الحمد لله نجوت من حادث اليوم

**ibrahimsaad** · 17-07-2014 05:45 PM

الحمد لله اليوم وانا ذاهب للعمل سلكت طريق مختصرا من خارج المدينه زراعى وهو ضيق فردى وفجأه وجدت امامى جرار زراعى بمقطوره جاى فى المقابل من الشمال فى طريقه العادى وميكروباص يحاول تخطيه فى مقابلى وانا على مقربه منهما واذا بتوكتوك ورائى راكبه عيل حمار يحاول تخطينى من على اليمين رغم انه شايفنى واخد يمينى وفى مقابلى جرار وميكروباص فحاولت اخد اقصى اليمين للاخر حتى يسمح لنا الطريق بعبور الجرار والميكروباص وانا فى نفس اللحظه لانه لم يكن امامى الا احد خيارين

اما انى اترك اليمين للتوكتوك الغبى يعدينى من اليمين وهنا سوف البس فى الميكروباص فى حادثه فظيعه او ان استمر فى اخد اليمين وهذا حقى وهنا سوف يضيع الجانب الايمن للعربيه من التوكتوك وربما اقلبه فى ترعه على اليمين

بصراحه مش عارف ومش فاكر ايه اللى حصل ومش عارف انا عملت ايه بالضبط انا حاسس ان ربنا هو اللى عدانى لانى مش فاكر انا عملت ايه وعديت ازاى بصراحه

المهم بعد ماعديت باعجوبه كنت متنرفز جدا وجريت ورا الولد بتاع التوكتوك ولكن لقيته جرى فلحقته بيعدى توكتوك اخر فانا وراه بعدى وفاكر ان الطريق فاضى لانه عدى قدامى لكن لقيته عدى وفى لحظه لقيت فى وشى عربيه كنت هالبس فيها لكن كسرت يمين بسرعه وطبعا مفروض انى كنت هالبس فى التوكتوك التانى اللى قدامى من اليمين فضغطت فرامل بسرعه جامده وكانت المسافه لاتكاد تكون 2 متر الكاوتش طبعا صرخ ولقيت دربكه تحت رجلى وخبط طبعا انا اول مره اشوفها وفهمت كده انها تقريبا ال abs وبصراحه حاسس انها انقذتنى من تصادم محقق على الشعره

بصراحه نجوت من حادثتين ورا بعض فى وقت واحد ومن نفس المتسبب وهو توكتوك مستهتر مش عارف اى قواعد لاى شئ

الحمد لله كل شئ سليم وهذا بفضل الله وحده

**shiko85** · 17-07-2014 05:50 PM

الحمد لله ان حضرتك بخير

**khaled81** · 17-07-2014 05:51 PM

الف سلامة عليك وربنا يسترها .. فعلا التوتوك بقى حاجة صعبة

**mohamed boy** · 17-07-2014 06:34 PM

الف سلامة

**عبدالله برعى** · 17-07-2014 07:12 PM

لو على التكاتك كل شوية حنعمل حادث ومشكلة
ربنا ياخدهم
او
يهديهم
او
تترخص التكاتك وتبقى مخالفات للمخالف بمبالغ كبيرة

**Mr.Lawyer** · 17-07-2014 07:14 PM

التوكتوك اصبح كـ السرطان فى شوارع المحروسه والافظع لما تلاقى التوكتوك على السريع
ممكن تبقى ماشى عادى فى حالك وفجأه تلاقى توتكتوك سايقه طفل متخلف جاى عكس الطريق وبسرعه فى وشك
وعادى لما يمشى عكس الطريق سواق فى الحاره اليمين او الحاره الشمال ( السريعه )
للأســـف ف الفتره الاخيره اصبح التوكتوك هو بطل الحوادث فى مصــر ولازم حل للسرطان دا فوراً
وطالما عايزين يرخصوه يبقى لازم يكون عليه رقابه مشدده واماكن محدده يمشى فيها ولو طلع منها يتصادر التوكتوك فوراً بدون نقاش

بس اعذرنى اعيب على حضرتك مطاردتك للتوكتوك واللى كانت هتسبب فى حادث تانى ، انا عارف انها نرفزه موقف بس كان لازم تتحكم فى اعصابك شويتين لسلامتك

وعامه على الطريق الفردانى ، اوعى تعمــل غرزه ورا حد طالما انت مش كاشف الطريق من اوله لاخره وخاصه ورا توكتوك

وألف ســـلامه على حضرتك ،،

**vip74** · 17-07-2014 07:41 PM

ألف سلامة عليك الحمد لله
التوكتك اصبح كارثة
ولازم يكون فيه حل

**Msanad** · 17-07-2014 09:19 PM

حمد الله على سلامتك
لازم يبقى فى صرامة فى التعامل الفترة الجاية مع التوكتوك بعد موضوع القانون بترخيصه لازم يتم عمل رخص للى يسوقه والا يقل عن 18 سنه وكمان يتم حصره بأماكن معينه واللى يخالف يتصادر منه - الناس ما بتجيش الا بالعين الحمرا

**kabara** · 17-07-2014 09:59 PM

الف سلامة عليك و ربنا يحفظك من كل مكروه

**د.هشام** · 17-07-2014 10:07 PM

ألف حمد على سلامتك
أغلب أسباب الحوادث هي السرعة الزائدة وخصوصا في شوارعنا الجميلة. المشكلة مش بس في التكتك، المشكلة في العشوائية إللي في الشارع، يعني لو مكانش تكتك يبقى حنطور أو ميكروباص أو نقل أو حتى قطار، والسرعة المعقولة هي إللي بتساعد السائق انه يتفادى أخطاء الغير، والله خير حافظ.