الموضوع: بالشرح والصور ...::: بنفسك تقدر تغيير مقاومة بلور التكييف e39 و e46 :::...

السلام عليكم ورحمة الله وبركاته

أحبائي الأفاضل كل البيمرز الجامدين أوي

إذا سمحتم لي أقدم لكم أول تجربة عملية ليا بالصور وإن صح التعبير نقدر نقول مغامرة عملية في تغيير قطعة صغيرة ولكن حيوية في سيارتي العزيزة اللي مش باستحمل فيها مسمار ناقص لعلها تكون نافعة لحبايبنا كلهم في القسم هنا ويستفيدوا منها.

القصة بدأت إمبارح بعد ما روحت من الشغل عادي وكنت مشغل التكييف تمام التمام و100 فل وعشرمية وبعد ما إتغديت نزلت مشوار وأول ما دورت العربية بافتح التكييف لقيت إيه

!!!!!!!!!!!!!!!!!

.................................

.................................

.................................


مــــــافـــــــيـــــــش هوااااااااا

إيـــــــــــــــــــه !!!!!!!

مــــــافـــــــيـــــــش هواااااااااااااااااا

ينهار أبيض..... إيه بس اللي حصل فضلت أراجع كل الزارير كله منور مظبوط واطفي واشغل مليون مرة ومافيش جديد ..... مازالت المشكلة موجودة

.................................

مــــــافـــــــيـــــــش هواااااااااااااااااا

واتجننت خالص وإتعكننت قلت يمكن فيوز ضارب ولا حاجة...
رحت مشواري ورجعت بسرعة ودماغي شغالة عمالة تودي وتجيب أنا مش حمل مصاريف تاني ودي شكلها قصة كبيرة...

فتحت علبة الفيوزات اللي في الشنطة مالقيتش غير كام فيوز وما لهومش أي دعوة بالتكييف ومافيش فيهم حاجة ضاربة....واللي في التابلوه نفس الكلام فيوزات التكييف كلها سليمة لدرجة إني فكيت كل الفيوزات وراجعت عليهم واحد واحد وكله سليم برضه.... طب والحل !!!!!!!!!!!
أعمل إيه؟؟ عاوز أعرف المشكلة دي سببها إيه!! لأنه لو حاجة كبيرة مش حأعملها غير فالتوكيل وده أنا مش جاهز ليه حاليا خالص.

اتصلت بصديقي العزيز كريم منير اللي دايما مابيتأخرش علي حد أبدا جزاه الله كل الخير علشان أستشيره كعادتي ... فنصحني إني أكشف علي التكييف عند حد متخصص عشان زي ما ممكن تكون حاجة بسيطة ممكن برضه تكون حاجة كبيرة فمافيش داعي نلعب من دماغنا والصراحة فنبوظ بدل ما نصلح ...كلامه مقنع جدا ولكن فضولي مش قادر اتغلب عليه ... لدرجة مش هاممني أصلح العطل قد ما أنا عاوز أعرف إيه اللي بايظ بالظبط وخايف يكون حاجة تحتاج فك التابلوه لأني واثق إنه في مصر محدش حيعرف يقفله زي ماكان 100 100 والموضوع ده عندي أهم من أي حاجة.

كلمت كمان صديق عزيز برضه sheko_2000eg وسألته عن سبب المشكلة دي وممكن أدور فين علي حلها أو ممكن يكون إيه قاللي نفس كلام كريم وقاللي ماينفعش أسكت علي الموضوع ده لربما يأثر علي مروحة التبريد السرعتين وماتشتغلش وساعتها العربية تسخن ... طبعا كتر ألف خيره كلامه ده يساوي فلوس وفلوس كتير كمان.

فالمهم .......زادت حيرتي ومكنتش عاوز أروح لأي حد يشتغل في العربية...

النهاردة نزلت عديت علي ورشة طارق فوزي قلت يمكن يعرف يحل المشكلة دي فقاللي إنه مالوش في التكييف ولا الكمبيوتر عنده يكشف المشاكل دي وقاللي روح لحد شغال تكييف.

