيع الصوت كان أفضل
و في نقطة تانية لفت نظري ليها A.elsobky
و هي أن الكاسيت بيقفل مع تبطيل العربية

السحب و التسارع
جيدين جداً و بالنسبة للمانيوال مش شايف فيهم أي مشكلة

الثبات
لم يختبر

الباور
ممتاز و بفضل الله لحقني فمرة لما العربية اللي قدامي قررت فجأة تقطع الشارع و تدخل يمين

الفرامل
ممتازة كعادة بيجو..سمعت منها صفارة خفيفة في الأول و بعد كده راحت

المرايات
مراية الصالون كانت محتاجة تبقى أكبر شوية
المرايات الجانبية جيدة جدا و إن كانت المراية الشمال محتاجة تفتح لبرة اكتر لكشف النقط العمياء (مش عارف دي مشكلة فردية و لا الكل بيحس بكده)

صوت الونة من 70-90
مش موجود عندي بس أنا مزودتش السرعة عن كده

رائحة العادم
كانت كريهة في الأول و ملحوظة جدا في الأماكن المغلقة لكن بدأت تقل تدريجياً

الأبواب
ناعمة نسبياً في الفتح و القفل و إن كانت أقل من ال206
الغريب إن العربية اللي شفتها فالتوكيل قبل الحجز كانت أبوابها غلسة جداً

الصاج
ممتاز و محمل عن تجربة
لأن بعد الخبطة كنت منتظر إنبعاج أكتر من كده في الصاج لكن الحمد لله قدر و لطف

عوامل الأمان
أكتر ما يميز العربيات الأوروبي إنها لا تعتبر عوامل الأمان أبشن
abs-2 air bags-ebd
السنتر بيقفل لما السرعة تعدي 30 كم
تحذير بالطابلوة و عدم إستجابة السنتر في حالة وجود أبواب مفتوحة
إنذار صوتي في حالة نسيان النفتاح بالكونتاك
يوجد قفل ميكانيكي للأبواب الخلفية



العجل
الطاسات شكلها جيد و مقاس الكاوتش و نقشته جيدين و مش بيلموا زلط

العفشة
و دي صدمتي فالعربية
ناشفة و بتحس بالمطب في الكابينة لو مخدتوش بالراحة
ال206 كانت عفشتها أنعم بكتيير
مش عارف هل الموضوع ده هيتحسن مع الوقت و لا لأ

صوت الدبة موجود و بحس بيه من الجانب الأيمن بالخلف
شكيت في الأستبن لكن أخونا m.basha قال على موضوع تثبيت قربة المياه الخاصة بالرشاشات و بالفعل الصوت إختفى من عنده
هجرب و أقولكم إن شاء الله

الموتور
آداءه ممتاز و مرضي جداً حتى الآن
و إحساس مختلف تماما عن ال206 (1100 سي سي)
و ده بسبب السعة اللترية

الأرتفاع عن الأرض
ممتاز و مبتحكش في أي مطب
و حتى مع حركة المساعد الخلوص بيظل جيد و العربية مبتحكش حتى و هي محملة

إستهلاك البنزين
تقريبا 12 لتر لل100 كيلو
و ده كتير نسبيا (لكن السواقة كانت داخل المدينة)
بس إن شاء الله هيتحسن مع الوقت

تانك البنزين
بيتفتح من تحت رجل السائق الشمال (فتح ميكانيكي)
يعني مش هتحتاج تدي المفتاح لعامل البنزينة
و دي ميزة عن ال206



البدالات
كان في واحد من الملاك إشتكى من قرب البنزين من الفرامل
أنا عن نفسي مش حاسس بده
و شايف أبعادهم كويسة



و إن شاء الله الجزء التاني من التقرير هيبقى فيه شرح الحوض و كمبيوتر الرحلات و الكماليات اللي أشترتها

بلاش ردود الله يكرمكم لحد مخلص

تحياتي للجميع