الموضوع: تقييم اول صيانه لى مع رينو

انا توجهت لعمل صيانه لبعض المشاكل عندى فى العربيه فى فرع المقطم اخدت يوم اجازه
عربيتى عامله 1400 ك فقط يعنى مش صيانه ال 5000 ك المهم المشاكل اللى عندى بالظبط ايه
1- انخفاض دواسه الفرامل يعنى بضغط على نص الدواسه عشان اشعر بتاثير
2- رعشه الدواسات
3- التكييف بيخلى العربيه بتنتش وتقطع وبياثر جامد جدا على السحب
4- فى هزه خفيفه فى الزجاج بتاع الناحيتين بسمعه احيانا مش دائما
5- الابواب اللى وره لازم يترزعوا عشان يتقفلوا كويس
المهم انا اول ما دخلت لقيت فى واشى واحد اتم اوى اسمه تقريبا تامر قالى انت مكملتش ال5000 صح قولتله اه قالى طيب ايه المشكلة عندك قولتله اول عيب قالى استنه هجبلك مهندس يجربها معاك المهم جيه المهندس ومقتنعش بالعيب بتاع الفرامل قالى ده الطبيعى بتاع اللوجان وبعدين انت منزل الدواسات اوى فعشان كده برضوا ماثره على الفرامل بتخليها تنزل اوى المهم صدقته ومفاصلتش معاه قولتله طيب التكييف بينتش قالى منتش معايا وانا بجرب العربيه غير مره واحده بس قولتله هى مش على طول على حسب الجوء يعنى الزحمه بتخلى العربيه تنط قالى طبيعى ان التكييف يتاثر بالزحمه بصراحه كنت عايز اضربه ساعتها كل ما قوله حاجه يطلعنى غلطان قولتله طيب بص على الازاز قالى اه بيتهز فى السمكره يعملولهالك قولتله طيب رعشه الدواسات قالى انت داخل السمكره الاول عشان تبص على الازاز والباب ممكن لو فيه وقت بعد ما تخلص اخر اليوم تجيلى ابقى اعمل مراجعه خفيفه بس العربيه سليمه 100 % تكييف وفرامل وكل حاجه بصراحه مشيت وانا مخنوق منه ودخلت للسمكره لطعونى حوالى ربع ساعه لحد ما مهندس رد عليه بعد ما دورت عليهم ولفيت عليهم الورشه ونفس اللى حصل مع المهندس بره حصل فى السمكره اقنعونى انى مخطا ومفيش هزه فى الازاز رغم ان المهندس بره اقتنع بالعيب ده بس عشان مش هو اللى هيشتغل فيه واقنعونى ان الابواب ربنا يكرم وتلين مع الوقت وواحد صنيعى هناك قالى هحطلك اسبراى يلين الباب والازاز المهم رجعت تانى عشان يبصوا على التكييف والرعشه المهم بعد لطعه شويه دخلوا عربيتى كانت الساعه ساعتها 12 و ربع المهم قعت مستنى العربيه حتى الساعه 4 وربع يعنى اربع ساعات بالظبط فيها ناس جت بعد منى وخرجت قبل منى وناس وسطه جيه وبتوع الاستقبال يقوللهم تعالوا جوه اوريكم عربيتكم يعنى الكوسه فى كل مكان حتى هنا
المهم استلمت العربيه ومفكروش يغسلوها انا قولتلهم عايز اغسلها ودوها عشان تتغسل المهم تقيمى للمشكلتين اللى كانوا عايزين الحل التكييف والرعشه التكييف اصبح شغال كويس ومش بياثر على العربيه الرعشه لسه موجود بس قلت بنسبه 10% الغريب انهم علوا الفرامل عندى رغم انها مكنتش مكتوبه فى المشاكل بس اكيد المهندس اللى خرج معايا قال بما انى هشتغل فى الدواسات ارفع الفرامل بالمره
تقييمى العام الخدمه 5% والصيانه 70%
انا قولت 70% للصيانه ليه لانى مجرب الصيانه بره فى سيارتى القديمه وعارف انك ممكن تودى عربيتك للميكانيكى ترجع تلاقى العيب بقى اتنين المشكلة الاساسيه عندهم فى الخدمه من وجهه نظرى
ياريت يصلحوا الخدمه شويه عشان انا حسيت انهم عايزين يطردونى من المركز بمجرد ما قولت انى مش عامل ال5 الف
على فكره انا بطرح الموضوع ده وانا من ملاك رينو مش لغرض بس لعرض موقف يمكن يقتنعوا ويغيروا ويصلحوا طبعا انا نفسى نطور مركز رينو ليصبح افضل مركز صيانه يارب لانى لوجناوى

المشاركة الأصلية كتبت بواسطة galilioz

انت حاسس انهم ممتازين يعنى وله تعبانين

هما ممتازين بس مرحتش غير العبور
فاضى و رايق و اى حاجه بقول عليها بتتعمل
بحجز اول ميعاد الصبح معايا الكمبيوتر والعربيه فى ساعتين و نص عملت صيانه ال 20000 الف و كنت قايل على ملحوظتين كمان
استلمت العربيه مغسوله وزى الفل و كمان اتفرجت على موديلات الرينو الجديد
معاهم من اكتر من سنه