روحت وأنا زهقان وفتحت النت أدور في المواقع الأجنبية عن أي حد بيتكلم عن المشكلة دي فلقيت فيه ناس كاتبة عنها وإن سبب الموضوع ده بيكون غالبا بسبب وحدة أو مقاومة المروحة إسمها FSU ...طب ودي عبارة عن إيه ؟؟.. د ي مقاومة مروحة البلاور وده الإسم العلمي ليها final stage unit/blower motor resistor.

المهم استعنت بالله وقلت شكلها هيا دي ...وفتحت مواقع قطع الغيار وجبت تفاصيلها PART NO: 64 11 6 923 204 بس شكلها غريب كده وطالع لها سنان كتيرة المفروض الهوا بيعدي عليها جوا البلاور...


وعرفت بتركب فين في العربية بالظبط فالصراحة سخنت أوي .. ونزلت علي البافارية اللي في شارع دمشق وركنت في الشارع اللي قبلها في مكان ضل وفكيت جنب الكونسول من اليمين قدام ودي الصور من أول ما بدأت لحد ما خلصت.





هو مسمار واحد اللي بيثبت الجزء ده وسهل جدا في فكه.



نسحب شمال بالراحة جدا حنلاقيها طلعت بسهولة.







حاولت أشوف فين الوحدة دي مش لاقيها إكتئبت وقلت شكل كده عربيتي طراز مختلف وحتغلبني.



نزلت بقي براسي جوا الدواسة علشان أدور علي الوحدة العجيبة دي لقيتها جوة خالص قلتلها أخيرررررا ظهرتي ...تعاليلي ياحلوة.



الوحدة مش متثبتة بأي مسامير خالص هو الكلبس البلاستيك بس اللي في الصورة باين فوق ده بيقفل علي جسم الوحدة علشان ما تتطلعش من مكانها ده بالإضافة لوجود عدد 2 دليل اللي بيباتو في الخرمين اللي في الوحدة دول علشان تكون في وضعها السليم جوة البلاور.



سحبتها لبرة برفق طلعت معايا بالفيشة بسهولة جدا.



خرجت الفيشة بصعوبة شوية وخدت وقت لأني كنت باسيسها قدر الإمكان علشان خايف لتكون شابكة في حاجة مش شايفها وخفت لأكسر حاجة يبقي كده الدنيا خربت خالص بدل ما احل المشكلة أقع في ورطة ده غير أصلا أن دي مغامرة لأن ممكن ماتكونش دي سبب العطل أساسا لكن عرفت السبب لما اتفكت شكلها سخنت جدا لدرجة إن بلاستك الفيشة ساح منه جزء ولزق في الوحدة طبعا إضايقت لما لقيت آثار السيحان في الفيشة بس لاحظت أنه بإذن الله مايأثرش علي أداء الفيشة وتنفع تركب برضه.





وخدت الـ FSU اللي مدوخاني دي ورحت بيها لمركز قطع غيار البافرية اللي في دمشق أول ما الراجل شافها قاللي دي اتغيرت بقطعة تانية مختلفة الشكل قليلا وبـ 900 جنيه .... بس مش موجودة ...قلت له شكرا ... ولو موجودة الفلوس معايا مش حتكمل.

طلعت علي بايرن في نفس الشارع قاللي الأول مش موجودة فقلت له انها اتغيرت بقطعة تانية بارت نمبر مختلف وخليته فتح لي الشارت بتاع أجزاء التكييف وحددتها له قاللي موجودة ب 600 جنيه !!! قلت له ماشي بس خايف لأنها ممكن تكون مش هي السبب في العطل قاللي بمجرد خروجك من المحل مش بترجع علشان دي قطع غيار كهربا وسياسة المحل ...طبعا احترمت وجهة نظره وقلت له شكرا.

طلعت علي سامح نجيب أشوف إيه نظامها عنده لقيتها ب 500 وعمللي خصم فوري 20 جنيه يشكر برضه الراجل عمل واجب علشان كنت إتصلت بيه سألته عليها قبل ما أروح له ... المهم كنت قلقان لا ماتكونش هي السبب في العطل لقيت الراجل أكد لي إنها السبب الرئيسي لعطل البلاور فريحني نوعا ما لكن طبعا مازلت قلقان وحاسس إنها مغامرة مش محسوبة .. يعني يا صابت ..يا إما
اتنين عوروخدتها وطبعا أنا مافهمش حاجة في الماركة اللي هي Meyle بس شكلها ماركة جامدة ولكن لاحظت العلبة مفتوحة قبل كده لأن السيل اللي عليها مفكوك المهم.



