الموضوع: طوارئ ( عجلتين ناموا مرة واحدة)

طبعا أسخف موقف ممكن يقابل الواحد هوا إن عجلتين يناموا مرة واحدة
العربية بتدور لكن مش هتمشي ولا هتتجر يعني رشقت في المكان اللي هيا فيه
طيب نعمل إيه؟
هنحجر العربية (نحط طوب أو دبش قدام وورا كل عجلة)
لو بالليل هنقيد الاضاءة الليلية ونوصل اللمبة اللي فيها سلكين بمشبكين بالبطارية ونحطها جنب العربية بمسافة متر بحيث تنور للي بيشتغل وتخلي اي حد جاي في الطريق يبقى شايفه
هنرفع العربية من جنب العجلة اللي نايمة ( من غير ما نهوي مساميرها)
هنا رقم 1
لو الكاوتش أنبوبة ( مش تيوبلس)
هنا رقم 2
لو معاك حاجة تفك بيها قلب البلف (أحيانا بيكون غطا البلف عبارة عن مفتاح قلب البلف)
هتفك قلب البلف
بالسرنجة هتسحب من زجاجة المادة بتاع الكاوتش ونحط في البلف 20 سم
هنركب البلف وننفخ بالمنفاخ الكهربي لمدة دقيقة واحدة
لو شايف مسمار داخل في العجلة خليه لتحت تماما
لو مش شايف في العجلة حاجة قرب ودنك من العجلة لو سامع صوت تنفيس لف العجلة بالراحة لغاية ما الصوت يروح وساعتها ثبت العجلة
لو مش لاقي مسمار ولا سامع صوت لف العجلة شوية علشان المادة تتفرد على قلب الكاوتش

شغل المنفاخ وانفخ العجلة على ضغط 45
أيوة خمسة وأربعين
سيبها خمس دقايق وبعدين نزلها الأرض
قيس الضغط
لو فوق الاربعين هوي العجلة شوية وصلها ل 33
لو تحت الاربعين شغل المنفاخ ووصله لغاية 45
عودة إلى رقم 2
لو مفيش معاك حاجة تفك بيها قلب البلف
شغل المنفاخ وانفخ على 45 وامشي بالعربية وكل ما تحس بعدم اتزان انزل زود الضغط لغاية ما توصل لأول مكان ممكن تلاقي فيه مساعدة
الضغط العالي هيخلي القلب ضاغط جامد على الكاوتش والهوا هيهرب بصعوبة وبطء شديد
عودة إلى رقم 1
لو الكاوتش تيوبلس
امشي مع نفس الخطوات لغاية (عودة إلى رقم 2)
لو مفيش معاك حاجة تفك البلف انفخ ضغط 45
حاول تسمع او تحس بمكان تسريب الهوا
لو لقيته وحسيت إن بوز السرنجة ممكن يدخل منه املا السرنجة من المادة بتاعة الكاوتش ودخل بوزها في الكاوتش
لف الكاوتش لغاية ما تبقى تحت تماما افرغ نحتويات السرنجة ثم انفخ لمدة دقيقة
هتلاقي الهوا بيخرج من مكان السرنجة على شكل فقاقيع سيبه دقيقة وبعدين فرغ العجلة من الهوا
استني 10 دقائق وانفخ العجلة لضغط 15 وبعدين نزلها على الأرض ولاحظ إن نقطة التقاء الكاوتش بالأرض هتكون مكان الخرم اللي في الكاوتش
كمل الكاوتش نفخ ولم العدة وتوكل على الله
لو مكان الخرم مينفعش بوز السرنجة يدخل فيه او إنت معرفتش تلاقي مكان الخرم اللي في الكاوتش
شغل المنفاخ وانفخ على 45 وامشي بالعربية وكل ما تحس بعدم اتزان انزل زود الضغط لغاية ما توصل لأول مكان ممكن تلاقي فيه مساعدة
الضغط العالي هيخلي القلب ضاغط جامد على الكاوتش والهوا هيهرب بصعوبة وبطء شديد
اتعب شوية وامشي في طريقك وتوصل بألف سلامة