الموضوع: ارجو المساعده هل الفرق بين ال 316 وال 320 يستحق فرق المبلغ ؟؟

اظن الفرق في القوة في لموتور تستاهل

136 حصان و 184 حصان. 50 حصان بحالهم. غير فرق الاوبشنز. طبعا الفرق يستاهل لكن المهم أنت محتاج ايه؟

فروق قوه الموتور و الاوبشنز بين الاتنين يخلوهم عربيتين مختلفتين و مفيش حاجه تجمعهم غير الماركه و جودتها فقط. النصيحه لو حضرتك ميزانيتك تسمح يبقي هات ال 320 و ان شاء الله مش هتندم الا اذا كنت حضرتك مش محتاج علي الاقل نصف الاوبشنز و مش فارق معاك فرق المواتير.

الموضوع اللي حضرتك بتتكلم فيه ده لسه حاصل حاجه شبهه مع صديق لي بس في شراء عقارات : كان بيدور علي فيلا و لقي قدامه فيلا بس لازق فيها من الناحيتين فيلتين تانيين و دي سعرها ارخص كتير مقارنه بواحده تانيه منفصله من الناحيتين و هو كان بيفكر طيب ما الاتنين في الاخر اسمهم فيلا طيب لما اخد الارخص و فعلا عمل كده بس مع الاسف لما سكن فيها اكتشف انها كأنها شقه بس كبيره شويه يعني ممكن يسمع الجيران لو بيزعقوا و بيزحزحوا حاجه تقيله و بالتالي ما بقتش فيلا ليها خصوصيه الا علي الورق بس او بقت فيلابس درجه تانيه و هو ده بالضبط اللي قلقان منه لو اخترت ال 316 انما طبعا القرار لحضرتك و حاول تقعد في الاتنين الاول و تجرب قبل ما تختار و بالتوفيق لما فيه الخير

طب بالنسبه لاستهلاك البنزين هل الاستهلاك فى 320 اعلى كتيير من 316 ولا فرق بسيط

بخصوص البنزين صدقني مش هتحس بفرق. انا بتكلم علي ال e90. استهلاكها أعلي بسيط من أي موتور 1600. الانترا أو سيراتو مثلا.

السلام عليكم، بالنسبة لاستفسار حضرتك بخصوص الفرق بين 316 و 320 انا كان عندى نفس التساؤل دة قبل الشراء والحمد لله استقريت على 316 بريميوم وذلك لاسباب كثيرة :

1 - فرق الموتور بين الاتنين ليس كبير وبالتجربة لا تعتقد ان 316 بطيئة كما تخيلت ولكن بالعكس التسارع بتاع العربية بسم الله ما شاء الله خاصة على الاسبورت دريف واديك مثال لى صديق معاة c180 موديل 2014 التسارع لحساب 316 بنسبة كبيرة.
2 - 316 تقفيل المانى و 320 تقفيل مصرى وبة عيوب كثيرة .
3 - لا يوجد فرق فى الكماليات بين 316 بريميوم و 320 بريميوم الفرق ضئيل جدا.
4 - الفرق بين 316 بريميوم و 316 لاكشرى كبير ولكن ايضا فرق المبلغ بين الاتنين كبير جدا حوالى 30000 جم وكل الفرق شوية نواكل اماى وخلفى يمكن تركيبهم بنصف المبلغ كما فعلت ( جميع نواكل الاكشرى بتركب على البريميوم )

خلاصة الكلام من وجة نظرى خليك فى 316 البريميوم وركب الكماليات دى كلها بنص التمن

وشكرا

الحقيقة يا جماعة من وجهة نظري ومع أحترامي لجميع الأراء أن الموضوع مش كماليات تركب بنصف السعر، علشان اللي ناوي يدفع المبلغ ده عايز يركب عربية من الأخر مش لسه هيروح يلعب ويعدل في العربية ويركب فيها كماليات ، الموضوع أنا مستني أيه في العربية اللي دافع فيها مبلغ كبير ومحترم وهاخد أيه مقابل الفلوس " القيمة مقابل السعر" الفرق بين البريميوم والاكشري الكراسي الجلد والنواكل و التعتيم في المريات و الباركينج سينسور الخلفي الجنوط المختلفة الأبانوس في الطابلوة كل دي فروق ومش سهل أضافتها ...

أما من حيث المبدأ ما بين ال 316 و ال 320 فالموضوع فرق هورس باور محترم وفتحة سقف وكراسي كهرباء فالموضوع بردة مختلف وعلى فكرة التجميع المصري جيد جداً ومحدش يقدر يفرق العربية المجمعة محلياً عن الألماني تقريباً هيا هيا الحقيقة BMW في موضوع التقفيل المحلي مهتميين به جداً ، أنا عن نفسي رحت لل 316 الاكشري بس علشان موضوع البنزيين والضريبة لأن الدعم على المواتير اللي أكبر من 1600 هيتشال هيتشال لو مش السنه دي هيبقى السنه اللي جاية وكمان ضريبة العربية أكيد هتختلف حالياً لل 1600 حوالي 300 في السنة و ال 2000 حوالي 1000 جنيه في السنة مش ده اللي يفرق لكن أكيد الضريبة هتعلى على المواتير الكبيرة ، بناءاً عليه أنا فضلت أروح لل 316 الاكشري وبالي مستريح يشيلوا الدعم يخلوه يرفعوا الضريبة يخلوها أنا مش في حساباتي خالص ... وكمان فرق الهورس باور ده يفرق لو في أوروبا أو أمريكا هاي واييز والدنيا مفتوحة أما في مصر وبزحمتنا دي ال 136 حصان زي الفل وبالتجربة العربية سحبها جميل وموفرة جداً جداً في البنزين ... والحمد الله أني خدت قرار الشراء وما ستنتش المرسيدس ال c الجديدة حقيقى عربية فخمة ومحترمة وكنت هاموت عليها بس كان ممكن أطب ساكت لو قالولي بعد الشراء لازم بنزين 95 أو كنت قعدت أخبط دماغي في الحيطة ...