الموضوع: Ups صناعة منزلية وداعا لانقطاع التيار

DrMostafa Khafagi
مجموع التكلفة كام؟ وبتدي كام امبير يعني تشغل تلفزيون و دش و مروحة؟

Dr.Ahmed Abdelghany ايوه تشغلهم التلاتة.. مجموع التكلفة بحساب البطارية 450.. المجموع 1050 ج

Dr.Ahmed Abdelghany ولما الكهربا تيجى اشحن البطارية.. اكيد هتاخد عدد ساعات مش اقل من 3 على الشاحن الصغير ده. لو اعرف اجيب شاحن اكبر -تونجر بجد - هجيب بس الحقيقة مش مهم.

Alaa Nasr Zakey منين الانفرتر و الشاحن و خل مفيش انفرتر بالشاحن بتاعه الاتنين فى جهاز واحد عشان الشحن الذاتى لانى بفكر فى الفكره دى فعلا و عايز انفذها


Dr.Ahmed Abdelghany فيه انفرتر بالشاحن بس اغلى من مجموع تمنهم. انا فضلت اللى كل واحد لوحده لاحتمال بوظان اى جزء فيتصلح لوحده ولو باظ ببوظ لوحجه. التانى اسهل طبعا فى الاستخدام. المكان من بنها. اكيد فى القاهرة عند راديو طلعت بالعتبة وشارع الجمهورية.

Alaa Nasr Zakey ميزه الانفرتر بالشاحن انك ممكن توصل عليه الكهرباء للشحن و تاخد منه على طول للاجهزه الى مينفعش تقف فجأه زى الكمبيوتر مثلا عشان لما الكهرباء تقطع يبقى التحويل اوتوماتيك من الكهرباء العادية للبطارية من غير ما الاجهزة تفصل

Dr.Ahmed Abdelghany
ممتاز جدا لو هيستغل على جهاز واحد لكنها لن تصلح لشقة كاملة. عن نفسى لا احتاج هذه الميزة حاليا على الأقل ، وهى رائعة لمن يحتاجها

Mohamed Abed اشتريت الحجات دى منين من بنها

Dr.Ahmed Abdelghany محل لاشين للالكترونيات اخر شارع سعد زغلول من ناحية وابور التلج. بجوار المخبز.

Mohamed Abed سعد زغلول ده اللى جنب مستوصف عصفور ولا جنب مدرية التربية والتعليم

Dr.Ahmed Abdelghany الشارع اللى فيه تمثال سعد زغلول اسمه سارع سعد زغلول.

DrMostafa Khafagi الكونفيرتر لوحده احسن لانك ممكن تستعمله علي ولاعة العربية وتلائيه في العتبه او راديو شاك بس اغلي

DrMostafa Khafagi محدش آل بتشغل ايه، انا عندي مولد بنزين نص حصان بيشغل التلفزيون و الدش و مروحة و لمبتين موفرة بس مشكلته انه لازم يتحط فبلكونه علشان العادم و كمان بيشتغل بالشد وده متعب اوي انما ممكن يشتغل ٢٤ ساعة مستمره

Mohsen M. Dawood
من 2--3 ساعة

Dr.Ahmed Abdelghany
التعديل قبل الأخير على الجهاز



Dr.Ahmed Abdelghany بالتجربة تمت إضاءة حوالى 10 لمبات نيون ومروحة ومصدر ضوئى هالوجين. يبدو أنه حمل أكتر من اللازم لإن الجهاز كان يطلق صفارة تنبيه واختفت عندما خففت الأحمال.

Dr.Ahmed Abdelghany الأفضل جدا الاعتماد على اللمض الموفرة والابتعاد عن اللمض التى تحتاج ترانس. الإضاءة ثابتة جدا.

Dr.Ahmed Abdelghany ماسبق كان فى العيادة ، فى المنزل أستخدمته لإضاءة 3 حجرات ومروحة والدش والرسيفر والتليفزيون بدون أى مشاكل ولا ألارم لمدة 45 دقيقة وأطفأته.

Alaa Nasr Zakey التعديل ناقصة مراوح للبطارية و يبقى شغل عالى جدا جدا جدا و يتقفل صح
بس ما شاء الله عليك

انت شجعتنى فعلا و خليتنى انزل انهارده اجيب جهاز بس جبته انفرتر بالشاحن من راديو طلعت

Dr.Ahmed Abdelghany يبدو أن خرج الجهاز = 12X60=720 watt ، اختيارى للبطارية ال 60 مش مثالى ، الأفضل البطارية ال 90 أو الأكبر ، لكنى فضلت الحجم ده لإنه المناسب لسيارتى لو احتجتها :)

Dr.Ahmed Abdelghany البطارية مش محتاجة مروحة ، الانفرتر هو الجزء الوحيد اللى حرارته بتعلى ومعاه مروحته لكن أظن لازم يكون متهوى كويس طول الوقت ومش عارف هحتاج أعمل له مروحة إضافية وللا لأ وأظن مش هحتاج.

