الموضوع: طوارئ ( المروحة وقفت والعربية بتسخن)

و مرة لقيت العربية سخنت والمروحة ما بتشتغلش تعمل إيه؟؟؟؟
على طول بطل العربية وانزل افتح الكبوت
إنسى خالص حكاية فتح غطا الرادياتير أو القربة
الضغط العالي ممكن يبوظ السن وهينطر الغطا ومياه درجة حرارتها فوق 100 درجة
ايوة فوق 100 درجة
المياه بترتفع درجة غليانها تحت الضغط
المهم أول حاجة تعملها تجيب مفك وتحرك بيه ريشة المروحة
حذار ثم حذار تمد إيدك عند المروحة لأنها ممكن تشتغل بقوة في أي لحظة وتجرح إيدك
لو المروحة اتحركت بسهولة هتكون في الغالب سليمة
لو ما اتحركتش أو كانت تقيلة في تحريكها تبقى المروحة قفشت أو باظت
هنا رقم 1
لو المروحة بتتحرك بسهولة
هتلاقي في الأسلاك اللي داخلة المروحة قطعة معدنية في حجم صباع الايد والسلك واصل بيها من الناحيتين دي اسمها مقاومة المروحة
هتجيب السلك اللي في ناحية مشبك وفي ناحية مسمار وتشبك المشبك بموجب البطارية وتلمس مقاومة المروحة من ناحية المروحة
هنا رقم 2
لو اشتغلت هلمس الناحية التانية من المقاومة
لو المروحة ما شتغلتش تبقى المقاومة بايظة هتوصل طرفين المقاومة بحتة سلك هتشتغل المروحة وتتوكل على الله
ولو لمست الناحية التانية من المقاومة والمروحة اشتغلت هتمشي مع السلك هتلاقيه واصل بكتاوت
(مكعب أسود خارج منه 4 أو 5 سلوك منهم واحد واصل بالكهرباء وواحد واصل بالأرضي)
هتمشي مع السلك هتلاقيه واصل بكتاوت
(مكعب أسود خارج منه 4 أو 5 سلوك منهم واحد واصل بالكهرباء وواحد واصل بالأرضي)
وصل طرف السلك اللي إنت ماشي معاه بالسلك اللي قباله
هنا رقم 3
لو المروحة اشتغلت يبقى عندك لسه سلكين في الكتاوت
هتجيب اللمبة ( لمبة الصالون اللي واصل فيها مشبك ومسمار) وتوصل المشبك بموجب البطارية
وتوصل المسمار بالسلكين اللي في الكتاوت ( مرة مع كل سلك)
هنا رقم 4
لو اللمبة قادت مع واحد بس يبقى هوا ده الأرضي
هتوصل مشبك اللمبة بسالب البطارية وتختبر السلك التاني لو اللمبة قادت يبقى الكهرباء واصلة للكتاوت
ساعتها هتبص في جنب الرادياتير هتلاقي حاجة داخل فيها سلكين هتشيلهم وتعمل قفلة بينهم المروحة هتشتغل
لو ما قادتش يبقى فيه مشكلة في كهربة الكتاوت
هتاخد سلك توصله مع طرف الكتاوت الموجب (أخر واحد كنت بتشتغل عليه) وبين أي سلك في علبة الفيوزات يكون فيوزه كبير
ساعتها هتبص في جنب الرادياتير هتلاقي حاجة داخل فيها سلكين

عودة إلى رقم 4
لو اللمبة ما قادتش مع واحد فيهم خالص يبقى فيه قطع في سلك الأرضي
هتوصل مشبك اللمبة بسالب البطارية وتختبر السلكين
هتقيد مع واحد التاني هيبقى السلك اللي واصل للأرضي
تعمل وصلة منه لأي أرضي هتشتغل المروحة
عودة إلى رقم 3
لو المروحة ما اشتغلتش يبقى الكتاوت بايظ
هتغيره لو معاك كتاوت ولاحظ إن الأرجل جنبها أرقام
أو لو مفيش كتاوت هتوصل السلك اللي رايح للمروحة بالسلك اللي قباله هتشتغل المروحة
عودة إلى رقم 2
لو ما اشتغلتش تبقى المروحة بايظة
عودة إلى رقم 1
طيب لو المروحة بايظة أعمل إيه؟
أول حاجة افصل الفيشة بتاعتها
هنا رقم 5
لو عندك مروحة تانية على سربنتينة التكييف هتروح علي كومبريسور التكييف هتلاقي خارج منه سلكين بفيشة افصل الفيشة دي وشغل التكييف من جوا العربية
الكومبريسور مش هيشتغل بس المروحة هتشتغل
عودة إلى رقم 5
لو مفيش عندك مروحة تانية
هتسيب العربية لما تهدي وتفتح غطا القربة أو الرادياتير وتزود ميا والعربية دايرة وياريت لو تفك الخرطوم اللي واصل للرادياتير من فوق علشان تغير كل المياه بمياه باردة
ولو مفيش معاك حاجة تجيب فيها مياه أو كنت في حتة مقطوعة مفيهاش مياه
يبقى مفيش أمامك حل غير إنك تجيب عصاية الكوريك تحطها واقفة على الشنب وشايلة الكبوت وتربط الكبوت من طرفيه كويس جدا بسلسلة حديد او حبل متين او سلك جامد ( علشان ما يترفعش أكتر من قيمة عصاية الكوريك)
وتستني لما العربية تهدى وتدور وتمشي على سرعة لا تجاوز 60 كم / والكبوت هيخلي الهوا يضرب في الموتور من فوق ومن ناحية صدر العربية هبيرده شوية وخلي عينك على مؤشر الحرارة لو على تقف فورا وإياك تحرق على أي غيار او تزنق العربية وافتكر حاجة مهمة جدا
توصل على مهلك أحسن ولا تبوظ العربية وتقعد جنبها
ألف سلامة