ده شكل العلبة قبل ما افتحها.



وده البارت نمبر والبيانات التفصيلية وعلي فكرة الـ Ref اللي مكتوب هو البارت نمبر بتاع الوحدة اللي كانت في العربية البايظة.



لاحظت إنها مش متغلفة في كيس أو فوم لحمايتها إثناء النقل.



ولما نحط الإتنين جنب بعض نلاحظ الفرق بينهم لكن الفيش والمقاس هو هو ...وعلي فكرة نفس القطعة دي بتركب للعربية E46.



أول حاجة ركبت الفيشة علشان أشوف السيحان اللي حصل حيأثر عليها في التركيب ولا إيه!!! لكن الحمد لله مش عاملة مشاكل تقلق في مكانها.


حبيت أراجع المكان قبل ما أركب الوحدة الجديدة لأن الدنيا هنا ضيقة والسلوك والعزل مضيق المكان زيادة فمكنتش شايف بوضوح أوي غير لما غطست جوه خالص واتأكدت إن المكان سالك.



دخلت الوحدة كلها بحرص في مكانها بس حاسس إنها مش مستريحة مظبوط خصوصا إن الكلبس مش ماسك عليها وكانت سايبة وكمال الدليل اللي فوق مكنش في مكانه برضه ... المشكلة المكان ضيق مش عارف أشوف بالظبط إيه السبب؟!!



بعد عدة محاولات طلعت فيها الوحدة من مكانها وحاولت أدخلها تاني بس برضه مش مستريحة مظبوط إضطريت إني أفك الفيشة خالص وأدخل الوحدة لوحدها بحرص لحد ما باتت مظبوط وكل دليل في مكانه تمام والكلبس قفل عليها كويس كده مش حتطلع من مكانها.




ركبت الفيشة تاني وركبت بسهولة وتمام في ثواني علي طول الحمد لله.



كده خلصت تركيب وحدة FSU الجديدة اللي مدوخاني في مكانها ومش فاضل غير إننا نقفل المكان تاني زي ما كان و نبدأ بآخر قطعة فكيناها اللي هي في جنب الكونسول وبتتثبت بكلبسين من الداخل بيركبو بالجنب عن طريق السحب جهة اليمين.



نقفل المسمار الوحيد الصغير مفيش غيره في الجزء اليمين.







فاضل أخر جزء اللي بدأنا بيه في الفك بس دي صورته مقلوب نعدله الأول وبعدين نركبه وده من غير أي مسامير ولا حاجة خالص مجرد إنه يبات في المكان بتاعه ليه مجرتين من جوا دول نبدأ بيهم.



بتهيألي الموضوع بسيط خالص





نبيت الغطا من الأمام زي ماهو باين في الصورة وهو ليه شفتين واحدة عاليمين وأختها علي الشمال بيتشبكوا في الماسورة اللي بالعرض دي ونزق لجوه حنسمع صوت "كليك" يبقي كده كله تمام.





مفيش أسهل من كدا ... بس ياتري إيه اللي حيحصل التكييف حيرجع يتشتغل تاني ولا !!!!!!! إيه!!!!!!

إستر يارب










... الحـمــد لله حتـــي يبلــغ الحمـــد منتهــــاه ...

كده تمت العملية الجراحية بنجاح كبير بفضل الله وحده...


أنا طولت عليكم جدا بس إعذروني إذا كان فيه حاجة مش واضحة انا حاولت علي قد ما أقدر أوضح كل الخطوات بالتفصيل وتحت أمركم في أي إستفسار بخصوص الموضوع ده.



خالص تحياتي

المشاركة الأصلية كتبت بواسطة s o p h o s

الله ينور يا باشا

ألف شكر وعلي حضرتك

تحياتي