Alaa Nasr Zakey اعتقد ان البطارية مناسبه للاحمال المنزلية لمده ساعه و نص ساعتين
و لو احتاجت اكتر يبقى تجيب بطارية تانية نفس الحجم عشان ميبقاش الحمل كله على بطارية واحدة

Dr.Ahmed Abdelghany ياريت تقول لنا سعر الجهاز وكام وات وهل فعلا فيه تحويل أتوماتك لو الكهرباء قطعت؟

Alaa Nasr Zakey انا من تجربتى الحاجة الوحيدة الى سخنت هى البطارية
الجهاز جبته بالف جنية و قدرة 1500 وات و للاسف طلع مفيهوش تحويل اوتوماتك و طلع التحويل بياخد 3 ثوانى فكده كده الاجهزه هتفصل بس ممكن اشغل دايرة الشحن و دايره التفريغ مع بعض و هو بياخد من ال 220 العادية لانى جربته من غير البطارية و اشتغل عادى بس كان بيعمل صوت زنه مع البطارية الزنة اختفت

Dr.Ahmed Abdelghany يعنى شغال stabilizer فى وجود التيار ، فى كل الأحوال لازم هتحول التيار بنفسك لو عايز تاخد منه كهرباء لإنارة البيت عن طريق توصيل فيشة منه لأى فيشة فى دايرة البيت أو بأى وسيلة أخرى ، لإن ما ينفعش يكون خرج الانفرتر داخل على الفيش ال 220 وهى فيها الكهرباء العادية وإلا يتحرق.

Alaa Nasr Zakey طالما مش متأسس ليه فى الكهرباء بتاعه الشقة يبقى لازم التحويل يبقى يدوى

بس الى اقصدة انى ممكن اوصل الاجهزة الى انا عايزها ما تفصلش بيه مباشرة و اوصله بالكهرباء العادية و اشغل دايرة الشحن و التفريغ مع توصيل البطارية

و بكده لما الكهرباء تقطع الاجهزه دى تفضل شغاله عادى بدون اى تأثير عليها

Dr.Ahmed Abdelghany لا يمكن الشحن والتفريغ فى نفس الوقت ، فى أثناء وجود الكهرباء العادية يتم الشحن فقط وتشغيل الأجهزة بها أيضا وليس من البطارية

Alaa Nasr Zakey دايرة الشحن بس فيه مبتشغلش المخرج ال 220 لازم اشغل دايرة التفريغ معاها مش عارف ده تصميم الجهاز كده ولا ده عيب فيه

Islam El-batandawy ال 2000 وات بكم وبيشتغل لمده قد ايه
وهل البطاريه بتحتاج تغيير بعد فتره
وقطع الغيار متوفره ؟؟؟
ولو هشتريه منييييين؟؟؟ظ

Dr.Ahmed Abdelghany أخونا علاء ممكن يفيدك عن السعر ، بالنسبة للبطارية زيها زى استخدام السيارة ، أكيد فى وقت هتلاقيها ضربت ودا حتمى ، قطع الغيار عبارة عن دوائر كهربية ، الجهاز المتجمع لو باظ جزء فيه يمكن اصلاحه أو استبداله أسهل وارخص بكتير من الجاهز. المقارنة بالمولد الكهربى فى نفس الفئة السعرية لصالح الجهاز دا طبعا ، كفاية الضوضاء والعادم والحاجة للبنزين فى المولد.


Alaa Nasr Zakey مسألتش عن ال 2000 وات بكام بس كان فى حد فى نايل موتورز عامل موضوع عليه جابه من النخيلى ب 3500 صناعة تايوانى

اعتقد الالفين زى الى انا جبته او زى الى دكتور احمد جابة مش هيكسر ال 1500

البطارية بالفعل زيها زى بطارية العربية و الافضل عموما فى الجزئية دى البطارية ال Deep Cycle بس تمنها عالى بالمقارنة ببطارية السيارة

لو هتشترى من القاهره يبقى باب اللوق و العتبة
انا جبته من راديو طلعت 2000 فى العتبة

Dr.Ahmed Abdelghany انفرتر 2000 وات هيلزم ليه بطارية 160 أمبير!!! وإلا مش هتستفيد من ال 2000 وات بتوعه ، أظن ال 1500 هم أعلى رقم ممكن يكون مفيد لنا.

