نصيحة بالنسبة لعفشة نيسان صني القديمة

**zoromeme** · 17-09-2014 11:16 AM

السلام عليكم.
كنت محتاج رأيكم في شوية حجات بخصوص العفشة لعربية نيسان صني 1995
انا ان شاء الله ناوي أشتري الـ 4 مساعدين لسوء حالتهم عندي ( لسة ماشي بالأصليين)
و كمان محتاج جوز كبالن عندي واحد منهم تقريبا متدمر و للأسف لسة مغيرة من 4 شهور تقريبا و المفروض انة الماني زي ما البياع قالي ( ربنا يسامحة بقى)
و بما ان قطع غيار الموديل دة تقريبا شبه منعدمة عندنا في الأسماعيلية فكنت محتاج نصيحتكم في الأتي:

- مكان محترم اشتري منة قطع الغيار دي حتى لو غالي بس تبقى الحاجة محترمة (في أي مكان في القاهرة في بورسعيد او اي مكان).

- أنواع كويسة لقطع غيار دي مثلا سمعت ان المساعدين kyb دي كويسة هل في نوع افضل و هل في نوع مماثل للكبالن ؟؟

- أجيب جديد ولا انزل مثلا الحرفيين في القاهرة او بورسعيد ادور على استعمال زي ما بعض الأصدقاء بينصحوني.

- و ياريت مكان صيانة محترم يكون فاهم عشان انا تعبت من الصنايعية اللي بتفتي و مش فاهمة و بتبوظ مش بتصلح.

و شكرا ليكم

**zoromeme** · 18-09-2014 12:54 PM

يا ساتر يارب 73 مشاهدة ولسة محدش عرف يساعدني

طيب ده شكل العربية يمكن يساعد الناس

**anasnora** · 18-09-2014 10:52 PM

بص يا باشا ..مساعدين التوكيل ملهمش حل وبيعيشوا مدة طويلة جدا جدا ..لو مش هتجيبهم هات المونرو ممتاز وعليه ضمان سنة ثم kyb ودى مبتعش زى التانيين وانا عن نفسي مبحبش الاستيراد وبجيب جديد ..ومبرحش الحرفيين الا لما ملقيش الحاجة والف عليها ..اما موضوع ميكانيكى فالعربية بيشتغل فيها اى حد كلهم حافظينها وفى واحد فى صقر قريش وفى واحد فالملك الصالح وفى واحد فالسيدة دول الى انا بعمل عندهم شغل ..شوف لو حد فيهم يناسبك قولى

**anasnora** · 18-09-2014 10:58 PM

معلش نسيت اقولك الكبالن ممكن تجيبها استيراد من الحرفيين كويسة ..وبتوع قطع الغيار محمد جابر فالتوفيقيه ومصر الجديدة وصقر قريش والحرفيين والعالمية مصر الجديدة والحرفيين والاهرام فى اول فيصل والجوهرى التوفيقية

**hotmail** · 20-09-2014 01:36 AM

اوعى تشتري مساعدين اصلي من التوكيل انا مجربهم لموديل 98 وطلعو خفاف مونرو زي ما بسمع سمعتها كويسه اما بالنسبة للكبالن عندك محمد جابر في شارع دمشق ميدان الجامع في مصر الجديدة محل محترم اهم حاجة تحافظ على كاوتش الكوبلن انا تحت امرك في سؤال ارجو مراسلتي على الخاص

**zoromeme** · 20-09-2014 04:53 PM

أولا انا بصراحة بشكرك جدا على ذوقك
ثانيا تمام كدة في أحتمالين يا اما مساعدين التوكيل ( سؤال غبي معلش هو لسه حجتها في التوكيل :) ) طب لو كدة العنوان ايه او رقم تليفون اكون شاكر
يا اما أجيب المونرو
اما بالنسبة للميكانيكي فالله يكرمك انا عنيت كتير من الصنايعية حسيسوني اني راكب عربية عمرهم ما شافوا زيها ده اخر واحد قالي (ما تبعها يا بيه مش هتلقيلها قطع غيار :) )
انتا كدة ريحتني و بيتهيقلي اقرب واحد فيهم اللي في صقر قريش معلش استسمحك في العنوان بالظبط ؟؟
هل اركب عنده المساعدين و الكبالن ولا في صنيعي تاني ؟؟ ايه رأيك؟؟

**zoromeme** · 20-09-2014 04:58 PM

كبالن استعمال ّّّّّ!!!! مفيش نوع جديد كويس ؟؟؟ و لو رأيك المستعمل أفضل مفيش مشكلة
و كدة تمام انتا دلتني على اماكن قطع الغيار و اسامي المحلات كتر خيرك بجد
كدة محمد جابر و العالمية في الحرفيين اقربلي و لو هركب عن الميكانيكي اللي رشحتهولي يبقى اشتري من صقر قريش

**anasnora** · 20-09-2014 06:32 PM

اسمه يا باشا محمود تايجر ومعظم الناس اللى معاها نيسان بتتعامل معاه ورقمه 01115796863 اما بالنسبة لزميلنا اللى بيقول بلاش مساعدين التوكيل فانا مركبهم من سنتين وملهمش حل ولا شكوى منهم الحمد لله ومش معنى ان المساعدين طلعوا خفاف يبقى كله زى بعضه