الموضوع: الرانجلر vs شيروكى kk

المشاركة الأصلية كتبت بواسطة yk_5

عاوز اشترى جيب ومحتار بين الرانجلر 2010 والـ kk من 2008 حتى 2010 الأفضليه فيهم لمين باستثناء الشكل طبعا دى مسألة تختلف من شخص لآخر انا بأسأل عن الأفضليه من حيث تصميم الشاسيه - الإعتمادية والآداء (الموتور والفتيس والعفشة ..... الخ) التقفيل.
شكراً

الرانجلر ٢٠١٠ و ٢٠١١ بموتور ٣٨٠٠ سى سى ٢٠٢ حصان وفى سنة ٢٠١٢ نزلوا موتور جديد ٣٦٠٠ سى سى ٢٨٥ حصان اسمه بنتا ستار
الـ KK من ٢٠٠٨ الى ٢٠١٣ موتور واحد ٣٧٠٠ سى سى ٢١٢ حصان
الـراحة اكتر فى الـ KK عن الرانجلر
الكنبة الخلفية اريح فى الـ KK عن الرانجلر
الضوضاء اقل فى الـ KK عن الرانجلر
العفشة فى الرانجلر اقوى من الـ KK
التحكم وزوايا الرؤيا أحسن فى الـ KK
الرانجلر على شاسية والـ KK تعتبر unibody
اداء الرانجلر فى الـ offroad أحسن
قابلية الرانجلر للتعديل زى مانت عاوز ( كله بتمنه )
الإعتمادية فى الاتنين متقاربة
التقفيل فى الـ KK أفضل بكتير
أهم حاجه سواء فى الرانجلر أو الـ KK حالة العربية لأنك حاتشتريها طبعاً مستعملة ولو العربية ملعوب فيها حايبقى الاتنين حايتعبوك ولو الحالة كويسة والعربيتين مظبوطين مش حاتقابل مشاكل كبيرة فى المستقبل .
اهم حاجه ايه اللى انت عاوزه من العربية يعنى لوعاوز سيارة عائلية تروح بيك اى حته يبقى الـ KK ولو عاوز عربية بهدلة فى الصحرا يبقى الرانجلر - لو بتسافر كتير على طرق سريعة اسفلت يبقى الـ KK ولو بتنزل صحرا كتير يبقى الرانجلر - لو غاوى تعديل ورفع عفشة وتعريض كاوتش وحركات يبقى الرانجلر .
لو اخترت الرانجلر يبقى ٢٠١٠ او ٢٠١١ او ٢٠١٣
انا فتحتلك معظم النقط اللى اى حد بيفكر فيها وانت الحكم على الاختيار - ونصيحة سوق الاتنين وشوف ايه القصة .
وتحت امرك فى اى استفسار تانى . وبالتوفيق إن شاء الله

المشاركة الأصلية كتبت بواسطة yk_5

أشكرك يا باشمهندس أحمد على المعلومات القيمة وبعد الكلام ده اللى يناسبنى اكتر الـ KK بس ليا ملاحظة مع استفسار ويهمنى أوى رأى حضرتك انا اتفرجت على كذا KK وتقريبا كلهم الجزء اللى حوالين الـ sun roof يا اما منشع او باين فيه صدأ أو مبهدل هو دا عيب تقفيل والا سوء استخدام والا دى حالات فرديه والا ايه ؟؟
شكراً لحضرتك مره تانية

اللى تلاقيها منشعة أو فيها بقع صدأ فى الفرش بتاع السقف يبقى حاجه من تلاتة :
- فيه خرطومين تصريف مياه لفتحة السقف ( لما تفتح الـsunroof وتطلع راسك منها حاتبص على الاتنين كورنر الاماميين حتلاقى ثقب فى كل كورنر دول خاصين بخراطيم التصريف للمياه بتاعة الغسيل او المطر ونهايتهم فى ارضية العربية من بره خلف العجلتين الاماميتين - بمعنى انك لو دلقت كباية ميه من الثقب حتلاقيها نزلت تحت العربية ورا العجلة الامامية) ممكن يكون الخرطومين مسدودين لأنهم بيتسدوا من التراب والمية فبيعملوا طينة تسد الثقب وبالتالى المية حاتقع على فرش السقف لما يتسدوا.
- تانى حاجه تبص كويس جداً على المجرة بتاعة الروف راك لأنها ممكن تكون مصدية واتخرمت
ونشعت على فرش السقف .
- تالت حاجه لو البرابريز الامامى متغير قبل كده ( حتلاقى الاصلى جريش والمتغير جريش برضه لأن البرابريز الامامى والاربع زجاج ابواب والزجاجين الجانبيين الثابتين اللى خلف الابواب الخلفية جريش - وحتلاقى برابريز الشنطة والشراعات بتاعة البابين اللى ورا امريكانى موبار - وخلى بالك من الامريكانى ده لأنه غالى جداً بمعنى مثال الشراعة بتاعة اى باب خلفى بتعمل حوالى ٣٥٠٠ جنيه وفردة الزجاج اللى قدها ٥ مرات بتعمل حوالى ٥٠٠ جنيه - والبرابريز الامامى إللى قدها ١٠٠ مرة بيعمل من ٤٠٠ الى ٥٠٠ جنيه - جنان :) ) - فى الغالب الصنايعية بيفشلوا فى تركيبه واحتمال كبير يجيب ميه برضه على فرش السقف .
نصيحة حاول تخليه يفكلك الروف راك وده فكه بسيط جداً وسهل حاتخلع البلاستكة اللى قدام والبلاستكه الى ورا ( بعتبروا غطا لقواعد تثبيت الروف راك ) ودول بيتخلعوا نطر باى مفك عادة وبعدين حتلاقى تحتهم صامولتين قدام وصامولتين ورا حاتفكهم يطلع معاك الروف راك (كل جنب لوحده) واتأكد إن مافيش صدا أو بارومة خصوصاً حوالين الاستدزات اللى مثبته الروف راك . وممكن برضه لما تروح تكشف عليها خلى اللى حايكشف يقوم بالمهمة دى.