انا مريض بمرض القلق

**msobhy** · 12-01-2016 11:09 AM

انا ترددت كتيييييييييييييييييير انى اتكلم فى الموضوع ده
بدون مبالغه ترددت تقريبا 20 أو 22 سنه
وانا عندى 13 أو 14 سنه لاقيت نفسى قلقان على حاجات غريبه - على سبيل المثال ان الميه تتقطع عن المنطقه اللى انا ساكن فيها - الكهرباء يحصل فيها مشاكل - ان والدى دخله ميكفناش اننا ناكل

كان عندى شوية عقلانيه ساعتها وقلت ان ديه هلاوس مراهقه

كبرت شويه ودخلت الجامعه - خلال فترة الجامعه انا عايش فى رعب انى ملاقيش شغل لما اتخرج - مع العلم انى كنت شغال فى فترة الجامعه وكان دخلى كبير - لدرجة ان والدى رحمه الله كان مرتبه تقريبا 1200 جنيه وانا كان دخلى الشهرى لا يقل عن 1400 جنيه شهريا وده كان سنة 1996-2000

اتخرجت واشتغلت فى كذا مجال وربنا كرمنى لكن القلق هايموتنى وان كان القلق اتنقل دلوقتى للأولادى بشكل كبير بالاضافه لقلقى الشخصى

انا هاحكى لكم يومى عامل ازاى
اصحى الصبح قلقان ان العربيه يكون فيها حاجه لا قدر الله
اروح الشغل ابقى قلقان لا يحصل اى مصيبه فى الشغل وانا مش زى الناس الطبيعيه - بمعنى لو حصلت مشكله فى اداره غير ادارتى بشيل همها ومودى بيبقى زى الزفت
اى مكالمات تيجى لى من البيت او العائله ببقى مرعوب وانا برد لأحسن يكون حصل حاجه
كل شويه افتكر ان الاولاد فى المدرسه وابقى خايف يكون حصل لهم حاجه
وانا مروح ببقى قلقان ان حد يكون راكن مكانى
حياتى كلها قلق فى قلق
كلها تفكير وتخطيط واعادة حسابات
متوسط عدد ساعات دخولى السرير تقريبا 8 ساعات - متوسط عدد ساعات نومى 4-5 ساعات وأوقات اقل
عادى جدا انى ادخل انام الساعه 11 واصحى على الساعه 12 أو 1 لغاية تانى يوم الصبح

انا اوقات بوصل لمرحلة انهيار انى انام 12-16 ساعه متواصله كل اسبوعين تلاته

حاجه غريبه جدا حصلت لى
انا سفرت فى حياتى مرتين فقط
المره الاولى دبى وعلى عكس الناس كلها مكنتش حاببها خااااااااااااااااااالص ولكن نسبيا كنت هادى جدا جدا جدا وانا هناك
المره التانيه كنت فى السودان وهيه شبه الارياف عندنا هنا وساعتها كنت بموت من القلق والتوتر

برضو لاحظت انى وانا مزنوق ماديا بتبقى حالتى زى الزفت ومرعوب ان اى حاجه تحصل - والغريب ان دايما بتحصل مصايب فى الفتره ديه وبتزنق أكتر وأكتر

هل ده ليه اى معنى

المشكله انى كل ما اتوتر وابقى قلقان ضغطى بيعلى بشكل هيستيرى وبيصاحب الكلام ده مشاكل فى الدوره الدمويه والجهاز الهضمى بالكامل

عارفين ايه اكبر قلق انا عايش بيه دلوقتى - طول عمرى حرفيا مش فارق معايا انى اعيش او اموت - عمرى فى حياتى ما خفت من الموت مع العلم انى بترعب من المرض - رعبى الاكبر دلوقتى انى اموت واطفالى صغيرين - رعب قاااااااااااااااااااااتل

انا لما باشوف اللى بيحصل فى سوريا والعراق ببقى هاموت على اطفالى
فيه ناس كتيره قالت لى ان اللى انا فيه ده قلة ايمان بالله والواحد المفروض يبقى ثقته فى الله اكبر من كده - نسبيا انا مقتنع بالكلام ده لكن انا فعلا واثق فى الله لأبعد الحدود

وانا بكتب الموضوع ده والصداع هايموتنى من كتر التوتر اللى انا فيه

هل فيه اى حل ل اللى انا فيه

**احمد المصرى** · 12-01-2016 11:19 AM

ايه اخبار صلاتك

**msobhy** · 12-01-2016 11:44 AM

المشاركة الأصلية كتبت بواسطة احمد المصرى

ايه اخبار صلاتك

للأسف متقطع جدا - بمعنى ان ممكن يفوتنى عصر - مغرب -

المشاركة الأصلية كتبت بواسطة kemoelord

شوف يا باشا انا شبهك في معظم الحاجات الي فيك خصوصا في موضوع القلق بس عندي القلق من المستقبل وبشغل دماغي بحسابات في كل شي في الدنيا لدرجة اني مأجل موضوع الارتباط بسبب التفكير الزائد مش فكرة هروب من المسؤولية قد ما فكرة قلق وحسابات الموضوع, حل الموضوع ده ايه ,, مش شايف غير اننا لازم نتوكل ع الله ونسعى ونترك الباقي ع ربنا

صدقنى انا اختصرت الكلام تماما
انا قلقى على المستقبل خصوصا على اولادى هيستيرى
لو قعدت اتكلم من هنا لبكره ولا هاخلص كلام