الوات = الفولت x الأمبير (على عهدة مهندس ميكانيكا باور)

Alaa Nasr Zakey من كلام شخص ثقة و من تجربتى الحالية المعادلة دى مش بتطبق فى الحالة بتاعتنا
انا شغلت المكواه الف وات ساعه الا ربع على الانفرتر يعنى نظريا كانت المفروض بعدها بربع ساعه او نص ساعة بالكتير البطارية تخلص

Dr.Ahmed Abdelghany انا بحاول أوافق بين الخرج افعلى كام وات وقدرة الانفرتر ، يعنى ماجبش انفرتر عالى قوى والخرج مش قريب من الرقم بتاعه أساسا

Alaa Nasr Zakey بس البطارية اشتغلت ساعتين كمان مشغله الكمبيوتر و مروحة كتجربه
اعتقد ان الخرج العالى للانفرتر ده احسن عشان يبقى فى مساحة امان و عدم تحميل على المكونات الداخلية ليه

Dr.Ahmed Abdelghany قول لى الأول البطارية عندك كام امبير؟

Alaa Nasr Zakey 70 امبير بس الفعلى بتاعها 62 امبير - طلعتها من العربية اجرب بيها عشان الحد و الناس قافله

Dr.Ahmed Abdelghany يبقى الخرج عندك 744 وات فى الساعة ، المكوة مكانتش شغالة على آخرها طبعا يعنى موصلتش ال 1000 بتاعها.

Alaa Nasr Zakey و قياس الخرج الفعلى سواء للبطارية او للانفرتر يبقى محتاج افوميتر و ده المرحلة الجاية ان شاء الله عشان ابقى متابع مستوى شحن البطارية دايما

كنت مشغلها على اعلى حاجة فيها و مشغل معاها الكمبيوتر

Dr.Ahmed Abdelghany أيوه بس لا يمكن تكون اشتغلت على 1000 وات لإن اساسا بطاريتك مش هتطلع 1000 ، ثانيا الآفو بيقيس فولت وأمبير مش كده؟ احنا بنتكلم بالوات.. اللى هو مكتوب على الأجهزة كقياس لقدرتها (لو انا غلطان حد يصلح لى)

Alaa Nasr Zakey قدرة البطارية فى الاساس بتبقى بالفولت مش الوات و دى مهمة الافو انى اعرف كام فولت

المعادلة مش البطارية الطرف الاساسى فيها - المهم الانفرتر يقدر يطلع كام وات - ساعة

ممكن يخلص البطارية كلها فى نص ساعه او خمس ساعات على حسب الاستهلاك و السحب منها

يعنى ممكن تشغل الف وات على بطارية 12 فولت 7 امبير بس هتبقى لمده عشر دقايق عشان دة الكباسيتى بتاع البطارية

Dr.Ahmed Abdelghany لا يا فندم البطارية عامل أساسى لانها مصدر التيار اللى الانفرتر فقط هيحول فولته مش أمبيره.

Alaa Nasr Zakey البطارية بتفرق فى طول المدة الى هتقعدها مش فى الانفرتر هيطلع قد ايه

Dr.Ahmed Abdelghany وقدرة البطارية بالأمبير مش الفولت والدليل ان كل بطاريات الملاكى مثلا 12 فولت لكن فيه 55 و 60 و 70 و 90 و 100 و 110 أمبير. ، وأتمنى دخول حد متخصص فى الكهربا لإنى أتكلم فى شئ لم أدرسه ومعلوماتى فيه غير متخصصة.


Alaa Nasr Zakey Tarek Alaa مفيش حد هيفيدنا فى الموضوع ده اكتر من طارق

بس انا عندى البطارية مكتوب عليها 62 امبير لمتوسط 20 ساعة

بطارية العربية بتبقى 13.7 فولت ( لسه طارق قايسها قدامى من يومين )

Dr.Ahmed Abdelghany حضرتك أثرت نقطة هامة جدا عايز أعرف الرد المتخصص عليها: الأمبير يفرق فى إيه؟ مجرد "شحنة" البطارية لوقت أطول وللا يفرق فى "الخرج النهائى أو الوات"؟

Alaa Nasr Zakey انا بحاول ادور عليها فى جوجل بس على حسب معلوماتى انها فى بطارية العربية بتفرق فى الوقت الى هتقعدة

مثلا كنت بشغل عربية لازم ليها على الاقل 70 امبير ببطارية 48 امبير بتاعه عربية اصغر منها و كانت بتشتغل و تدور عادى

http://www.arab-eng.org/vb/showthread.php?t=307170...

