تيدا و لا متيداش !

**toty_305** · 21-05-2014 09:26 AM

-حبيت أشارك في قسم نيسان اللي بعزه جدا و عايز عربية Tiida 2008 كده كنت عايز أعرف (سعرها)و عيوبها فقط مش عايز مميزات .

-بلد الصنع أحسن موديل تيدا من حيث بلد المنشأ و التقفيل الداخلي بعدين نبقى نتكلم في أسعار قطع الغيار.

-لو فيه سيارات بديلة...أهلا و سهلا بالإقتراحات

**amr011111** · 21-05-2014 09:34 AM

تيدا موديل 2008 يابانى بالكامل
تقريباً من أول 2011 فهى تقفيل مكسيكى ومفيش فرق بينهم والتقفيل الداخلى واحد برضه مفيش فرق بينهم
السعر على حسب انه فئه
هى فيها تلات فئات هاتش باك ( أول فئه طاسات - تانى فئه جنوط وطاره مالتى - تالت فئه تزيد عن سابقتها بوجود فتحه سقف )
وفيها فئتين سيدان ( أول فئه طاسات - تانى فئه جنوط وطاره مالتى ومش بينزل منها بفتحة سقف )
وطبعاً كل عوامل الامان ثابته فى جميع الموديلات

**toty_305** · 21-05-2014 09:40 AM

-شكرا على سرعه الرد
-ال .h.b أول أو تاني فئة في حدود كام ....فتحة السقف مش مهمة قوي.

**amr011111** · 21-05-2014 09:55 AM

أول فئه هاتش باك كانت زيرو أياميها فى حدود من 110 -115
تانى فئه هاتش باك كانت زيرو أياميها فى حدود 120 تقريبا
معرفش دلوقتى سعرهم استعمال بكام

**toty_305** · 21-05-2014 10:06 AM

-ممكن 75 ألف ؟!

**kokowasfy** · 21-05-2014 12:08 PM

التيدا بتلعب من 75 الى 85 حسب الكمليات و الامكنيات و الحالة العامة للعربية

**toty_305** · 21-05-2014 12:58 PM

-السعر و عرفنا المتوسط

-العيوب بقى يا ناس أفادكم الله...أنا عارف أنها مش ثابتة قوي و دي مش مشكلة مش بسافر كتير ...

**toty_305** · 22-05-2014 11:35 AM

-واضح السيارة خالية من العيوب ...الحمد لله ..الحمد لله #لواء_عبد_العاطي_ستايل

**matawfeek** · 25-05-2014 12:03 PM

انا ممكن افيد حضرتك بخبرتى المتواضعة

انا اشتريت تيدا من 5 ايام تقريبا تيدا سيدان 2007 فبريكا برة و جوة ما عدا الاكصدامات و فى كلام ان الرفارف الامامية فيها جزء مرشوش و ماشية 85 الف كيلو و اشتريتها ب 83500 جنيه.
السعر معقول على حالتها عشان هى الحمد لله الموتور و الفتيس و العفشة و الاساسيات كويسة . و كنت شايف قبلها بيومين واحدة اختها 2008 ماشية 92 الف كيلو بس فابريكا بالكامل و حالتها اجدد شوية صغيرة و كان اخرها خالص 93000 جنيه.

انا عربيتى المفروض اعلى فئة فيها جنوط سبور و 2 ايرباج و اى بى اس و جراب نظارة و فوجات ( بس الطارة مش مالتى)

انا جبت العربية دى بعد صراع طويل من المقارنة بينها و بين مازدا 3 نفس الفئة . بس فى النهاية جبت التيدا عشان حاجتين اساسيين ( اتساع الصالون و الشنطة العالمى - ارتفاعها عن الارض المفيد جدا فى المطبات و المؤثر اكيد فى الثبات ( حسب كلام الناس ) بس مافرقش معايا عشان انا الحمد لله مابجريش على الطريق اكتر من 140 لو مسافر مرسى مطروح بس .

اللى خلانى اجيبها مقارنات اتعملت قبل كده بينها و بين المازدا 3 و واحد قال فيها القول الفصل فى جملتبن
المازدا قلبك هايختارها
التيدا عقلك هايختارها

على فكرة هى تبان عربية صغيرة لحد ماتحطها جنب العربيات التانية هاتعرف انها كبيرة جدا قريبة فى ارتفاعها من العربيات الكروس اوفر زى الماتريكس كده.

الخلاصة انا حتى الان مش شايفلها عيوب يمكن غير ان الكاسيت شرايط - شكلها مش اى حد يحبه - مش ثابتة مع السرعات العالية - احتمال تكون فراملها خفيفة سنة بسيطة عن عربيات تانية - مافيهاش اى بى دى زى المازدا اعلى فئة - مافيهاش تعليق منفصل للعجل زى المازدا - موتورها ( عندى ) صوته عالى شوية بس انا لسة محتاج اغير زيت فتيس و شوية سيور و بوجيهات و عندى خرطوم بيظبط هواء الموتور مقطوع فغالبا الصوت هايظبط بعد كده - مش ستيبترونيك .

بصراحة انا فعلا مش لاقى عيوب لحد دلوقتى و انا كان اقتناعى بيها 70 % قبل ما اجيبها بس حاليا مقتنع بيها 100 % بعد 5 ايام تجربة .

خلى بالك برده انا ماليش فى مقارنات العربيات قوى عشان مابدلتش كتير هى هوندا 97 من 2001 لحد من شهر بيعتها و جبت دى .

ربنا يوفقك ان شاء الله و تلاقى حاجة كويسة.

ملحوظة عشان ماتقعش فيها زيى : توكيل ابو رواش مابيرضاش يعمل كشف بيع و شراء ( شاسيه و دواخل و كبس موتور) فلو عاوز تكشف فى التوكيل ( وده افضل طبعا ) رتب من قبلها مع توكيل يكون عنده الكشف.

**toty_305** · 25-05-2014 03:49 PM

-شاكر جدا لرد حضرتك المفصل و الوافي

-بس حكاية الكاسيت الشرائط ده لسه بينزل في عربيات :d

-هي فعلا أحسن عربية في السعر ده ياباني أصلي أصلي

-أنا شفت واحدة هاتشباك 2006 عامله 145 الف ب 75 ألف

--بس مثلا كنت بتفرج في السوق ملقيتش غير 3 عربيات تيدا واحدة بس هاتشباك و ده اللي مشجعني أجيبها مش عارف ليه...العربيات الكتير زي الانسر و الهيونداي بيتلعب فيهم كتير