الموضوع: عزيزي مالك الميجان 2..استهلاك البنزين

ازيكم يا شباب،
في حد عنده شكوى من استهلاك البنزين؟

لو استهلاك البنزين عندك أكتر من 10 لتر كمل الموضوع ده يمكن تستفيد..ولو أقل من كده اكتبلنا نصايحك.

أنا استهلاك البنزين عندي 9.5 لتر جوا البلد في الزحمة.
ايه الخطوات اللى ممكن تقلل استهلاك البنزين بعد تنظيف البوابات والحساسات والفلاتر واللذي منه

- ركب فلتر اسبور مكان الفلتر الأصلي! ازاي؟ مش المفروض استهلاك البنزين يزيد مع الفلتر الاسبور؟

غلط جدا! استهلاك البنزين مع الفلتر الاسبور بيزيد في حالة واحدة بس، انك تفضل تحرق جامد على العربية طول الوقت، أما لو ماشي عادي بتنقل على 3 إلى 3.5 RPM هتلاقي الاستهلاك بيقل بشكل ملحوظ عشان الفلتر ده بيسمح بدخول كمية أكبر من الهواء إلى المحرك.

ممكن تجيب فلتر صيني ب 60 إلى 120 جنيه لو متقدرش على فلتر K&N وهيأدي الغرض، بس متجيبش فلتر صغير، هات مقاس كبير.
الفلتر كمان ليه ميزة تانية إنه بيحسن السحب حاجة بسيطة على السرعة العالية.

- أخبار شنطة العربية ايه؟ مكركبة؟ محتاج الاستبن في حاجة؟

لو انت زي حالاتي جرئ ومستبيع استغني عن الاستبن وحط مكانه الجهاز بتاع نفخ الهواء اللى بيشتغل على البطارية وارمي كل حاجة من الشنطة ملهاش لزوم معاك. كل ما وزن العربية يخف، استهلاك البنزين هيقل والسحب هيبقى أفضل. بعض الشباب الفانكي في أوروبا وأمريكا بيشيلو كمان الكنبة الخلفية !!

- استخدم مواصفة زيت مختلفة: 5W30
الزيت اللي بالموصفة دي بيقلل الاستهلاك بنسبة ضئيلة جدا ولكن في الآخر بيفرق!
ممكن مثلا لو العربية بتعمل 9.6 يخليها تعمل 9.5 وهو مطابق لمحرك الميجان عادي على فكرة.

- ضغط الكاوتش!

لازم لازم تشيك على ضغط الكاوتش باستمرار على الأقل مرة كل أسبوع لو هواء أو مرة كل اسبوعين ثلاثة لو نيتروجين! كل ما الضغط جوا العجل بيقل استهلاك البنزين بيزيد عشان المقاومة هتزيد بين العربية والطريق.

- وأخيرا حاول دايما تسوق على سرعة 90 ومتحرقش على العربية وتخلي الإزاز مقفول معظم الوقت دي حاجات برضه بتساعد على خفض الاستهلاك

أيوة لازم تغير السولونويد ولو حطتها على الجهاز هتلاقيها مسجلة الخطأ ده
لو مغيرتوش كل شوية لما تمشي بالعربية كتير هتعمل معاك كده..
تغيير الزيت مفيهوش أي مشكلة خالص وأنا مغيره مرتين قبل كده طالما نوع الزيت مظبوط والكمية مظبوطة
لكن الأعراض اللى عندك دي أعراض سولونويد