اعتقد ان ده شبه اجابة للسؤال بتاعنا

Tarek Alaa انتوا نسيتم حاجة مهمة جدا
البطاريات مكتوب عليها 55 او 70 او 80 الخ ...... امبير /ساعة
يعني بالبلدي تقدر تفرغ منها 55 امبير في ساعة او 27.5 امبير في ساعتين او 13.75 امبير في اربع ساعات

يبقي عامل الوقت مهم جداً
علاء لو حملت 1000 وات في الساعة اﻻولي هتستهلك من البطارية قد ايه نحسبها

هعمل الحسبة وانزلها

1000 وات /ساعة من 220 فولت = 4.55امبير /ساعة

يعني المفروض البطارية ال 55 امبير تشغلهم 11 ساعة تقريباً

Mahmoud El-Barbary Abu Habiba
بس البطارية 55 امبير عندي فضيت في وقت اقل من كده لما نسيت نور الشبورة منور وده بيسحب 200 وات

Tarek Alaa 200 وات من 12 فولت يعني
200/12=16.66 امبير في الساعة
يعني لوبطاريتك سليمة100%
ومفيش احمال تانيه تفضي في 3.8 ساعة

Dr.Ahmed Abdelghany يعنى حمل ال 1000 يخلص فى 11 ساعة وحمل ال 200 يخلص فى 3.8 ساعة... سيادتك واخد بالك من نتائج حساباتك؟
لما الحمل يزيد الوقت يزيد! :)

Tarek Alaa انتا مش واخد بالك من الفولت ركز لان المعادلة مرتبطه بين القدرة والفولت والتيار والوقت اربع اطراف للمعادلة ركز انتا مع الحسبة لان حساباتي صحيحة وتكاد بالنسبة لي ان تكون بديهية لانها من مبادئ الكهرباء

Osama Mansour Hamza 1000 وات = 10 امبير = ساعه البطاريه 70 امبير تشغلك 7 ساعات بس ننقول التشغيل الفعلي حوالي 4 ساعات مع حساب ان بدايه تشغيل اي جهاز بيحتاج كهربا اكتر { استارت الجهاز } زي الطياره في بدايه طيارنها بتحتاج طاقه اكبر لكن عندما تستقر في الهواء لاتحتاج نفس نسبه الوقود المستخدمه في بدايه الطياران نفس الفكره تطبق علي التكيف التلاجه ماتور المياه فلاحظ عند تشغيلهم ان النور بيبقي فيه هزه

Dr.Ahmed Abdelghany انا مركز جدا ونتائج حساباتك غير منطقية يا استاذ طارق.
مدام لبنى انصحك انك تجببى اغلى نوع انفرتر .. بيقولوا فيه انواع بتطلع التيار pure .. انا مقدرش افرق بينهم لكن البيور ده هو اللى يشغل المراوح بأمان اكتر من العادى اللى جبته.
باقى المكونات ممكن تكون هى هى مع اى حجم بطارية.
اخيرا حسبة استاذ اسامة برضه مظنش انها سليمة. انا راجعت مواضيع على النت ومعادلة الوات والامبير محتاجة مراجعة وشكرا.

Tarek Alaa 1 وات = واحد فولت * واحد امبير مع ثبات الوقت اي في واحد دقيقة او واحد ساعة
احسب انتا وقلي ايه الي غلط في حسبتي

Dr.Ahmed Abdelghany فسر لى ازاى حمل ال 1000 وات يستمر وقت اطول من حمل ال 200. بس كده..

Tarek Alaa علشان ال 1000 وات من ال 220 فولت
و ال 200 وات من 12 فولت

Dr.Ahmed Abdelghany تمام ...
بس لو حسبت بنفس طريقتك يبقى ال 200 وات حمل تخلص مع البطارية ال 55 امبير فى 61 ساعة. صح؟
على ال 220 فولت طبعا

Tarek Alaa طبعاً مع اهمال الفقد في الموصلات ومع افتراض ان البطارية مشحونة 100% وحالة البطارية ممتازة اقولك نظرياً وطبقاً للقوانين اه تعيش حوالي 55 ساعة تقريباً لان 200 وات / 220 فولت = حوالي 1 امبير في الساعة

Dr.Ahmed Abdelghany البطارية ال 55 خرجها 660 وات فى الساعة. ودا حمل 200 وات. ببساطة هتاخد 3 ساعات وتلت.
55 ساعة لا ينفع نظرى ولا عملى يا فندم.

ال 1000 وات تخلص البطارية تماما فى 40 دقيقة.

Tarek Alaa ياباشا المثل الي انتا ضربته بطارية 55 امبير / ساعة تخرج 660 وات ساعة علي 12 فولت

Dr.Ahmed Abdelghany اى خرج للبطارية هيتحول ل 220 بالانفرتر...حساباتنا تكون على ما سيستقبله الانفرتر من البطارية وكل وظيغته انه يحول فولته ل 220.