**kemoelord** · 12-01-2016 12:03 PM

الله يوفقنا ويكتبلنا الي فيه الخير ويكرمنا بامر الله , طالب منك طلبين بس :D

اولا: لو لاقيت حل للي احنا فيه يا ريت تبلغني هههههههههه

ثانيا ممكن اعرف ازاي بتعمل الاقتباس المتعدد ده ( Multiple quotes )

**msobhy** · 12-01-2016 12:32 PM

المشاركة الأصلية كتبت بواسطة hobiko

اهلا بيك فى النادى .......... انت جيت على الجرح

انا مش زيك فى معظم الحاجات ........... بس انا فعلا عندى قلق و رعب شنييييع انى اموت او يجرالى حاجة و اولادى صغيرين

بص انا جربت حاجات كتير .......... فيه دوا كويس و مش بيعمل ادمان و لا حاجة ..... اسمه دوجماتيل

الحاجة التانية اللى بحاول اعملها باستمرار ...... و بحس انها بتريحنى .......... الدعاء

بفضل ادعى لربنا ان ما يحصلش اى حاجة من اللى انا خايف منها

هو الوحيد عز و جل اللى فى ايده تحصل اى حاجة

بفضل ادعى باى حاجة ......... و ساعات بقعد اشرح ........ اشرح حالى و وضعى و ايه اللى مخلينى قلقان و خايف ....... و بحس ان ربنا بيسمعنى و انا بفضفض

بص من الأخر ........ انا دورت كتير ........ مالقتش غير الحلين دول

انا نسيت حاجة كمان

الرياضة ....... انا ماكنتش بمارس اى نوع من الرياضة ........ مؤخرا اشتركت فى جيم محترم و ضحيت بالفلوس و قلت اجرب ......... لقيت الرياضة بتقلل من حدة التوتر شوية

ربنا معاك

انا قعدت فتره كبيره اخد دوجماتيل لغاية لما بقى ملوش اى تأثير
بعدها واحد صديقى صيدلى ادانى دواء باخد حبيه منه كل 10 أو 15 يوم بيخلينى انام على الاقل 12 ساعه واقعدت متنح لمدة يوم او اتنين
صديقى قالها لى قبل كده ان احسن حاجه فى حالتى ان دماغى خفيفه جدا خصوصا بعد ما بطلت شرب قهوه وشاى اللى كنت تقريبا مدمنهم

بخصوص الرياضه حضرتك جيت على الجرح تماما
انا كنت رياضى بشكل عنيف وانا صغير وفجأه بطلت وده تقريبا من سنة 1999 وده من احد الاسباب اللى مخليه نفسيتى زى الزفت فى كل حاجه
احد الخطط انى ان شاء الله من أول شهر 3 القادم هابدأ اروح جيم وده علشان الظروف الماديه وفى نفس الوقت انى مشغول جدا الايام ديه
الغريب ان انا وانت متفقين فى نقطه معينه
انا فعلا بحس انى مستريح جدا لما بادعى كتير - لدرجة انى اوقات باقعد احكى بالدقايق لربنا وانا ساجد
واوقات باحس ان لسانى مش قادر يقول اللى جواى وبافضل اقول يا رب انت حاسس بيه وعارف اللى جوايا

المشاركة الأصلية كتبت بواسطة kemoelord

الله يوفقنا ويكتبلنا الي فيه الخير ويكرمنا بامر الله , طالب منك طلبين بس :d

اولا: لو لاقيت حل للي احنا فيه يا ريت تبلغني هههههههههه

ثانيا ممكن اعرف ازاي بتعمل الاقتباس المتعدد ده ( multiple quotes )

شوف يا صديقى
انت عايز تعمل اقتباس لكذا شخص
هاتلاتلاقى جنب كلمة الرد او الاقتباس هاتلاقى علامه زى ورقه وعليها قلم
دوس على العلامه ديه لغاية اخر واحد انت عايز ترد عليه ساعتها اختار اقتباس
هاتلاقى الاقتباس طالع بشكل متعدد

على فكره من فتره كبيره جدا اتكلمنا مع بعض وكان بسبب عربيتك لو تفتكر - بصراحه انا مستغرب انك لسه متجوزتش - هو انت عندك كام سنه

**amr011111** · 12-01-2016 01:18 PM

كلنا عندنا القلق ده بس بتختلف درجته حسب انشغالك اليومى
انت مواعيد عملك من كام لكام

**msobhy** · 12-01-2016 01:31 PM

المشاركة الأصلية كتبت بواسطة amr011111

كلنا عندنا القلق ده بس بتختلف درجته حسب انشغالك اليومى
انت مواعيد عملك من كام لكام

الطبيعى من 9 الى 4.30
لكن اوقات بتبقى من 9 الى 10 بالليل واوقات بطبق فى حالة السفر

طبعا لما بانشغل جامد القلق بيقل لكن ده ميمنعش انى اول لما اروح اقعد افكر

-

-

الموضوع: انا مريض بمرض القلق

LinkBack

أدوات الموضوع

عرض

انا مريض بمرض القلق - انشر الموضوع فى :

-

-

-

-

-

-

المواضيع المتشابهه

انقذوا اخوكم من القلق

القلق هيموتني

الكلمات الدلالية لهذا الموضوع

المفضلات

المفضلات

ضوابط المشاركة