الموضوع: ازاي تعمل تنظيف اضطراري للرديتر :d

المشاركة الأصلية كتبت بواسطة aw2100

على فكرة انصحك وكل الاعضاء بعدم استعمال الطريقة دى نهائيا علشان موتور الفليشيا حساس جدا لسؤ توزيع الحرارة وده بيخلى وش السلندر والجوان يضرب واستعمال ميه الحنفية مضر جدا بموتور الفليشيا وطمبه الميه لو عاوز تنظف الرادياتير طلعه برة العربية او فك خراطيم الرادياتير واغسله براحتك بعيد عن الموتور وبعدين صفيه كويس واشطفة بميه مقطرة وركبه فى العربية وامﻻء الموتور ميه مقطرة واشطفة وفضيه من
الميه المقطرة وبعدين حط ميه حمراء واﻷفضل ميه توتال 4لتر ب 70 جنيه وانسى الصدء فى الموتور

حصل ..أنا العربيه جابت مني جوان بسبب الطريقة دي في الغسيل ..أحسن طريقة هي الغسيل بالدورة المغلقه ..وحتى لما رحت أغسل الريداتير بعد ما عملت الجوان بتاع الريداتير غسل بالدورة المغلقة

المشاركة الأصلية كتبت بواسطة waell2007

طيب ياريت طريقة غسيل بالدورة المغلقة

الطريقة اللي هقولها لحضرتك دي على أساس إن أنا عندي غطا للريداتير ....هو أولا فضى المياه اللي كنت رايحله بيها على الأرض وبعدين قالي دور العربيه وقام مالي الريداتير مياه حنفيه ومعاه مسحوق غسيل ..باكو بريل من أبو جنيه ونص..ومحطش مياة نار نهائي ..وبعدين قفل الغطا بتاع الريداتير ..وكانت الكيعان بتاعة المياه راكبه عادي جدا كلها ..وبعدين إستنى لغاية العربيه ما سخنت والمروحه إشتغلت وفصلت ..وهو سايبها كل ده ..وبعدين قام بعد تاني مره تقريبا من شغل المروحه وفصلتها قام فاتح غطا الريداتير كده بالراحه ..وهي العربيه شغاله ..وكان بيفتح الغطا بهدوء كده وكان ماسكه بفوطه عشان طبعا كان سخن نار ..وبعدين قام فاكك الكوع اللي طالع من المكنه رايح على الريداتير..فكه من ناحية الريداتير ...وبدأ يحط خرطوم مية الحنفية في الريداتير .. لغاية ما لقي المياه اللي طالعه من المكنه نضيفة..طبعا قصة إن المياه تطلع نضيفه من المكنه دي ما خدتش عشر ثواني على بعض وكانت المياه طالعه نضيفه من المكنه ..قام مركب الكوع تاني في الريداتير ..الكوع اللي هو فكه ..وكل ده وهو سايب خرطوم مياه الحنفية في الريداتير وبعدين قام شايل الخرطوم بتاع مياه الحنفيه من الريداتير لإن الريداتير كان مليان وبيكب على الأرض .. وقام قافل الغطا بتاع الريداتير تاني ..وإستنى لغاية المروحه ما إشتغلت وفصلت وقام فاتح الغطا بنفس الطريقة اللي فتح بيها الغطا أول مرة وبعدين فك نفس الكوع تاني اللي فوق ..وقام حاطط الخرطوم في الريداتير لغاية ما إتأكد إن المياه اللي طالعه من الريداتير نضيفه..هي كانت نضيفه أصلا بس هو كان بيشطف شطفه سريعه ..و بعدين قام قافل الكوعه اللي هو كان فاككها وطبب المياه في الريداتير للآخر وقام قافل الريداتير ..كل ده والعربيه دايرة ..وقالي إمشي بيها إسبوع وبعدين تعالى نحط مياه ملونة ..طبعا أنا مرحتش وحطيت مياه إبرو الخضره ..وبسم الله ما شاء الله ..الدنيا حلاوة معايا..أنا شايف إن الطريقه دي بتحافظ على ضغط المياه في دورة التبريد قدر الإمكان ..حتى الوقت اللي كان فكك في الكوعه بتاعة المياه اللي رايحه على الريداتير وأكيد كان في الوقت ده ضغط المياه ضعف داخل دورة التبريد ..الوقت ده مكانش كبير ..وميأثرش على المكنه في حاجه وخصوصا إن كان خرطوم المياه محطوط في الريداتير وبيعوض أول بأول المياه اللي خارجه