Tarek Alaa باشا لازم نقيس حمل الانفرتر علي ال بطارية كام امبير مع حمل علي الانفرتر 1000 وات ودا هقيسه لسيادتك عملي اليوم بالاجهزة وهرفع لسيادتك فيديو كامل عنه ان شاء الله ربنا ييسر الحال

Dr.Ahmed Abdelghany ان شاء الله. تعقيب اخير. لو حسبت على ال 220 فولت زى ما حضرتك عايز ستكتشف ان البطارية ال 55 امبير بقت بقدرة 12000 وات. اثنا عشر الف وات. :)

Tarek Alaa البطارية عمرها مهتخرج 220 فولت مباشر بدون الانفرتر

Mahmoud El-Barbary Abu Habiba فى انتظار النتائج ...
والنتيجة على فكرة إثنا عشر ألفا ومائة وات :)

Tarek Alaa تم اخذالقياسات الفعلية وساوافيكم بها

Dr.Ahmed Abdelghany اليوم اشتريت انفرتر 3000 وات pure sine wave سعره متفاوت - من شارع نجيب الريحانى بالقاهرة ، واشتريت تونجر 30 أمبير ب 290 ج من شارع الجمهورية ، كل الأماكن دى قريبة من العتبة لإنى بدأت براديو طلعت الفرعين ولم أجد عنده شئ مفيد . المهم الانفرتر ال 3000 طبعا أقوى جدا من ال 1000 حتى انى شغلت عليه شفاط العيادة وإضاءة المناظير القوية وجميع إضاءة العيادة ولم يتأثر فى حين كان الانفرتر ال 1000 لا يتحمل ذلك رغم انه تحمل إضاءة البيت بأكمله ومروحة. كمان شغلت عليه المكنسة 1400 وات واشتغلت كويس. طبعا 3000 دا للى هيشغل عليه مواتير زى حالاتى محتاج أشغل عليه شفاط لكن للاستخدام العادى 1000 - 2000 يكفى جدا وزيادة والأفضل انك تقرأ ورقة الانفرتر وتتأكد إن الموجة pure sine wave ، دى يقال انها أفضل من ال modified sine wave فى حال تشغيل المواتير.

وفعلا كلام أخى علاء إن أمبير البطارية كل ما يعلى يعلى وقت تشغيلها فقط صحيح تماما ، تحميل الوات يعتمد على الانفرتر

Alaa Nasr Zakey

هههه انا الكهرباء قطعت عندى انهارده و شغلت الانفرتر و اضاءات البيت كلها بس مقعدتش فتره كبيره قاطعه
مبروك الانفرتر الجديد و التونجر

جيبته بكام لانك مش كاتب التمن بتاعه

Dr.Ahmed Abdelghany متفاوت .. وماركات ، اللى جبته لقيته فى مكان ب 2040 ، ومكان تانى 2140 ، ومكان تالت 1250 ... طبعا جبته من الأخير ويبدو انه سعر قديم لإنه كان آخر قطعة. لقيت كمان فى أماكن تانية ال 2000 ب 1250 ، وبالشاحن 1550.

Alaa Nasr Zakey اسعار كويسه
هو نوعه ايه طيب

Dr.Ahmed Abdelghany الغباوة بقى يا أستاذ علاء إنى لقيت ال 1500 ب 350 ج !!!!! أرخص من ال1000 اللى عندى .. لكن دا كان عند محل واحد بس. ، نوع اللى جبته TBD

Alaa Nasr Zakey مبروك عليك
و جبت ليه بطارية ولا لسه ؟

Dr.Ahmed Abdelghany لأ .. شغلته على التجميعة القديمة .. انا عندى موتور كبير بالبيت وموتور صغير بعيادة المنوفية والطقم ده لعيادة بنها ، لو لقيت مشاكل فى البنزين هجيب بطارية كبيرة المرة دى ويشتغل الطقم التانى.

.محب الغزالى
يعنى الخلاصه يا Dr.Ahmed Abdelghany أنا عايز اعمل وحده للعياده عندى ...اجيب ايه و هتتكلف كام ؟

Dr.Ahmed Abdelghany العيادة فيها شفاط أو لمض 150 وات؟

محب الغزالى عيادة رمد فيها يونت كاملة

Dr.Ahmed Abdelghany لو مكانك هخاف أجيب الانفرتر ال 1000 وهجيب ال 2000 أو ال 3000 بشاحن أو تشترى تونجر 15 أو 20 علشان يشحن البطارية بسرعة + بطارية جافة 90 أمبير على الأقل ، اطلع لفوق كده فى نص التعليقات وشوف التجميعة وهى متثبته على صندوق خشب ومعمول لها سكينة. التكلفة من 2000 الى 3000 ج.

