الموضوع: عملت حادثة جامدة و محتاج مساعدتكم

السلام عليكم عملت حادثة جامدة شوية بعربيتي فيات بترا 2003 نتيجة لأنفجار الكاوتش و انا ماشي وربنا سترها معايا و طلعت سليم الحمد لله بس العربية اتدمر فيها حاجات كتيرة مبدأياً فتيس و مقصات و و ردياتير كامل و حاجات التكييف و اكصدام امامي و كشافات و صرة الكاوتشين اللي ورا معوجين و الكابوت طبعاً و السقف اطبق و البربريز الامامي اتكسر شوية و اكيد فيه حاجات تانية هتبان و هما شغالين فيها .. وديتها لسمكري بتعامل معاه في صقر قريش قالي هنزلك التوفيقية و الحرفيين و عزبة شلبي اسأل علي قطع غيارها .. قالي قطع غيارها مش موجودة خالص بس لقي الحاجات الخفيفة زي الاكصدام و الكشافات و كدة لكن الفتيس اللي اتكسر بسبب الحادثة ملقهوش غير عند واحد بس استيراد ب 3000 جنيه و الدنجل الخلفي كامل ب 6000 جنيه ... انا بس معنديش دراية بأسعار قطع الغيار .. بس انا بعتقد الاسعار دي غالية لأن كان فيه مواضيع عن قطع غيار السيينا و الفتيس كان مكتوب انه ب 700 او 800 جنيه و الموتور كامل بكل ادوات التغذية 3700 و مفروض ان البترا و السيينا اسعارهم قريبة من بعض ... ساعدوني من فضلكم الاقي فين قطع الغيار و اسعارها و اللي عنده اي معلومة يساعدني ارجوكم لأني معرفش اي حاجة .. و شكراً مقدماً و هحاول ارفق صور ليها بعد الحادثة

الدنجل من الوكالة هاتو استيراد فاضى و ركب حجتك يتهيئلى يعملو 2000
و لما تسئل على الفتيس لوحدو هايدوك سعر عالى اوتوماتيك، اسئل على سعر الموتور كامل و خد الى انت عايزه و ابقى بيع الباقى كده اوفر
المقصات و ردياتير كامل و كشافات و البربريز الامامي و حاجت التكييف هاتهم جداد احسن
اكصدام امامي و الكابوت استيراد م الحرفيين
و الف سلامة