Alaa Nasr Zakey اليونيت بتسحب كام وات تقريبا

Dr.Ahmed Abdelghany تسحب زى ما تسحب ، الحاجات دى غالية جدا ولازم تبقى فى أمان الأمان.

Alaa Nasr Zakey يبقى مش مهم هيجيب كام وات على قد ما يجيب حاجة محترمه و يجيب معاها مثبت تيار ( ستبلايزر )

عشان كده سألته اليونيت بتسحب كام وات

Dr.Ahmed Abdelghany تقصد يوصل الستابيلايزر بعد الانفرتر؟

Alaa Nasr Zakey بالظبط كده عشان يثبت التيار عشان حتى لو الانفرتر لعب و ده وارد جدا يبقى يديله كهرباء مظبوطة 220-240 فولت 50-60 هرتز

من تجربتى للانفرتر مع Tarek Alaa امبارح ان الاجهزه الالكترونية زى التلفزيون مثلا و الكمبيوتر مع الانفرتر بيبقى فيها زنه كده عشان الهرتز الى خارج من الانفرتر مش بيبقى دايما مظبوط فقالى ان الافضل يبقى فى ستبلايزر عشان يثبت التيار و ده المرحلة الجاية بالنسبالى ان شاء الله

Dr.Ahmed Abdelghany رائع جدا ، يبقى كده الانفرتر يدخل على فيشة فى الحيطة واليونت تتوصل على الستابيلايزر على أى فيشة.

الحقيقة عندى مافيش زنة إطلاقا.

Alaa Nasr Zakey جرب توصل التلفزيون لوحدة

لما شغلت احمال الشقة كلها بما فيها اللمبات التنجستين الزنة اختفت لكن لما الاحمال بتبقى قليله بتزن

الكمبيوتر مفيهوش زنة و لا اللمبات

محب الغزالى أنا فعلا عندى مثبت تيار ..و اﻷحمال ف العيادة 2.5كيلو تقريبا كأقصى استخدام


Dr.Ahmed Abdelghany دا حمل كبير على أى بطارية ، النظام ده مش هيسد فترة انقطاع كهرباء طويلة لو على الحمل ده. لازم تقلل الأحمال للأحمال الأساسية فقط.

Alaa Nasr Zakey الاستهلاك ده حله انفرتر 3000 بس 24 فولت و بطارية او اتنين ديب سايكل 24 فولت 100 امبير بس ده هيبقى مكلف خصوصا البطاريات

محب الغزالى المشكلة إن كل الفحص عندى باﻷجهزة شديدة اﻹضاءة
الموتور فقط ممكن اقلل استخدامه أو حتى امنعه

Dr.Ahmed Abdelghany انا حسبتتها تقريبا لو جبت الانفرترال 3000 تشتغل معاك على الحمل الأقصى أقل من نصف ساعة.
دا لو بطارية 90 كمان.

Alaa Nasr Zakey لو عايز تقلل التكلفه شويه يبقى هتجيب انفرتر 3000 عادى بس هتجيب اكتر من بطارية عادية على حسب انت عايزها تقعد قد ايه

محب الغزالى و أنا اعمل ايه دلوقت ؟!!


Dr.Ahmed Abdelghany مش عارف والله يا دكتور ، لو حضرتك مش هتقدر تقلل الأحمال زى أى إضاءات سقف نيون بترانسات 80 أو إضاءة غير موفرة أو يافطة العيادة يبقى تجيب موتور كهرباء 4 كيلو ألمانى ودا سعره 6750 ج.

Alaa Nasr Zakey شوف ايه الحاجات الاساسية الى عندك فى العيادة الا لازم تشتغل بيها و ايه الحاجات الى تقدر تستغنى عنها

تحول جميع اللمبات فى العيادة الى لمبات موفرة او على الاقل يبقى الانارة فى اثناء انقطاع التيار بلمبات موفره ده على الاقل هينزل الاستهلاك لكيلو و نص و ده يشغلك ببطارية 90 حوالى ساعه و نص

Dr.Ahmed Abdelghany فيه فكرة تانية
تعمل وحدة بالبطارية دى توصل عليها اليونت وبس ، ووحدة تانية توصل عليها الإضاءات وغيرها.

محب الغزالى متشكر جدا على اهتمامكم و جزاكم الله خيرا ...هشوف كده و ربنا يسهل

Alaa Nasr Zakey الافضل انه يجيب جهاز واحد كبير صناعة محترمة و بطاريتين او تلاته بس فى الحالة دى لازم يبقى فى تونجر منفصل يشحنهم بسرعة متوسطة لان الشحن السريع بيبوظ البطاريات الجافة

Dr.Ahmed Abdelghany طب اناعايز أسألك عن التونجر .. المؤشر بيبدأ أول ما أحط البطارية فى العالى تقريبا عند ال 10 وشوية شوية بينزل مش بيعلى ! هو كده بيشحنها وللا بيفرغها!

Alaa Nasr Zakey بيشحنها بس بيوريك سحب البطارية عامل ازاى - المفروض عند 0 يبقى كده البطارية مشحونة على الاخر

Dr.Ahmed Abdelghany يعنى ايه سحب البطارية؟

Alaa Nasr Zakey البطارية بتاخد قد ايه من قدرة التونجر عشان تتشحن

Dr.Ahmed Abdelghany من الفوائد العظيمة للجهاز ده ان من ساعة ما جمعته الكهربا مقطعتش لا فى البيت ولا فى العيادة.
أبيعه يعنى وللا اخليه حرز؟

Dr.Ahmed Abdelghany طيب المفروض اشغله وللا اشحنه من غير ما يشتغل؟

Alaa Nasr Zakey الافضل للبطارية ان كل اسبوع تشغله شويه و تشحن البطارية

Dr.Ahmed Abdelghany
الجهاز حاليا على فكره شكله مختلف عن الصورتين ، إضافة السكينة إضافة مهمة وعملية وكمان ركبت الأسلاك على البطارية على قواطيش.

دى آخر صورة ليه



Alaa Nasr Zakey بس نصيحة كبر الاسلاك الى خارجة من البطارية و رايحة للانفرتر

على الحسابات الى عمتها مع Tarek Alaa فالانفرتر بيسحب من البطارية حوالى 120 امبير ساعه عشان يشغل 1200 وات مع حساب الفاقد و طارق جاب جهاز عشان يقيس هتسحب كام بالظبط

فالافضل ان الكابل بتاع الانفرتر يبقى واصل مباشره على البطارية او تقص منه حته و تخرجها من المفتاح للبطارية

Dr.Ahmed Abdelghany السلك 16 مم :)

Alaa Nasr Zakey السلك الى من المفتاح و داخل على البطارية ده من شكله ميكملش 6 او 8 مللى

Dr.Ahmed Abdelghany بين السكينة والبطارية 16 مم ، باقى الأسلاك أظن 8و 6 مم ، السكينة 32 أمبير ، ولا سلك بيدفا حتى الحمد لله.

وان شاء الله هخليهم هم كمان 16

Alaa Nasr Zakey يبقى انت محملتش بمقدار كبير على الانفرتر

المكوه كانت بتخلى قطاش البطارية يسخن بس السلك لا

و السلك 14 مللى الى عندى

Dr.Ahmed Abdelghany بس الكهربا تقطع ونشوف أ انا شغلت كل حاجة عندى فى نفس الوقت ما عدا الميكروسكوب ، لو جربت هقول لكم طبعا .

Alaa Nasr Zakey ده الفرق بين السلك 6 مللى و ال 14 مللى



Dr.Ahmed Abdelghany سلك الشاحن بس اللى هسيبه 6 ، الباقى هخليه 16 ان شاء الله.

Alaa Nasr Zakey ان شاء الله
سلك الشاحن مش محتاج اكتر من كده لان الشاحن 10 امبير يعنى سلك 2 مللى هيبقى كفاية عليه جدا بس ده امان مش اكتر

الباقى فعلا خليه من نفس السلك الى جاى مع الانفرتر
ممكن تقص من السلك الى جاى معاه حته قد من المفتاح للبطارية عشان يبقى من نفس النوعية

تقريبا عاملينه كده عشان تقدر تحرك الانفرتر و يبقى بعيد عن البطارية

Tarek Alaa يفضل وضع الانفرتر بعيد عن البطارية
السكينة ال32 امبير مش كافية في حالة السحب
يفضل وضع فيوز 80 امبير بين قطاش البطارية الموجب والسلك

Dr.Ahmed Abdelghany لسه مصمم على الحسابات اللى قلتها قبل ما تعمل القياسات؟ على قياساتك البطارية مش هتكمل ساعة واحدة على خرج 1200 وات.

DrMostafa Khafagi
اشتري الحاجات دي منين و بكام، البطارية سهله ، انما التونجر و الانفرتور منين احسن سعر
هل ممكن حد يرسم الدائره و يوضح تخانة كل سلك و اين يوضع الفيوز

Dr.Ahmed Abdelghany اما السكينة ال 32 فمش كافية لو هتوصل ايه بالضبط؟ النحاس اللى فيها سمكه هو هو نحاس سكينة ال 64 لكن اقصر فقط.

DrMostafa Khafagi خلوا الفيشه اللي طالعة من الانفرتور ( نتايه ) علشان متكهربش

Dr.Ahmed Abdelghany د. مصطفى.. الحاجات جاية باسلاكها. افضل اسعار فى شارع نجيب الريحانى والجمهورية بالقاهرة. الدايرة فى الصورة اليكينة ليها مدخلين زوجى ومخرج زوجى. المخرج رايح للبطارية والمخلين واحد جاى من الشاحن والتانى رايح للانفرتر. يعنى لما تجيب السكينة يمين تشحن تجيبها شمال تفرغ. وانا محطتش فيوز.

الانفرتر فيه فيشة نتاية اصلا هى اللى بناخد منها الكهربا.

DrMostafa Khafagi والاسعار يا د احمد، و تنصح بانفرتور كام امبير

Dr.Ahmed Abdelghany الاسعار متفاوتة والانفرتر بالوات على حسب الاحمال المتوقعة.

DrMostafa Khafagi يعني لو ثلاث لمبات موفره و ال سي دي و ريسيفر و مروحة
والاسعار متفاوته علي اساس الفصال ام حسب الماركه

Dr.Ahmed Abdelghany انفرتر 3000 وات جبار بس غالى. بحوالى 2000 ج. التونجر ال 30 امبير اشتريته ب 290ج. الانفرتر ال 2000 وات بحوالى 900 فى بنها وب 1250 فى القاهرة.

الاحمال دى تشتغل على 1000 او 1500 وات. الاسعار على حسب البائع والفصال محدود.

DrMostafa Khafagi شغلت عليه ايه؟

Alaa Nasr Zakey الجهاز عندى شغلت عليه المكواة 1000 وات مع البى سى حوالى 300 تقريبا او اكتر

DrMostafa Khafagi كيف ثبت الاجهزه في البطارية

الانفرتور كام يا علاء



Muhammad El-Sawy البطارية كام امبير ؟؟؟

Alaa Nasr Zakey 1500 وات


Dr.Ahmed Abdelghany اشتريت حالا بطارية 90 امبير ب 650ج.
شفت فى المحل بطارية جافة 150 و 200 امبير. خرافية بس غالية. ال 150 ب 1200 والتانية ب 1400.

Alaa Nasr Zakey انا رأيى فى حاله البطاريات الكبيرة دى يبقى تجيب بتمنها اكتر من بطارية 70 امبير عشان يبقى عمرهم اطول شويه ( متحطش البيض كله فى سله واحدة

Muhammad El-Sawy طب يا دكتور احمد ال 90 امبير تشتغل اد ايه

Dr.Ahmed Abdelghany ال 90 تشتغل فى كل الاحوال اكتر ب 50% عن ال 60. والوقت بالضبط على حسب الحمل عليها.

Alaa Nasr Zakey مشكلة البطاريات العادية انها لو الشحن فيها نقص عن 80 % عمرها بيقل جامد فلازم تعرف اقصى وقت و تشغلها ربعه او نصه بالكتير عشان البطارية ما تبوظش بسرعة

Dr.Ahmed Abdelghany بسأل الراجل صاحب المحل عن البطاريا ال deep cycle
تقريبا افتكرنى بسأل عن حاجات ممنوعة او غلطان فى العنوان.

Dr.Ahmed Abdelghany عثرت على محل بشارع نجيب الريحانى يبيع انفرتر ال 3 ك ب 1250 وال 2 ك ب 750 وال 1500ك ب 375 ، كله بدون شاحن لكنه على pure sine wave.

بشرى: الانفرتر ال 3ك شغل موتور الميه (واحد حصان) ، ال 2ك لم يستطع.

Muhammad El-Sawy طب اسم المحل وعنوانة يا دكتور

Dr.Ahmed Abdelghany المحبة ، صاحبه اسمه هانى ومعاه جرجس :)
فى بداية ش نجيب الريحانى من ناحية تقاطعه مع ش الجمهورية.رقم المحل 41. ت 01006013926
نفس الجهاز فى باقى المحلات ب 2040، وفيه نفس الماركة و 3000 برضه بس modified sine wave ، علشان كده لازم تاخد بالك من الشكل الفضى والخصائص فى الكتالوج

Muhammad El-Sawy هو زي اللي في الصورة

Dr.Ahmed Abdelghany ايوه بس 2 فيشة وأكبر واسمه TBE

مجهود يستحق كل الشكر من أخى الحبيب كريم بيدل على حرصه الواضح على إفادة الكل خاصة أعضاء المنتدى.